ຂ່າວຫຼ້າສຸດ

ດ່ານພາສີສາກົນບໍ່ເຕັນ ປະຕິບັດລາຍຮັບໄດ້ 80 ກວ່າຕື້ກີບ

858 23 ພ.ພ. 2019 ຂ່າວໜ້າ​ໜຶ່ງ
ດ່ານພາສີສາກົນບໍ່ເຕັນ ປະຕິບັດລາຍຮັບໄດ້ 80 ກວ່າຕື້ກີບ

    ການ​ນຳ​ເຂົ້າ-ສົ່ງ​ອອກ​ສິນ­ຄ້າ​ປະ­ເພດ​ນ້ຳ­ມັນ​ເຊື້ອ​ໄຟ​ພາ­ຫະ­ນະ ເຄື່ອງ­ໃຊ້​ໄຟ­ຟ້າ ເຄື່ອງ​ອຸ­ປະ­ໂພກ-ບໍ­ລິ­ໂພກ ແລະ ອື່ນໆ ຜ່ານ​ດ່ານ​ພາ­ສີ​ສາ­ກົນ​ບໍ່​ເຕັນ​ແຂວງ​ຫຼວງ​ນ້ຳ​ທາ ມີ​ບັນ­ຍາ­ກາດ​ຄຶກ­ຄື້ນ​ກວ່າ​ປີ­ຜ່ານ­ມາ ໃນ​ໄລ­ຍະ 4 ເດືອນ​ຕົ້ນ​ປີ 2019 ສາ­ມາດ​ເກັບ​ລາຍ​ຮັບ​ເຂົ້າ​ງົບ­ປະ­ມານ​ແຫ່ງ​ລັດ​ໄດ້ 80 ກວ່າ​ຕື້​ກີບ ແລະ ຄາດ​ວ່າ​ໝົດ​ປີ 2019 ຈະ​ປະ­ຕິ­ບັດ​ໄດ້​ລື່ນ​ແຜນ­ການ.

    ທ່ານ ຄຳ​ສຸ­ວັນ ວົງ​ສິນ​ນະ​ສອນ ຫົວ­ໜ້າ​ດ່ານ​ພາ­ສີ​ສາ­ກົນ​ບໍ່​ເຕັນ ໃຫ້​ສຳ­ພາດ​ເມື່ອ​ບໍ່​ດົນ​ນີ້​ວ່າ: ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ວິ­ຊາ​ສະ­ເພາະ ຂອງ​ດ່ານ​ພາ­ສີ​ສາ­ກົນ​ບໍ່​ເຕັນ​ໃນ​ປີ­ຜ່ານ­ມາ​ມີ​ຫຼາຍ​ອັນ​ພົ້ນ​ເດັ່ນ ໂດຍ​ສະ­ເພາະ​ການ​ແກ້​ໄຂ​ປາ­ກົດ­ການ​ຫຍໍ້­ທໍ້ ສາ­ມາດ​ຈັບ​ກຸມ​ຄະ­ດີ​ລະ­ເມີດ​ກົດ­ໝາຍ​ວ່າ​ດ້ວຍ​ພາ­ສີ​ໄດ້ 71 ຄະ­ດີ ເດັ່ນ​ກວ່າ​ໝູ່​ແມ່ນ​ຄະ­ດີ​ການ​ສົ່ງ​ອອກ​ຫີນ​ປາ​ໂກ​ໄດ​ໄປ ສປ ຈີນ ຄະ­ດີ​ການ​ຈັບ​ກຸມ​ລົດ​ນຳ​ເຂົ້າ​ບໍ່​ຖືກ­ຕ້ອງ 23 ຄະ­ດີ ລະ­ເມີດ​ຊັບ​ສິນ​ທາງ​ປັນ­ຍາ 1 ຄະ­ດີ ລົດ​ບັນ­ທຸກ 1 ໂຕນ​ຍີ່­ຫໍ້ SOJEN 342 ຄັນ ຄະ­ດີ​ສັດ­ປ່າ​ຫວງ​ຫ້າມ​ທີ່​ໃກ້​ສູນ­ພັນ 2 ຄະ­ດີ ເຄື່ອນ​ຍ້າຍ​ເງິນ​ເຂົ້າ-ອອກ​ປະ­ເທດ ໂດຍ​ບໍ່​ໄດ້​ຮັບ​ອະ­ນຸ­ຍາດ​ຈາກ​ທະ­ນາ­ຄານ​ແຫ່ງ ສປປ ລາວ 3 ຄະ­ດີ ຄະ­ດີ​ໄມ້​ຫວງ​ຫ້າມ​ທີ່​ເປັນ​ໄມ້​ກິ່ງ​ງ່າ​ເປັນ​ແຜ່ນ ແລະ ເປັນ​ຊິ້ນ​ສ່ວນ​ທີ່​ບໍ່​ສາ­ມາດ​ວັດ­ແທກ​ບໍ​ລິ​ມາດ​ໄດ້ ເຊິ່ງ​ລັກ­ລອບ​ຊຸກ­ເຊື່ອງ​ໄປ​ຕາມ​ລົດ​ໂດຍ­ສານ ແລະ ລົດ​ຕ່າງໆ 8 ຄະ­ດີ ນອກ​ນີ້ ຍັງ​ມີ​ຄະ­ດີ​ລະ­ເມີດ​ກົດ­ໝາຍ​ວ່າ​ດ້ວຍ​ພາ­ສີ ແລະ ລະ­ບຽບ​ການ​ທາງ​ພາ­ສີ​ທົ່ວ​ໄປ 33 ຄະ­ດີ.

