ນັກກີລາລົດຖີບລາວເຂົ້າຮ່ວມ Bikingman Lao world

632 21 ພ.ພ. 2019 ວົງຈອນກີລາ
ນັກກີລາລົດຖີບລາວເຂົ້າຮ່ວມ Bikingman Lao world

    ນັກ­ກີ­ລາ​ຖີບ​ລົດ​ທີມ​ຊາດ​ລາວ ທ້າວ ຖາ­ວອນ ພົນ​ອາ­ສາ ແລະ ທ້າວ ທະ­ວີ​ສັກ ສຸ­ວັນ­ນະ​ຣາ​ຊ ເຂົ້າ​ຮ່ວມ​ການ​ແຂ່ງ­ຂັນ​ຖີບ​ລົດ ລາຍ­ການ Bikingman Lao World Championship Race ຈັດ​ຂຶ້ນ​ທີ່​ນະ­ຄອນ­ຫຼວງ​ພະ​ບາງ ແຂວງ​ຫຼວງ​ພະ​ບາງ ໃນ​ວັນ​ທີ 20-24 ພຶດ­ສະ­ພາ 2019 ໂດຍ​ເສັ້ນ­ທາງ​ແຂ່ງ­ຂັນ​ເລີ່ມ​ຈາກ​ຫຼວງ​ພະ​ບາງ-ອຸ­ດົມ​ໄຊ-ໄຊ​ຍະ​ບູ​ລີ-ກາ­ສີ ແຂວງ​ວຽງ​ຈັນ-ຫຼວງ​ພະ​ບາງ ລວມ​ໄລ­ຍະ​ທາງ 780 ກິ­ໂລ­ແມັດ.

    ກ່ອນ​ເຂົ້າ​ຮ່ວມ​ການ​ແຂ່ງ­ຂັນ​ລາຍ­ການ​ດັ່ງ­ກ່າວ​ໃນ​ວັນ​ທີ 18 ພຶດ­ສະ­ພາ 2019 ຢູ່​ໂຮງ­ແຮມ​ຢູ​ດີ ໄດ້​ມີ​ພິ­ທີ​ມອບ​ຊຸດ​ແຂ່ງ­ຂັນ​ກີ­ລາ​ລົດ­ຖີບ ແລະ ເງິນ​ຈຳ­ນວນ​ໜຶ່ງ​ລວມ​ມູນ​ຄ່າ 5 ລ້ານ​ກີບ​ໃຫ້​ກັບ 2 ນັກ­ກີ­ລາ ກ່າວ​ມອບ​ໂດຍ​ທ່ານ ສຸກ​ສາ­ຄອນ ໃສ​ທິ​ລາດ ປະ­ທານ​ບໍ­ລິ­ສັດ ໃສ​ທິ​ລາດ​ກຣຸບ ທັງ​ເປັນ​ປະ­ທານ​ສະ­ຫະ­ພັນ​ລົດ­ຖີບ​ນະ­ຄອນ­ຫຼວງ​ວຽງ​ຈັນ ແລະ ຮອງ​ປະ­ທານ​ສະ­ຫະ­ພັນ​ລົດ­ຖີບ​ແຫ່ງ​ຊາດ.

    ການ​ແຂ່ງ­ຂັນ​ຄັ້ງ​ນີ້​ເປັນ​ງານ​ແຂ່ງ­ຂັນ​ສູ້​ກັບ​ຕົວ​ເອງ ເພາະ​ກຳ­ນົດ​ເວ­ລາ Cut off ແມ່ນ 120 ຊົ່ວ­ໂມງ ຫຼື 5 ວັນ ຜູ້​ທີ່​ຊະ­ນະ​ການ​ແຂ່ງ­ຂັນ​ຕ້ອງ​ໃຊ້​ເວ­ລາ​ໜ້ອຍ​ກວ່າ​ຄົນ​ອື່ນ ແລະ ຕ້ອງ​ຊ່ວຍ­ເຫຼືອ​ຕົວ​ເອງ​ລະ­ຫວ່າງ​ການ​ແຂ່ງ­ຂັນ ຫ້າມ​ບໍ່​ໃຫ້​ມີ​ການ​ເຊີ​ວິດ ຫຼື ການ​ຊ່ວຍ­ເຫຼືອ​ຄົນ​ອື່ນ ມີ​ນັກ​ແຂ່ງ​ຈາກ​ທົ່ວ​ໂລກ ເຂົ້າ​ຮ່ວມ​ການ​ແຂ່ງ­ຂັນ ເຊິ່ງ​ປະ­ເທດ​ເຮົາ​ຈັດ​ເປັນ​ສະ­ໜາມ​ທີ 3 ຂອງ​ປີ 2019 ແລະ ທີມ Top Cycle ລາວ​ເຮົາ ໄດ້​ສົ່ງ​ນັກ­ກີ­ລາ​ສອງ​ຄົນ​ເຂົ້າ​ຮ່ວມ ເຊິ່ງ​ຈະ​ແຂ່ງ​ໃນ​ນາມ​ທີມ​ຂອງ​ບໍ­ລິ­ສັດ ໃສ​ທິ​ລາດ​ກຣຸບ ເປັນ​ຜູ້​ສະ­ໜັບ­ສະ­ໜູນ​ເຂົ້າ​ຮ່ວມ​ໃນ​ການ​ແຂ່ງ­ຂັນ​ຄັ້ງ​ນີ້.

ຂ່າວທີ່ກ່ຽວຂ້ອງ