ຂ່າວຫຼ້າສຸດ

ຜູ້ຍິງກັບສິ່ງແວດລ້ອມ

2.810 20 ພ.ພ. 2019 ນານາສາລະ

    ສັງ­ຄົມ​ໂລກ​ດຽວ­ນີ້ ຜູ້­ຍິງ​ໄດ້​ສະ­ແດງ​ບົດ­ບາດ​ສູງ​ໃນ​ສັງ­ຄົມ ເສດ­ຖະ­ກິດ-ການ­ເມືອງ ດັ່ງ​ທີ່​ເປັນ​ຂ່າວ​ບາງ​ປະ­ເທດ​ມີ​ນາ­ຍົກ ຫຼື ປະ­ທານ​ປະ­ເທດ ປະ­ທານ​ສະ­ພາ​ເປັນ​ຜູ້­ຍິງ ສຳ­ລັບ​ບ້ານ​ເຮົາ​ແມ່­ຍິງ​ໄດ້​ມີ​ບົດ­ບາດ​ຄຽງ​ຄູ່​ກັບ​ຜູ້​ຊາຍ​ມາ​ຍາວ​ນານ ເຊັ່ນ: ເລື່ອງ​ເຂົ້າ​ວັດ​ວາ ແລະ ຮັກ­ສາ​ຮີດ­ຄອງ​ປະ­ເພ­ນີ ຜູ້­ຍິງ​ຍັງ​ມີ​ບົດ­ບາດ​ເລື່ອງ​ການ​ຮັກ­ສາ ເຊີດ​ຊູ ສິ­ລະ​ປະ​ວັດ­ທະ­ນະ­ທຳ ທີ່​ສະ­ແດງ​ອອກ​ໃນ​ຜືນ​ຜ້າ ເຊັ່ນ: ການ​ຕ່ຳ­ຫູກ​ທໍ​ໄໝ ແສ່ວ​ລາຍ ຂາຍ​ຜ້າ ສົມ​ກັບ​ຄຳ​ຍ້ອງ­ຍໍ​ຄົນ​ລາວ​ບູ­ຮານ​ວ່າ ຜູ້­ຍິງ​ລາວ​ຂວ້ຳ​ມື​ເປັນ​ລາຍ ຫງາຍ​ມື​ເປັນ​ດອກ !.

    ໄລ­ຍະ​ບໍ່​ດົນ​ມາ​ນີ້ ທາງ​ສູນ​ກາງ​ສະ­ຫະ­ພັນ​ແມ່­ຍິງ​ລາວ ກໍ​ໄດ້​ວາງ​ນະ­ໂຍ­ບາຍ​ປົກ​ປັກ​ຮັກ­ສາ​ສິ່ງ­ແວ­ດລ້ອມ ສົກ​ປີ 2018-2019 ກົມ​ຂ່າວ­ສານ​ແມ່­ຍິງ​ລາວ ສູນ​ກາງ​ສະ­ຫະ­ພັນ​ແມ່­ຍິງ​ລາວ ໄດ້​ຈັດ​ຫົວ­ຂໍ້​ແຂ່ງ­ຂັນ​ເລື່ອງ: ຄືນ​ຊີ­ວິດ​ສູ່​ທຳ​ມະ​ຊາດ ໂຄງ­ການ​ດັ່ງ­ກ່າວ ກຳ­ລັງ​ຈັດ​ຕັ້ງ​ປະ­ຕິ­ບັດ​ຢູ່​ແຂວງ​ບໍ່​ແກ້ວ ແລະ ອຸ­ດົມ​ໄຊ (2018-2019) ມື້​ປະ­ກາດ​ຮັບ​ລາ­ງວັນ ທີ 7/5/2019 ຜ່ານ​ມາ ທ່ານ​ນາງ ທຸມ­ມາ​ລີ ວົງ​ພະ­ຈັນ ຮອງ​ປະ­ທານ​ຄະ­ນະ​ບໍ­ລິ­ຫານ​ງານ​ຂອງ​ສູນ​ກາງ​ສະ­ຫະ­ພັນ​ແມ່­ຍິງ​ລາວ ກໍ​ໄດ້​ກ່າວ​ເນັ້ນ​ຢ້ຳ​ເຖິງ​ນະ­ໂຍ­ບາຍ ແລະ ແຜນ­ການ ປົກ​ປັກ​ຮັກ­ສາ​ສິ່ງ­ແວ­ດລ້ອມ​ວ່າ: ໂຄງ­ການ​ດັ່ງ­ກ່າວ ເພື່ອ​ເປັນ​ການ​ປະ­ກອບ­ສ່ວນ​ໃນ​ການ­ຈັດ­ຕັ້ງ​ຜັນ​ຂະ­ຫຍາຍ ເປົ້າ​ໝາຍ​ການ​ພັດ­ທະ­ນາ​ແບບ​ຍືນ​ຍົງ​ຂອງ​ສາ­ກົນ ແລະ ຕອບ​ສະ­ໜອງ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ລັດ­ຖະ­ບານ (2016-2020) ປົກ​ປັກ​ຮັກ­ສາ​ສິ່ງ­ແວ­ດລ້ອມ ແລະ ນຳ​ໃຊ້​ຊັບ­ພະ­ຍາ­ກອນ​ທຳ​ມະ​ຊາດ​ໃຫ້​ຍືນ​ຍົງ (ຄັດ​ຈາກ​ບົດ​ປະ­ກອບ​ຄຳ​ເຫັນ ວັນ​ທີ 7/5/2019 ມື້​ປະ­ກາດ​ຮັບ​ລາ­ງວັນ).