    ສຳ­ລັບ​ປີ 2019 ດ່ານ​ພາ­ສີ​ສາ­ກົນ​ບໍ່​ເຕັນ ໄດ້​ຮັບ​ຕົວ​ເລກ​ແຜນ­ການ​ຈັດ​ເກັບ​ລາຍ​ຮັບ​ເຂົ້າ​ງົບ­ປະ­ມານ​ແຫ່ງ​ລັດ 264 ຕື້​ກີບ ໃນ​ນີ້ ໄດ້​ແບ່ງ​ໃຫ້​ບັນ­ດາ​ດ່ານ​ທີ່​ຂຶ້ນ​ກັບ​ຄື: ດ່ານ​ພາ­ສີ​ສາ­ກົນ​ບໍ່​ເຕັນ 236 ຕື້​ກີບ ດ່ານ​ພາ­ສີ​ທ້ອງ­ຖິ່ນ​ປາງ​ໄຮ 24,9 ຕື້​ກີບ ດ່ານ​ພາ­ສີ​ທ້ອງ­ຖິ່ນ​ຊຽງ​ກົກ 100 ລ້ານ​ກີບ ດ່ານ​ພາ­ສີ​ທ້ອງ­ຖິ່ນ​ບ້ານ​ມອມ 2 ຕື້​ກີບ ແລະ ເຂດ​ເສດ­ຖະ­ກິດ​ພິ­ເສດ​ບໍ່​ເຕັນ​ແດນ​ງາມ 1 ຕື້​ກີບ ເຊິ່ງ​ຜ່ານ​ການ­ຈັດ­ຕັ້ງ​ປະ­ຕິ­ບັດ 4 ເດືອນ​ຜ່ານ​ມາ 2019 ສາ­ມາດ​ຈັດ​ເກັບ​ໄດ້ 83 ຕື້​ກີບ ທຽບ­ໃສ່​ແຜນ­ການ​ປີ​ປະ­ຕິ­ບັດ​ໄດ້ 31,44% ທຽບ­ໃສ່​ໄລ­ຍະ​ດຽວ​ກັນ​ຂອງ​ປີ­ຜ່ານ­ມາ​ເພີ່ມ​ຂຶ້ນ 19,4% ເຊິ່ງ​ລາຍ​ຮັບ​ສ່ວນ​ໃຫຍ່​ໄດ້​ຈາກ​ຄ່າ​ຊັກ​ພິ­ເສດ​ຂາ​ອອກ ການ​ເສຍ​ພາ­ສີ-ອາ­ກອນ​ຂາ​ເຂົ້າ​ປະ­ເພດ​ນ້ຳ­ມັນ​ເຊື້ອ​ໄຟ ພາ­ຫະ­ນະ ເຄື່ອງ​ກໍ່­ສ້າງ ເຄື່ອງ­ໃຊ້​ໄຟ­ຟ້າ ເຄື່ອງ​ອຸ­ປະ­ໂພກ-ບໍ­ລິ­ໂພກ ຄ່າ​ທຳ­ນຽມ​ຄົນ​ເຂົ້າ-ອອກ​ເມືອງ ຄ່າ​ທຳ­ນຽມ​ພາ­ຫະ­ນະ​ເຂົ້າ-ອອກ​ເມືອງ ຄ່າ​ທຳ­ນຽມ​ຜ່ານ​ແດນ ຄ່າ​ທຳ­ນຽມ​ຄັງ​ແຮ​ນ້ຳ­ມັນ​ເຊື້ອ​ໄຟ ຄ່າ​ປັບ​ໃໝ-ຂາຍ­ເຄື່ອງ​ຮິບ ແລະ ອື່ນໆ.

    ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ຜ່ານ​ມາ ເຮັດ​ໄດ້​ດີ​ຍ້ອນ​ຄະ­ນະ​ພັກ-ຄະ­ນະ​ນຳ​ທຸກ​ຂັ້ນ ໄດ້​ເອົາ­ໃຈ­ໃສ່​ຊີ້​ນຳ​ຢ່າງ​ໃກ້­ຊິດ​ລວມ​ທັງ​ຄະ­ນະ​ດ່ານ ໄດ້​ວາງ​ຫຼາຍ​ມາດ​ຕະ­ການ​ເພື່ອ​ຊຸກ­ຍູ້​ການ​ປະ­ຕິ­ບັດ​ລາຍ​ຮັບ ບວກ​ກັບ​ພະ­ນັກ­ງານ​ເຈົ້າ​ໜ້າ­ທີ່​ພາ­ສີ ໄດ້​ເອົາ­ໃຈ­ໃສ່​ປະ­ຕິ­ບັດ​ໜ້າ­ທີ່​ດ້ວຍ​ຄວາມ​ຮັບ­ຜິດ­ຊອບ​ສູງ ແລະ ມີ​ການ​ນຳ​ເຂົ້າ-ສົ່ງ​ອອກ​ສິນ­ຄ້າ​ປະ­ເພດ​ນ້ຳ­ມັນ​ເຊື້ອ​ໄຟ ພາ­ຫະ­ນະ ເຄື່ອງ­ໃຊ້​ໄຟ­ຟ້າ ເຄື່ອງ​ອຸ­ປະ­ໂພກ-ບໍ­ລິ­ໂພກ ແລະ ອື່ນໆ ຜ່ານ​ດ່ານ​ສາ­ກົນ​ບໍ່​ເຕັນ​ຫຼາຍ​ຂຶ້ນ​ສະ­ເລ່ຍ​ຫຼາຍ 100 ຄັນ​ຕໍ່​ວັນ.

ຂ່າວທີ່ກ່ຽວຂ້ອງ