ຂ່າວຫຼ້າສຸດ

ເບີ່ງບ້ານເຂົາເອົາບົດຮຽນ 22-05-2019

1.389 22 ພ.ພ. 2019 ຫົວຂໍ້ຂ່າວອື່ນໆ

 ຄໍ​ລຳ​ປະຈຳ​ວັນ​ນີ້ ເລີ່ມ​ດ້ວຍ​ຂ່າວ​ຣັດ​ເຊຍ ກັບ​ນະໂຍບາຍ​ໃຫ້​ສັນຊາດ​ແກ່​ຊາວ ອູ​ແກຣນ ຈີນ ກັບ​ບັນຫາ​ສິນຄ້າ​ປອມ ແລະ ສຸດ​ທ້າຍ​ແມ່ນ​ມາດ​ຕະການ​ຄວາມ​ປອດ​ໄພ​ການ​ໂດຍສານ​ທາງ​ລົດໄຟ​ໃນ​ຍີ່ປຸ່ນ.

   ທີ່ ຣັດ​ເຊຍ: ທ່າມກາງ​ສະພາບ​ເຄັ່ງ​ຕຶງ​ດ້ານ​ການ​ທູດ​ລະຫວ່າງ ສະຫະພັນ​ຣັດ​ເຊຍ ແລະ ອູ​ແກຣນ ນີ້ ທາງ​ການ​ຮັດ​ເຊຍ​ໄດ້​ປະກາດ​ໃຊ້​ກົດໝາຍ​ອຳນວຍ​ຄວາມ​ສະດວກ ແລະ ວ່ອງໄວ​ໃຫ້​ແກ່​ຊາວ​ອູ​ແກຣນ ໃນ​ການ​ຮັບ​ສັນຊາດ​ຣັດ​ເຊຍ ຕາມ​ກົດໝາຍ​ສະບັບ​ນີ້ ຜູ້​ຖື​ໜັງສື​ເດີນທາງ​ຣັດ​ເຊຍ​ນັ້ນ​ລ້ວນ​ແຕ່​ສາມາດ​ຂໍ​ສັນຊາດ​ຣັດ​ເຊຍ​ໄດ້ ແຕ່​ສຳລັບ​ຊາວ​ອູ​ແກຣນ​ແລ້ວ​ຍິ່ງ​ໄດ້​ຮັບ​ການ​ພິຈາລະນາ ອະນຸມັດ​ໄວ​ເປັນ​ພິເສດ ຄື: ພາຍ​ໃນ 3 ເດືອນ​ເທົ່າ​ນັ້ນ ແຕ່​ຕ້ອງ​ມີ​ເອກະສານ​ຄົບ ແລະ ຖືກຕ້ອງ​ຕາມ​ລະບຽບ ມາດ​ຕະການ​ດັ່ງກ່າວ​ໄດ້​ຮັບ​ການ​ລົງ​ລາຍ​ເຊັນ​ໂດຍ​ທ່ານ ວະ​ລາ​ດີ​ເມຍ ປູ​ຕິນ ປະທານາທິບໍດີ​ຣັດ​ເຊຍ ເຊິ່ງ​ມີ​ຜົນ​ບັງຄັບ​ໃຊ້​ນັບ​ແຕ່​ວັນ​ທີ 2 ພຶດສະພາ​ປີ​ນີ້​ເປັນຕົ້ນ​ໄປ ຢູ່​ສະຫະພັນ​ຣັດ​ເຊຍ​ໃນ​ປັດຈຸບັນ​ມີ​ຊາວ​ອູ​ແກຣນ​ອາໄສ​ຢູ່​ປະມານ 3 ລ້ານ​ຄົນ ພໍ​ມາດ​ຕະການ​ດັ່ງກ່າວ​ອອກ​ມາ ທາງ​ການ​ປະເທດ​ອູ​ແກຣນ ກໍ​ໄດ້​ອອກ​ຖະແຫຼງການ​ຮຽກຮ້ອງ​ໃຫ້​ທາງ​ການ​ຣັດ​ເຊຍ​ຍົກເລີກ​ກົດໝາຍ​ດັ່ງກ່າວ ທີ່​ເອື້ອ​ອຳນວຍ​ຄວາມ​ສະດວກ ແລະ ວ່ອງໄວ​ແກ່​ຊາວ​ອູ​ແກຣນ​ທີ່​ອາໄສ​ຢູ່​ໃນ​ຣັດ​ເຊຍ.

