ຂ່າວຫຼ້າສຸດ

ກຳປູເຈຍ ກະກຽມ​ຫີບ​ບັດ​ໃຫ້​ແກ່​ການ​ເລືອກ​ຕັ້ງ​ສະພາ​ຂັ້ນ​ທ້ອງຖິ່ນ

645 21 ພ.ພ. 2019 ຂ່າວຕ່າງປະເທດ
 ກຳປູເຈຍ ກະກຽມ​ຫີບ​ບັດ​ໃຫ້​ແກ່​ການ​ເລືອກ​ຕັ້ງ​ສະພາ​ຂັ້ນ​ທ້ອງຖິ່ນ

    ທ່ານ ຮັງ ພຸດ​ເທ ໂຄສົກ​ຂອງ​ຄະນະ​ກຳມະການ​ການ​ເລືອກ​ຕັ້ງ​ແຫ່ງ​ຊາດ​ກຳປູເຈຍ (NEC) ແຈ້ງ​ໃຫ້​ຮູ້ເມື່ອ​ວັນ​ທີ 19 ພຶດສະພາ​ນີ້​ວ່າ ຈະ​ມີ​ຫີບ​ບັດ​ປະມານ 50.000 ໜ່ວຍ ຖືກ​ນຳ​ໃຊ້​ໃຫ້​ແກ່​ການ​ການ​ເລືອກ​ຕັ້ງ​ສະພາ​ຂັ້ນ​ນະຄອນຫຼວງ ແຂວງ ນະຄອນ ເມືອງ ຊຸດ​ທີ III ຢູ່​ໃນ​ກຳປູເຈຍ ທີ່​ຈະ​ມີ​ຂຶ້ນ​ໃນ​ວັນ​ທີ 26 ພຶດສະພາ​ນີ້. ລວມ​ແລ້ວ​ມີ​ສະຖານທີ່​ເລືອກ​ຕັ້ງ 228 ຈຸດ ທີ່​ຈະ​ໄດ້​ເປີດ​ໃຫ້​ແກ່​ການ​ເລືອກ​ຕັ້ງ​ດັ່ງກ່າວ.

    NEC ໃຫ້​ຮູ້​ວ່າ ບັດ​ເລືອກ​ຕັ້ງ​ໄດ້​ຮັບ​ການ​ພິມ​ຢູ່​ໃນ​ນະຄອນຫຼວງ​ພະນົມ​ເປັນ ໂດຍ​ຈັດ​ເປັນ​ຫົວ ແລະ​ຈະ​ຖືກ​ສົ່ງ​ໄປ​ຍັງ​ທ້ອງຖິ່ນ​ຕ່າງໆ ຫຼັງ​ວັນ​ທີ 19 ພຶດສະພາ ແລະ​ຊ້າ​ສຸດ​ກໍ​ແມ່ນ ໄປ​ຮອດ​ສະຖານທີ່​ເລືອກ​ຕັ້ງ​ແຫ່ງ​ຕ່າງໆ​ໃນ​ທົ່ວ​ປະເທດ ພາຍ​ໃນ​ວັນ​ທີ 25 ພຶດສະພາ. ສ່ວນ​ການ​ໂຄສະນາ​ຫາ​ສຽງ​ເລືອກ​ຕັ້ງ​ຂອງ​ພັກ​ຕ່າງໆ ແມ່ນ​ດຳເນີນ​ໄປ​ແຕ່​ວັນ​ທີ 17-24 ພຶດສະພາ.

    ຂ່າວ​ແຈ້ງວ່າ ໃນ​ການ​ເລືອກ​ຕັ້ງ​ເທື່ອ​ນີ້ ມີ 7 ພັກ​ການເມືອງ ເຂົ້າ​ຮ່ວມ​ແຂ່ງຂັນ​ຊີງ​ໄຊ ເພື່ອ​ຍາດ​ເອົາ 559 ທີ່​ນັ່ງ​ໃນ​ສະພາ​ຂັ້ນ​ນະຄອນຫຼວງ/ແຂວງ ແລະ 3.555 ທີ່​ນັ່ງ​ໃນ​ສະພາ​ຂັ້ນ ນະຄອນ/ເມືອງ ໃນ​ທົ່ວ​ປະເທດ​ກຳປູເຈຍ.

ຂ່າວທີ່ກ່ຽວຂ້ອງ