ຂ່າວຫຼ້າສຸດ

IRGC ກຽມພ້ອມ​ໃນ​ການ​ຕ້ານ​ກັບ​ໄພ​ຄຸກ​ຄາມ​ຈາກ​ພາຍ​ນອກ

962 21 ພ.ພ. 2019 ຂ່າວຕ່າງປະເທດ
IRGC ກຽມພ້ອມ​ໃນ​ການ​ຕ້ານ​ກັບ​ໄພ​ຄຸກ​ຄາມ​ຈາກ​ພາຍ​ນອກ

    ພົນ​ຈັດຕະວາ ​ຮົສ​ເຊ​ອິນ ຊາ​ລາ​ມີ ຜູ້​ບັນຊາ​ການ​ກອງ​ກຳລັງ​ທະຫານ​ປ້ອງ​ກັນ ການ​ປະຕິວັດ​ອິດ​ສະ​ລາມ ອີ​ຣານ (IRGC) ກ່າວ​ເມື່ອ​ວັນ​ທີ 19 ພຶດສະພາ​ນີ້​ວ່າ ອີ​ຣານ​ມີ​ຄວາມ​ພ້ອມ ໃນ​ການ​ຕ້ານ​ກັບ​ໄພ​ຄຸກ​ຄາມ​ຂອງ​ສົງຄາມ​ຈາກ ອາ​ເມ​ຣິ​ກາ.

    ໂທລະພາບ​ແຫ່ງ​ລັດ​ອີ​ຣານ ອ້າງ​ຕາມ​ຄຳ​ເວົ້າ​ຂອງ​ພົນ​ຈັດຕະວາ ຊາ​ລາ​ມີ ຊີ້​ແຈງ​ວ່າ ອີ​ຣານ ພວມ​ປະ​ເຊີນ​ກັບ​ໄພ​ຄຸກ​ຄາມ​ຢູ່​ຕິດ​ກັບ​ດິນແດນ​ຂອງ​ປະເທດ ແລະ ​ວ່າ IRGC ມີ​ຄວາມ​ພ້ອມ​ແລ້ວ ໃນ​ດ້ານ​ແຫຼ່ງ​ກຳລັງ ເພື່ອ​ຕ້ານ​ກັບ​ໄພ​ຄຸກ​ຄາມ​ດັ່ງກ່າວ. ໃນ​ຂະນະ​ດຽວ​ກັນ ພົນ​ຈັດຕະວາ ຊາ​ລາ​ມີ ກໍ​ກ່າວ​ເນັ້ນ​ວ່າ ອີ​ຣານ ບໍ່​ເດີນ​ຕາມ​ສົງຄາມ ແລະ​ກໍ​ບໍ່​ຢ້ານ​ກົວ​ສົງຄາມ.

    ກ່ອນ​ໜ້າ​ນັ້ນ ພົນ​ຈັດຕະວາ ຊາ​ລາ​ມີ ໄດ້​ໃຫ້​ສັນຍາ​ອອກ​ມາ​ເມື່ອ​ວັນ​ທີ 16 ພຶດສະພາ​ນີ້​ວ່າ ຈະ​ຕ້ານ​ກັບ​ຄວາມ​ກົດ​ດັນ​ຈາກ ສ ອາ​ເມ​ຣິ​ກາ ແລະ​ ໃຫ້​ທັດສະນະ​ວ່າ ສ ອາ​ເມ​ຣິ​ກາ ຈະ​ປະ​ລາ​ໄຊ ໃນ​ເລື່ອງ​ນີ້.

   ທາງ​ດ້ານ​ປະທານາທິບໍດີ ສ ອາ​ເມ​ຣິ​ກາ ໂດ​ນາ​​ລ ທຣຳ ໄດ້​ມີ​ຄຳ​ຂູ່​ອອກ​ມາ​ໃນ​ວັນ​ທີ 19 ພຶດສະພາ​ນີ້​ວ່າ​ຈະ​ດັບ​ສູນ​ອີ​ຣານ ເປັນ​ການ​ເຮັດ​ໃຫ້​ເພີ່ມ​ທະວີ​ຄວາມ​ກັງວົນ ກ່ຽວ​ກັບ​ຄວາມ​ເປັນ​ໄປ​ໄດ້ ທີ່​ຈະ​ເກີດ​ການ​ພິພາດ​ລະຫວ່າງ​ສອງ​ປະເທດ ທ່າມກາງ​ຄວາມ​ເຄັ່ງ​ຕຶງ ລະຫວ່າງ ສ ອາ​ເມ​ຣິ​ກາ ກັບ​ອີ​ຣານ ນັບ​ມື້​ນັບ​ເພີ່ມ​ຂຶ້ນ. ປະທານາທິບໍດີ ທຣຳ ລົງ​ພິມ​ຂໍ້ຄວາມ ຢູ່​ໃນ​ສື່​ສັງຄົມ Twitter ວ່າ “ຖ້າ​ຫາ​ກວ່າ​ອີ​ຣານ​ຢາກ​ເຂົ້າ​ຮ່ວມ​ການ​ສູ້​ຮົບ ນັ້ນ​ກໍ​ຈະ​ເປັນ​ການ​ຢຸດຕິ​ຢ່າງ​ເປັນ​ທາງ​ການ​ຂອງ​ອີ​ຣານ.” ພ້ອມ​ກັນ​ນັ້ນ ປະທານາທິບໍດີ ທຣຳ ກໍ​ແຈ້ງ​ເຕືອນ​ໄປ​ຍັງ​ອີ​ຣານ​ວ່າ “ຢ່າ​ຂູ່ ສ ອາ​ເມ​ຣິ​ກາ ອີກ​ຈັກ​ເທື່ອ”.

ຂ່າວທີ່ກ່ຽວຂ້ອງ