ຂ່າວຫຼ້າສຸດ

ສິງກະໂປ ນູ​ແວນ ເຊ​ລັງ ແລະ ຊີ​ເລ ສ້າງ​ການ​ພົວພັນ​ຄູ່​ຮ່ວມ​ທາງ​ດ້ານ​ເສດຖະກິດ​ດີ​ຈີ​ຕາ​​ລ

854 21 ພ.ພ. 2019 ຂ່າວຕ່າງປະເທດ
ສິງກະໂປ ນູ​ແວນ ເຊ​ລັງ ແລະ ຊີ​ເລ ສ້າງ​ການ​ພົວພັນ​ຄູ່​ຮ່ວມ​ທາງ​ດ້ານ​ເສດຖະກິດ​ດີ​ຈີ​ຕາ​​ລ

    ເຈົ້າ​ໜ້າທີ່​ຮັບຜິດຊອບ​ວຽກ​ງານ​ການ​ຄ້າ​ຂອງ ສິງກະໂປ ນູ​ແວນ ເຊ​ລັງ ແລະ ຊີ​ເລ ໄດ້​ຮ່ວມ​ກັນ​ອອກ​ຖະແຫຼງການ ເມື່ອ​ວັນ​ທີ 18 ພຶດສະພາ​ນີ້ ກ່ຽວ​ກັບ​ການ​ເປີດ​ການ​ເຈລະຈາ  ແລະ ຄາດ​ວ່າ​ຫຼັງ​ເວລາ​ໜຶ່ງ​ປີ​ຈະ​ສຳເລັດ​ສັນຍາ​ການ​ສ້າງຕັ້ງ ການ​ພົວພັນ​ຄູ່​ຮ່ວມ​ທາງ​ດ້ານ​ເສດຖະກິດ​ດີ​ຈີ​ຕາ​​ລ ແບບ​ສາມ​ຝ່າຍ (DEPA). ເຫດການ​ດັ່ງກ່າວ​ມີ​ຂຶ້ນ​ຢູ່​ໃນ​ເຫດການ​ໜຶ່ງ ທີ່​ຈັດ​ຂຶ້ນ​ຢູ່​ນອກ​ກອງ​ປະຊຸມ​ລັດຖະມົນຕີ​ການ​ຄ້າ ຂອງ​ເວທີ​ປາ​ໄສ​ການ​ຮ່ວມ​ມື​ເສ​ດະ​ກິດ ອາຊີ-ປາ​ຊີ​ຟິກ (APEC) ທີ່​ພວມ​ດຳເນີນ​ຢູ່​ໃນ​ປະເທດ​ຊີ​ເລ.

   ຂ່າວ​ແຈ້ງວ່າ ສິງກະໂປ​ເປັນ​ປະເທດ​ທີ່​ນຳ​ສະເໜີ​ສ້າງຕັ້ງ DEPA ໂດຍ​ຈະ​ເປັນ​ສັນຍາ​ສາກົນ​ສະບັບ​ທຳ​ອິດ​ໃນ​ໂລກ ກ່ຽວ​ກັບ​ການ​ຮ່ວມ​ມື​ດ້ານ​ເສດຖະກິດ​ດີ​ຈີ​ຕາ​​ລ. ເນື້ອ​ໃນ​ຂອງ​ສັນຍາ​ນັ້ນ​ປະກອບ​ດ້ວຍ​ບັນດາ​ຂົງເຂດ​ທີ່​ສຳຄັນ ເຊັ່ນ ໃບຮັບ​ເງິນ​ເອ​ເລັກ​ໂຕຣ​ນິກ ການ​ຊຳລະ​ເອ​ເລັກ​ໂຕຣ​ນິກ   ການ​ຢັ້ງຢືນ​ຊະ​ຕາ​ກຳ ແລະ ຕິດຕາມ​ກວດກາ​ທັກ​ສະ​ຂອງ​ຄົນ​ງານ ດັ່ງນີ້​ເປັນຕົ້ນ. ນອກຈາກ​ນັ້ນແລ້ວ ປະເທດ​ຕ່າງໆ​ຍັງ​ສາມາດ​ຮັບຮອງ DEPA ເພື່ອ​ກໍ່ສ້າງ​ບັນດາ​ມາດຖານ​ທີ່​ກ່ຽວຂ້ອງ ຊ່ວຍເຫຼືອ​ວິ​ສາ​ຫະ​ກິດ​ຂະໜາດ​ກາງ ແລະ​ນ້ອຍ​ຂອງ​ຕົນ ເພື່ອ​ຫັນປ່ຽນ​ໄປ​ສູ່​ຮູບ​ການ​ຫັນ​ເປັນ​ດີ​ຈີ​ຕາ​​ລ ແລະ ຫັນ​ເປັນ​ສາກົນ.

    ເຈົ້າ​ໜ້າທີ່​ດ້ານ​ການ​ຄ້າ​ຂອງ​ສິງກະໂປ ນູ​ແວນ ເຊ​ລັງ ແລະ​ ຊີ​ເລ ເນັ້ນ​ໜັກ​ຢູ່​ໃນ​ຖະແຫຼງການ​ຂອງ​ຕົນ​ວ່າ ທັງ​ສາມ​ປະເທດ​ຕ່າງ​ກໍ​ເປັນ​ພື້ນຖານ​ເສດຖະກິດ​ຂະໜາດ​ນ້ອຍ ຂຶ້ນ​ກັບ​ສິ່ງແວດລ້ອມ​ພາຍ​ນອກ. ດັ່ງນັ້ນ​ຝ່າຍ​ຕ່າງໆ​ຈຶ່ງ​ມີ​ເປົ້າ​ໝາຍ​ລວມ​ກັນ ໃນ​ການ​ເພີ່ມ​ທະວີ​ຊຸກຍູ້​ການເຄື່ອນໄຫວ​ດ້ານ​ການ​ຄ້າ ໃນ​ຍຸກ​ເຕັກ​ໂນ​ໂລ​ຊີ​ດີ​ຈີ​ຕາ​​ລ ເພື່ອ​ໃຫ້​ບັນດາ​ວິ​ສາ​ຫະ​ກິດ ຜູ້​ບໍລິໂພກ ສາມາດ​ກຳ​ກາລະ​ໂອກາດ ກໍ​ຄື​ການ​ຂຸດ​ຄົ້ນ​ຄວາມ​ສາມາດ​ບົ່ມ​ຊ້ອນ​ທີ່​ບໍ່​ມີ​ເຂດ​ກຳນົດ ຂອງ​ພື້ນຖານ​ເສດຖະກິດ​ດີ​ຈີ​ຕາ​​ລ.

ຂ່າວທີ່ກ່ຽວຂ້ອງ