ສ ອາ​ເມ​ຣິ​ກາ ຊຳ­ລະ​ເງິນ 8,52 ຕື້​ໂດ​ລາ ໃຫ້​ແກ່​ກະ­ສິ­ກອນ

727 20 ພ.ພ. 2019 ຂ່າວຕ່າງປະເທດ
ສ ອາ​ເມ​ຣິ​ກາ ຊຳ­ລະ​ເງິນ 8,52 ຕື້​ໂດ​ລາ ໃຫ້​ແກ່​ກະ­ສິ­ກອນ

    ໂຄສົກ​ກະຊວງ​ກະສິກຳ ສ ອາ​ເມ​ຣິ​ກາ (USDA) ແຈ້ງ​ໃຫ້​ຮູ້ເມື່ອ​ວັນ​ທີ 15 ພຶດສະພາ​ທີ່​ຜ່ານ​ມາ​ວ່າ ອົງການ​ນີ້​ໄດ້​ຊຳລະ​ເງິນ​ໂດຍ​ກົງ 8,52 ຕື້​ໂດ​ລາ​ສະຫະລັດ ໃຫ້​ແກ່​ກະສິກອນ​ໃນ ສ ອາ​ເມ​ຣິ​ກາ ຄື​ກັບ​ວ່າ​ເປັນ​ສ່ວນ​ໜຶ່ງ​ຂອງ​ໂຄງການ​ຊ່ວຍເຫຼືອ​ໃນ​ປີ 2018 ຊຶ່ງ​ໄດ້​ວາງ​ອອກ​ມາ ເພື່ອ​ທົດ​ແທນ​ຄວາມ​ເສຍ​ຫາຍ ຍ້ອນ​ຜົນ​ກະທົບ​ຈາກ​ການ​ຂຶ້ນ​ພາສີ​ຂອງ​ຈີນ ແລະ​ບັນດາ​ຄູ່​ຮ່ວມ​ທາງ​ດ້ານ​ການ​ຄ້າ​ອື່ນໆ.

   ປະທານາທິບໍດີ ສ ອາ​ເມ​ຣິ​ກາ ໂດ​ນາ​​ລ ທຣຳ ໄດ້​ໃຫ້​ຄຳ​ໝັ້ນ​ສັນຍາ​ອອກ​ມາ ເມື່ອ​ວັນ​ທີ 24 ກໍລະກົດ ປີ 2018 ເຖິງ​ການ​ຈັດ​ສັນ​ບ້ວງ​ເງິນ​ຊ່ວຍເຫຼືອ 12 ຕື້​ໂດ​ລາ​ສະຫະລັດ ໃຫ້​ແກ່​ກະສິກອນ ທີ່​ໄດ້​ຮັບ ຜົນ​ກະທົບ​ຈາກ​ມາດ​ຕະການ​ຂຶ້ນ​ພາສີ​ຂອງ​ຈີນ ເພື່ອ​ເປັນ​ການ​ຕອບ​ໂຕ້​ຕໍ່ ສ ອາ​ເມ​ຣິ​ກາ ຫຼັງ​ຈາກ​ທີ່ ສ ອາ​ເມ​ຣິ​ກາ ຂຶ້ນ​ພາສີ​ກັບ​ສິນຄ້າ​ທີ່​ນຳ​ເຂົ້າ​ຈາກ​ຈີນ. ນີ້​ເປັນ​ການ​ດຳເນີນ​ການ​ທີ່​ສະແດງ​ໃຫ້​ເຫັນ​ເຖິງ​ການ​ຍອມຮັບ​ເປັນ​ເທື່ອ​ທຳ​ອິດ ຂອງ​ລັດຖະບານ ສ ອາ​ເມ​ຣິ​ກາ ກ່ຽວ​ກັບ​ນະໂຍບາຍ​ປົກ​ປ້ອງ​ການ​ຄ້າ ທີ່​ພວມ​ຄຸກ​ຄາມ​ຕໍ່​ປະຊາຊົນ ຢູ່​ພາຍ​ໃນ​ປະເທດ.

    ໂຄສົກ​ຂອງ USDA ໃຫ້​ຮູ້​ວ່າ ກະຊວງ​ນີ້​ໄດ້​ຊຳລະ​ໂດຍ​ກົງ ລວມ​ແລ້ວ​ເປັນ​ມູນ​ຄ່າ 8,52 ຕື້​ໂດ​ລາ​ສະຫະລັດ ຊຶ່ງ​ເປັນ​ສ່ວນ​ໜຶ່ງ​ຂອງ​ໂຄງການ​ຫຼຸດຜ່ອນ​ຄວາມ​ເສຍ​ຫາຍ​ດ້ານ​ການ​ຄ້າ​ໃຫ້​ໜ້ອຍ​ທີ່​ສຸດ ອັນ​ປະກອບ​ດ້ວຍ​ການ​ຊ່ວຍເຫຼືອ 1,2 ຕື້​ໂດ​ລາ​ສະຫະລັດ ໂດຍ​ຜ່ານ​ການ​ຊື້​ສິນຄ້າ ແລະ 200 ລ້ານ​ໂດ​ລາ​ສະຫະລັດ ທີ່​ໄດ້​ຈັດ​ແບ່ງ​ໃຫ້​ແກ່​ບັນດ​​າ​ຕະຫຼາດ​ຕ່າງປະເທດ​ທີ່​ພວມ​ພັດທະນາ.

   ໂຄສົກ​ດັ່ງກ່າວ​ເວົ້າ​ວ່າ ສິນຄ້າ 5 ລາຍການ​ທີ່​ເປັນ​ບຸລິມະສິດ  ທີ່​ໄດ້​ຮັບ​ຄວາມ​ຊ່ວຍເຫຼືອ ກໍ​ແມ່ນ ໝາກ​ຖົ່ວເຫຼືອງ ສາລີ ເຂົ້າ​ເບຼ ຝ້າຍ ແລະ ເຂົ້າ​ຜະລິດ​ເສັ້ນ​ລ້ອນ ໃນ​ຂະນະ​ທີ່​​ີ 5 ລັດ​ອັນ​ດັບ​ຕົ້ນໆ​ທີ່​ໄດ້​ຮັບ​ການ​ຊຳລະ​ກໍ​ແມ່ນ ອີ​ລີ​ນອຍ ໄອ​ໂອ​ວາ ແຄນ​ຊາ​​ສ ເນບ​ຣາ​​ສ​ກາ ແລະ ອິນ​ເດຍ​ນາ.

 

ຂ່າວທີ່ກ່ຽວຂ້ອງ