ຂ່າວຫຼ້າສຸດ

ບາ​ເຣນ ຮຽກຮ້ອງ​ພົນລະເມືອງ​ຂອງ​ຕົນ​ໃຫ້​ອອກ​ໄປ​ຈາກ​ອີ​ຣານ ແລະ ອີ​ຣັກ

814 21 ພ.ພ. 2019 ຂ່າວຕ່າງປະເທດ
ບາ​ເຣນ ຮຽກຮ້ອງ​ພົນລະເມືອງ​ຂອງ​ຕົນ​ໃຫ້​ອອກ​ໄປ​ຈາກ​ອີ​ຣານ ແລະ ອີ​ຣັກ

   ຕາມ​ຂ່າວ​ຕ່າງປະເທດ ວັນ​ທີ 18 ພຶດສະພາ​ນີ້ ທາງ​ການ​ບາ​ເຣນ ໄດ້​ແຈ້ງ​ເຕືອນ​ໄປ​ຍັງ​ພົນລະເມືອງ​ຂອງ​ຕົນ ໃຫ້​ຫຼີກ​ລຽງ​ການ​ເດີນທາງ​ໄປ​ຍັງ​ອີ​ຣານ ແລະ​ ອີ​ຣັກ ພ້ອມ​ກັນ​ນັ້ນ​ກໍ​ແຈ້ງ​ເຕືອນ​ໄປ​ຍັງ​ພົນລະເມືອງ​ຂອງ​ຕົນ ທີ່​ພວມ​ຢູ່​ໃນ​ສອງ​ປະເທດ​ດັ່ງກ່າວ  ໃຫ້​ກັບ​ຄືນ​ປະເທດ “ໂດຍ​ທັນທີ” ເພື່ອ​ຮັບປະກັນ​ຄວາມ​ປອດ​ໄພ.

    ສຳນັກ​ຂ່າວສານ​ແຫ່ງ​ລັດ​ປາ​ເຣນ (BNA) ໃຫ້​ຮູ້​ວ່າ ກະຊວງ​ການ​ຕ່າງປະເທດ​ບາ​ເຣນ ມີ​ຄຳ​ແຈ້ງ​ເຕືອນ​ດັ່ງກ່າວ​ອອກ​ມາ ໂດຍ​ມີ​ຂໍ້​ອ້າງ​ເຖິງ​ໄພ​ຄຸກ​ຄາມ​ທີ່​ບົ່ມ​ຊ້ອນ​ຫຼາຍຕະຫຼອດ​ຮອດ​ສະພາບ​ການ​ຜັນ​ແປ​ທີ່​ອັນຕະລາຍ ແລະ​ ສະພາບ​ຄວາມ​ບໍ່​ສະຫງົບ​ຢູ່​ໃນ​ພາກ​ພື້ນ.

    ຄຳ​ແຈ້ງ​ເຕືອນ​ດັ່ງກ່າວ ມີ​ອອກ​ມາ​ທ່າມກາງ​ທີ່​ຄວາມ​ເຄັ່ງ​ຕຶງ ລະຫວ່າງ ສ ອາ​ເມ​ຣິ​ກາ ກັບ​ອີ​ຣານ ເພີ່ມ​ທະວີ​ຂຶ້ນ. ເມື່ອ​ວັນ​ທີ 15 ພຶດສະພາ​ທີ່​ຜ່ານ​ມາ ສ ອາ​ເມ​ຣິ​ກາ ໄດ້​ຖອນ​ບັນດາ​ເຈົ້າ​ໜ້າທີ່​ລັດຖະບານ ທີ່​ບໍ່​ເຮັດ​ໜ້າທີ່​ສຸກ​ເສີນ ຢູ່​ໃນ​ສະຖານທູດ ສ ອາ​ເມ​ຣິ​ກາ ໃນ​ນະຄອນຫຼວງ​ແບກ​ແດດ ຂອງ​ອີ​ຣັກ ແລະ​ສະຖານກົງສູນ ຢູ່​ໃນ ເອີ​ບີ​​ລ ກັບ​ຄືນ​ປະເທດ ຍ້ອນ​ກັງວົນ​ໃນ​ອັນ​ທີ່ ສ ອາ​ເມ​ຣິ​ກາ ເອີ້ນ​ວ່າ “ໄພ​ຄຸກ​ຄາມ​ຈາກ​ອີ​ຣານ”. ໃນ​ວັນ​ດຽວ​ກັນ ກຸ່ມ​ບໍລິສັດ Exxon ກໍ​ໄດ້​ອົບ​ພະ​ຍົບ​ຄົນ​ງານ​ທີ່​ເປັນ​ຊາວ​ຕ່າງປະເທດ ຂອງ​ກຸ່ມ​ບໍລິສັດ​ນີ້ ອອກ​ໄປ​ຈາກ​ເຂດ​ຂຸດ​ຄົ້ນ​ນ້ຳມັນ​ຢູ່​ໃນ​ອີ​ຣັກ.

 

ຂ່າວທີ່ກ່ຽວຂ້ອງ