ຂ່າວຫຼ້າສຸດ

ເອັສຣາ ສຳເລັດການຄັດເລືອກນັກກີລາພາກເໜືອ

600 22 ພ.ພ. 2019 ວົງຈອນກີລາ
ເອັສຣາ ສຳເລັດການຄັດເລືອກນັກກີລາພາກເໜືອ

    ສະ­ໂມ­ສອນ ເອັສຣາ ເອັຟ​ຊີ ໄດ້​ສຳ­ເລັດ​ການ​ຄັດ​ເລືອກ​ນັກ­ກີ­ລາ 4 ແຂວງ​ພາກ​ເໜືອ ເພື່ອ​ຄັດ​ເລືອກ​ນັກ­ກີ­ລາ​ທີ່​ມີ​ພອນ​ສະ­ຫວັນ ເຂົ້າ​ບັນ­ຈຸ​ເປັນ​ນັກ­ກີ­ລາ​ສູນ​ເຝິກ­ຊ້ອມ​ເອັສຣາ ບ້ານ​ສີ​ເກີດ ເມືອງ​ນາ​ຊາຍ​ທອງ ນະ­ຄອນ­ຫຼວງ​ວຽງ​ຈັນ ກຽມ​ຄວາມ​ພ້ອມ​ເຂົ້າ​ຮ່ວມ​ການ​ແຂ່ງ­ຂັນ​ລາຍ­ການ​ຕ່າງໆ​ທັງ​ພາຍ​ໃນ ແລະ ຕ່າງ­ປະ­ເທດ.

    ທ່ານ ສີ​ລາ ຄີມ ຄະ­ນະ​ຄູ​ເຝິກ​ສະ­ໂມ­ສອນ​ເອັສຣາ​ເອັຟ​ຊີ ໃຫ້​ສຳ­ພາດ​ວ່າ: ການ​ຄັດ​ເລືອກ​ຄັ້ງ​ນີ້​ໄດ້​ຕັ້ງ​ເປົ້າ​ໝາຍ​ໄວ້​ຢູ່ 4 ແຂວງ​ພາກ​ເໜືອ​ຄື: ແຂວງ​ໄຊ​ຍະ​ບູ​ລີ ຫຼວງ​ພະ​ບາງ ຊຽງ​ຂວາງ ແລະ ແຂວງ​ວຽງ​ຈັນ ເຊິ່ງ​ໄລ­ຍະ​ຜ່ານ​ມາ ສະ­ໂມ­ສອນ​ຂອງ​ພວກ​ເຮົາ ໄດ້​ຄັດ​ເລືອກ​ຢູ່​ສະ­ເພາະ​ພາກ​ໃຕ້​ເທົ່າ​ນັ້ນ ເນື່ອງ​ຈາກ​ປັດ­ຈຸ­ບັນ ເຫັນ​ວ່າ​ພາກ​ເໜືອ​ມີ​ນັກ­ກີ­ລາ​ມີ​ພອນ​ສະ­ຫວັນ​ດີ­ເດັ່ນ​ຫຼາຍ​ແຂວງ ດັ່ງ­ນັ້ນ ຄະ­ນະ​ຄູ​ເຝິກ​ຈຶ່ງ​ໄດ້​ຕົກ­ລົງ​ເອົາ 4 ແຂວງ​ດັ່ງ­ກ່າວ ການ​ຄັດ​ເລືອກ​ໄດ້​ດຳ­ເນີນ​ແຕ່​ວັນ​ທີ 6-14 ພຶດ­ສະ­ພາ 2019 ເຊິ່ງ​ສາ­ມາດ​ຄັດ​ເລືອກ​ໄດ້​ນັກ­ກີ­ລາ​ທັງ​ໝົດ 40 ຄົນ ທີ່​ມີ​ອາ­ຍຸ10-12 ປີ ຮຽນ​ຢູ່​ຊັ້ນ ປ 5.

    ທ່ານ ສີ​ລາ ຄີມ ຍັງ​ກ່າວ​ຕື່ມ​ວ່າ: ຫຼັງ​ຈາກ​ສຳ­ເລັດ​ການ​ຄັດ​ເລືອກ​ຄັ້ງ​ນີ້ ນັກ­ກີ­ລາ 40 ຄົນ​ຈະ​ເລີ່ມ​ເຂົ້າ​ສູນ​ເຝິກ­ຊ້ອມ​ໃນ​ທ້າຍ​ເດືອນ​ສິງ­ຫາ​ນີ້ ການ​ເຂົ້າ​ສູນ​ເຝິກ­ຊ້ອມ​ສະ­ໂມ­ສອນ​ຂອງ​ພວກ​ເຮົາ ຈະ​ຮັບ​ສົ່ງ​ຮຽນ​ໂຮງ­ຮຽນ​ສາ­ມັນ​ຈົນ​ຈົບ​ມັດ­ທະ­ຍົມ​ຕອນ​ປາຍ ພ້ອມ​ທັງ​ເຝິກ­ຊ້ອມ​ເຕະ­ບານ​ໃນ​ເວ­ລາ​ຫວ່າງ ເພື່ອ​ກ້າວ​ສູ່​ເປັນ​ນັກ­ກີ­ລາ​ທີມ​ຊາດ​ໃນ​ອະ­ນາ­ຄົດ.

    ສຳ­ລັບ​ສູນ​ເຝິກ­ຊ້ອມ​ສະ­ໂມ­ສອນ​ເອັສຣາ​ເອັຟ​ຊີ ໄດ້​ຮັບ​ການ​ສ້າງ­ຕັ້ງ​ຂຶ້ນ​ປີ 2003 ແລະ ໄດ້​ສ້າງ​ນັກ­ກີ­ລາ​ທີ່​ມີ​ຊື່​ສຽງ​ຫຼາຍ​ຄົນ ເປັນ­ຕົ້ນ: ທ້າວ ສຸ​ອາ­ພອນ ທ້າວ ໄມ­ຕີ ທ້າວ ແກ້ວ​ວຽງ​ເພັດ ທ້າວ ຄອນ​ສະ­ຫວັນ ທ້າວ ພຸດ​ທະ​ໄຊ ທ້າວ ມະ­ໂນ​ລົມ ແລະ ທ້າວ ວິ­ລະ​ຍຸດ.

ຂ່າວທີ່ກ່ຽວຂ້ອງ