    ຜົນ­ງານ ແລະ ນະ­ໂຍ­ບາຍ​ທີ່​ທາງ​ສູນ​ກາງ​ສະ­ຫະ­ພັນ​ແມ່­ຍິງ​ລາວ ໄດ້​ຈັດ​ຕັ້ງ​ປະ­ຕິ­ບັດ​ໃນ​ການ​ໂຄ­ສະ­ນາ​ຂົນ­ຂວາຍ​ໃຫ້​ປະ­ຊາ­ຊົນ​ທ້ອງ­ຖິ່ນ ແລະ ສັງ­ຄົມ​ລາວ ເຫັນ​ຄວາມ​ສຳ­ຄັນ​ຂອງ​ການ​ຮັກ­ສາ​ສິ່ງ­ແວ­ດລ້ອມ ແລະ ຫຼຸດ­ຜ່ອນ​ການ​ນຳ​ໃຊ້​ສານ​ເຄ​ມີ​ເຂົ້າ​ໃນ​ການ​ກະ­ເສດ ຖື​ໄດ້​ວ່າ​ເປັນ​ແຜນ​ງານ ແລະ ກິດ­ຈະ­ກຳ​ທີ່​ສັງ­ຄົມ​ໃຫ້​ຄວາມ​ສົນ­ໃຈ​ຢ່າງ​ສູງ ເຫັນ​ໄດ້​ຈາກ​ທາງ​ກົມ​ດັ່ງ­ກ່າວ​ຈັດ​ໂຄງ­ການ​ແຂ່ງ­ຂັນ ແຕ້ມ​ຮູບ ຂຽນ​ບົດ​ຄວາມ ບົດ​ກະ­ວີ ເພື່ອ​ປູກ​ຈິດ​ສຳ­ນຶກ​ໃຫ້​ສັງ­ຄົມ ເກີດ​ຈິດ​ສຳ­ນຶກ​ເຫັນ​ໄດ້​ຄວາມ​ສຳ­ຄັນ​ຂອງ​ສິ່ງ­ແວ­ດລ້ອມ​ຕໍ່​ການ​ດຳ­ລົງ​ຊີ­ວິດ.

    ສັງ​ລວມ​ໄດ້​ວ່າ ບົດ­ບາດ​ແມ່­ຍິງ​ລາວ ໂດຍ​ສະ­ເພາະ ສູນ​ກາງ​ສະ­ຫະ­ພັນ​ແມ່­ຍິງ​ລາວ ແມ່ນ​ຍ່າງ​ຖືກ​ຈຸດ​ເກົາ​ຖືກ​ບ່ອນ​ຄັນ​ຂອງ​ບັນ­ຫາ​ສັງ­ຄົມ ເຊິ່ງ​ມັນ​ໄດ້​ຮຽກ­ຮ້ອງ​ໃຫ້​ການ­ຈັດ­ຕັ້ງ​ກ່ຽວ­ຂ້ອງ​ຄວນ​ຕ້ອງ​ທຸ້ມ­ເທ​ຄວາມ​ຄິດ ແລະ ງົບ­ປະ­ມານ​ເພື່ອ​ສຸ­ຂະ­ພາບ​ຂອງ​ທຸກ​ຄົນ.

ດັ້ນກີບເມກ

ຂ່າວທີ່ກ່ຽວຂ້ອງ