     ທີ່ ​ສປ ຈີນ: ແຫຼ່ງ​ຂ່າວ​ຈາກ​ໜັງສືພິມ​ຈາຍ​ນາ ເດລີ (China Daily) ໃຫ້​ຮູ້​ວ່າ ນັບ​ແຕ່​ກາງ​ປີ 2018 ເປັນຕົ້ນ​ມາ ທາງ​ການ​ໄດ້​ຈິງ​ຈັງ​ຕັ້ງໜ້າ​ກັບ​ການ​ປາບ​ປາມ ແລະ ເລີກ​ຮື້​ກຸ່ມ​ແກ້ງ​ທີ່ ຄ້າ-ຂາຍ ສິນຄ້າ​ປອມ ຍ້ອມ​ແມວ ກໍ​ຄື ສິນຄ້າ​ຫຼຸດ​ມາດຕະຖານ​ຄຸນ​ນະ​ພາບ ນຳ​ໜ້າ​ພາ​ທາງ​ໃນ​ຂະ​ບວນ​ປາບ​ປາມ​ຄັ້ງ​ນີ້ ແມ່ນ​ຄະນະ​ກຳມະການ​ແຫ່ງ​ຊາດ​ທີ່​ຮັບຜິດຊອບ​ຄຸ້ມ​ຄອງ​ການ​ຕະຫຼາດ​ຈີນ ວິທີ​ການ​ປາບ​ປາມ​ນັ້ນ​ເຮັດ​ສອງ​ສົ້ນ​ໄປ​ພ້ອມໆ​ກັນ ຄື: ທັງ​ຂະ​ບວນ​ການ​ຜະລິດ ແລະ ຂາຍ​ຜະລິດ​ຕະ​ພັນ​ປອມ ແລະ ດ້ອຍ​ຄຸນ​ນະ​ພາບ ລວມ​ທັງ​ສິນຄ້າ​ລອກ​ຮຽນ​ແບບ​ຍີ່ຫໍ້​ສິນຄ້າ​ທີ່​ມີ​ຊື່​ສຽງ​ໂດ່ງ​ດັງ​ອີກ​ດ້ວຍ ທາງ​ຄະນະ​ກຳມະການ​ຄວບ​ຄຸມ​ການ​ຕະຫຼາດ​ແຫ່ງ​ຊາດ​ຈີນ ໄດ້​ໃຫ້​ຮູ້​ຕື່ມ​ວ່າ ການ​ປາບ​ປາມ ເລັ່ງ​ໃສ່​ກິດຈະການ​ທີ່​ຜິດ​ກົດໝາຍ ເຊັ່ນ: ການ​ລະເມີດ​ຫຼັກການ-ມາດຕະຖານ​ການ​ຜະລິດ ການ​ຂາຍ​ສິນຄ້າ​ປອມ ການ ຕົວະ​ຍົວະ​ຫຼອກ​ລວງ​ໃຫ້​ຄົນ​ຊື້​ສິນຄ້າ​ດັ່ງກ່າວ ກໍ​ຄື ການ​ໂຄສະນາ​ທີ່​ຜິດ​ກົດໝາຍ ເພື່ອ​ຈ່າວ​ຂາຍ​ສິນຄ້າ​ດັ່ງກ່າວ.

   ທີ່ ຍີ່ປຸ່ນ: ສຳລັບ​ຜູ້​ທີ່​ເດີນທາງ​ໄປ​ວຽກ ແລະ ທ່ອງ​ທ່ຽວ​ຍີ່ປຸ່ນ ນັ້ນ​ຕ້ອງ​ມີ​ສະຕິ​ສູງ ຄື: ຢ່າ​ພົກ​ພາ​ມີດ-ພ້າ ຂຶ້ນ​ລົດໄຟ​ທຸກ​ປະເພດ ເພາະ​ມາດ​ຕະການ​ສັ່ງ​ຫ້າມ​ເລື່ອງ​ນີ້​ມາ​ຈາກ​ກະຊວງ​ຂົນສົ່ງ​ຍີ່ປຸ່ນ​ທີ່​ເລີ່ມ​ມີ​ຜົນ​ສັກສິດ ນັບ​ແຕ່​ເດືອນ​ເມສາ​ປີ​ນີ້​ເປັນຕົ້ນ​ມາ ສາເຫດ​ທີ່​ຕ້ອງ​ເອົາ​ມາດ​ຕະການ​ເລື່ອງ​ນີ້​ກໍ​ເພາະວ່າ​ໃນ​ເດືອນ ມິຖຸນາ ປີ 2018 ໄດ້​ມີ​ເຫດການ​ໃຊ້​ມີດ​ແທງ​ກັນ​ຕາຍ​ເທິງ​ລົດໄຟ​ຄວາມ​ໄວ​ສູງ ຕາມ​ຄຳ​ເຫັນ​ຂອງ​ກະຊວງ​ທີ່​ດິນ ພັດທະນາ​ພື້ນຖານ​ໂຄງ​ລ່າງ​ຂົນສົ່ງ ແລະ ກະຊວງ​ທ່ອງ​ທ່ຽວ​ຍີ່ປຸ່ນ​ແລ້ວ​ແມ່ນ​ວ່າ ພະນັກງານ​ຮັບ​ຜິ​ຊອບ​ໃນ​ລົດໄຟ​ມີ​ສິດ​ໄລ່​ລົງ​ລົດ​ຜູ້ໂດຍສານ​ທີ່​ລະເມີດ​ຂໍ​ຫ້າມ​ພົກ​ພາ​ມີດ ພ້າ ຫອກ ດາບ ແລະ ວັດຖຸ​ແຫຼມ​ຄົມ​ຂຶ້ນ​ລົດໄຟ  ນັບ​ແຕ່​ມີ​ເຫດ​ແທງ​ກັນ​ຕາຍ​ເທິງ​ລົດໄຟ​ເປັນຕົ້ນ​ມາ ລົດໄຟ​ຄວາມ​ໄວ​ສູງ​ທັງ​ໝົດ​ໃນ​ຍີ່ປຸ່ນ​ໄດ້​ເພີ່ມ​ຈຳນວນ​ພະນັກງານ​ຮັກສາ​ຄວາມ​ປອດ​ໄພ​ຂຶ້ນ​ຢ່າງ​ຫຼວງຫຼາຍ ໃນ​ປີ 2015 ກໍ​ມີ​ເຫດການ​ຊາຍ​ຄົນ​ໜຶ່ງ​ຈູດ​ເຜົາ​ຕົນ​ເອງ​ຢູ່​ເທິງ​ລົດໄຟ​ຄວາມ​ໄວ​ສູງ ຊິ່ງ​ໄດ້​ເຮັດ​ໃຫ້​ຜູ້ໂດຍສານ​ຍິງ​ຄົນ​ໜຶ່ງ​ເສຍ​ຊີວິດ​ຍ້ອນ ແລະ ອີກ​ຫຼາຍ​ຄົນ​ຖືກ​ບາດເຈັບ.

ຂ່າວທີ່ກ່ຽວຂ້ອງ