ເວ​ເນ​ຊູ​ເອ​ລາ ກ່າວ​ປະນາມ​ນະໂຍບາຍ​ເປັນ​ປໍ​ລະ​ປັກ​ຂອງ ສ ອາ​ເມ​ຣິ​ກາ

925 21 ພ.ພ. 2019 ຂ່າວຕ່າງປະເທດ
ເວ​ເນ​ຊູ​ເອ​ລາ ກ່າວ​ປະນາມ​ນະໂຍບາຍ​ເປັນ​ປໍ​ລະ​ປັກ​ຂອງ ສ ອາ​ເມ​ຣິ​ກາ

    ທ່ານ ມາ​ນູ​ແອ​​ລ ເກ​ເວ​ໂດ ລັດຖະມົນຕີ​ນ້ຳມັນ-ແກ​​ັສ ຂອງ​ເວ​ເນ​ຊູ​ເອ​ລາ ກ່າວ​ຢູ່​ໃນ​ກອງ​ປະຊຸມ​ຂອງ​ອົງການ​ບັນດາ​ປະເທດ​ຜູ້​ສົ່ງ​ອອກ​ນ້ຳມັນ (OPEC) ຊຶ່ງ​ຈັດ​ຂຶ້ນ​ທີ່​ອາ​ຣາ​ບີ ຊາ​ອຸ​ດິດ ເມື່ອ​ວັນ​ທີ 19 ພຶດສະພາ​ນີ້ ໂດຍ​ໄດ້​ກ່າວ​ປະນາມ​ວ່າ​ລັດຖະບານ ສ ອາ​ເມ​ຣິ​ກາ ພວມ​ປະຕິບັດ​ນະໂຍບາຍ​ປິດ​ລ້ອມ ທັງ​ທາງ​ດ້ານ​ເສດຖະກິດ ແລະ​ການ​ເງິນ ຕໍ່​ພື້ນຖານ​ເສດຖະກິດ ເວົ້າ​ລວມ ແລະ ​ເວົ້າ​ສະເພາະ​ກໍ​ແມ່ນ​ຕໍ່​ອຸດສາຫະກຳ​ນ້ຳມັນ-ແກ​​ັສ ຂອງ​ເວ​ເນ​ຊູ​ເອ​ລາ.

    ຂ່າວ​ໃຫ້​ຮູ້​ວ່າ ໃນ​ເວລາ​ນີ້ ມີ​ບາງ​ແຫຼ່ງ​ຂ່າວ​ໃຫ້​ຮູ້​ວ່າ ສະພາບ​ຂາດແຄນ​ນ້ຳມັນ ໄດ້​ເລີ່ມ ເປັນ​ຜົນ​ກະທົບ​ຕໍ່​ຕະຫຼາດ​ພາຍ​ໃນ​ຂອງ​ເວ​ເນ​ຊູ​ເອ​ລາ ຊຶ່ງ​ໃນ​ເມື່ອ​ກ່ອນ​ເຄີຍ​ເປັນ​ບ່ອນ​ທີ່​ລື​ຊື່ວ່າ​ມີ ລາຄາ​ນ້ຳມັນ​ຖືກ​ທີ່​ສຸດ​ໃນ​ໂລກ​ນັ້ນ.

    ໃນ​ວັນ​ດຽວ​ກັນ ທ່ານ ເຟຣດ​ດີ ເບີ​ນານ ປະທານ​ຄະນະ​ກຳມະການ​ສະໜອງ ແລະ ​ການ​ຜະລິດ ໃນ​ທ້ອງຖິ່ນ (CLAP) ຂອງ​ເວ​ເນ​ຊູ​ເອ​ລາ ແຈ້ງ​ໃຫ້​ຮູ້​ວ່າ ເມື່ອ​ບໍ່​ດົນ​ມາ​ນີ້ ສ ອາ​ເມ​ຣິ​ກາ ໄດ້​ປັບ​ໃໝ​ກຳປັ່ນ​ແຊ່​ແຂງ ຈຳນວນ 10-12 ລຳ ທີ່​ບັນທຸກ​ສະບຽງ​ອາຫານ​ໄປ​ໃຫ້​ເວ​ເນ​ຊູ​ເອ​ລາ ສົ່ງ​ຜົນ​ໃຫ້ການ​ສົ່ງ​ສິນຄ້າ​ທີ່​ຈຳເປັນ​ດັ່ງກ່າວ ໄປ​ຍັງ​ເວ​ເນ​ຊູ​ເອ​ລາ ຊັກ​ຊ້າ​ໄປ​ເປັນ​ເວລາ 2 ເດືອນ ເມື່ອ​ທຽບໃສ່​ທີ່​ໄດ້​ຄາດ​ຄະເນ​ເອົາ​ໄວ້ ເປັນ​ການ​ຄວບ​ຄູ່​ກັບ​ຄວາມ​ເສຍ​ຫາຍ​ໃນ​ດ້ານ​ເສດຖະກິດ ຊຶ່ງ​ບັນດາ​ວິ​ສາ​ຫະ​ກິດ ຕ້ອງ​ໄດ້​ແບກ​ຫາບ.

    ທ່ານ ເບີ​ນານ ເວົ້າ​ວ່າ ການ​ກະທຳ​ດັ່ງກ່າວ​ຂອງ ສ ອາ​ເມ​ຣິ​ກາ ໄດ້​ເປັນ​ຜົນ​ກະທົບ​ຮ້າຍ​ແຮງ ຕໍ່​ການ​ດຳລົງ​ຊີວິດ​ປະຈຳ​ວັນ​ຂອງ​ປະຊາຊົນ​ເວ​ເນ​ຊູ​ເອ​ລາ ຊຶ່ງ​ປັດຈຸບັນ​ນີ້ CLAP ຍັງ​ຄົງ​ຕ້ອງ​ອູດ​ໜູນ ລາຄາ ໃຫ້​ແກ່​ປະຊາຊົນ​ເວ​ເນ​ຊູ​ເອ​ລາ ຈຳນວນ​ຫຼາຍ​ລ້ານ​ຄອບຄົວ.

ຂ່າວທີ່ກ່ຽວຂ້ອງ