ເອ​ຢິບ ເປີດ​ຕົວ​ຂົວ​ແຂວນ​ຂ້າມ​ແມ່ນ້ຳ​ນິນ ທີ່​ກວ້າງ​ທີ່​ສຸດ​ໃນ​ໂລກ

742 20 ພ.ພ. 2019 ຂ່າວຕ່າງປະເທດ
ເອ​ຢິບ ເປີດ​ຕົວ​ຂົວ​ແຂວນ​ຂ້າມ​ແມ່ນ້ຳ​ນິນ ທີ່​ກວ້າງ​ທີ່​ສຸດ​ໃນ​ໂລກ

    ໂທລະພາບ​ຊ່ອງ Nile TV ລາຍ​ງານ​ວ່າ ເມື່ອ​ວັນ​ທີ 15 ພຶດສະພາ​ທີ່​ຜ່ານ​ມາ ລັດຖະບານ​ເອ​ຢິບ ໄດ້​ຈັດ​ພິທີ​ເປີດ​ໃຫ້​ລົດ​ແລ່ນ​ຜ່ານ​ຂົວ  Rod al-Farag Axis ຊຶ່ງ​ເປັນ​ຂົວ​ອູ່ (ຂົວ​ແຂວນ) ທີ່​ມີ​ຄວາມ​ກວ້າງ​ທີ່​ສຸດ​ໃນ​ໂລກ ໂດຍ​ມີ​ປະທານາທິບໍດີ​ເອ​ຢິບ ອັບ​ແດລ ຟາ​ຕາ ອາ​​ລ-ຊີ​ຊີ ພ້ອມ​ດ້ວຍ​ເຈົ້າ​ໜ້າທີ່​ລະດັບ​ສູງ​ຫຼາຍ​ທ່ານ​ເຂົ້າ​ຮ່ວມ.

    ທ່ານ ທາ​ລາ​​ລ ໂອ​ມາ ຜູ້ອຳນວຍການ​ສະຖິຕິ​ໂລກ Guinness ປະຈຳ​ພາກ​ພື້ນ​ຕາເວັນ​ອອກ​ກາງ ແລະ ອາ​ຟະ​ຣິກ​ກາ​ເໜືອ ເວົ້າ​ວ່າ ຂົວ Rod al-Farag Axis ຈະ​ໄດ້​ບັນທຶກ​ໄວ້​ໃນ​ປຶ້ມ​ສະຖິຕິ Guinness ວ່າ​ເປັນ​ຂົວ​ແຂວນ​ທີ່​ກວ້າງ​ທີ່​ສຸດ​ໃນ​ໂລກ ໂດຍ​ມີ​ຄວາມ​ກວ້າງ 64,7 ແມັດ. ຂົວ​ດັ່ງກ່າວ​ມີ​ຄວາມ​ຍາວ 16,7 ແມັດ ກ່າຍ​ຂ້າມ​ແມ່ນ້ຳ ນິນ (Nile) ເຊື່ອມ​ຕໍ່​ເຂດ​ທາງ​ທິດເໜືອ ແລະ ທິດຕາເວັນອອກ ກັບ​ທິດຕາເວັນຕົກ  ຂອງ​ນະຄອນຫຼວງ​ເລີ​ແກ. 

    ໂຄງການ​ກໍ່ສ້າງ​ຂົວ​ດັ່ງກ່າວ ດຳເນີນ​ການ​ໂດຍ​ອົງການ​ກໍ່ສ້າງ ທີ່​ຂຶ້ນ​ກັບ​ກອງ​ກຳລັງ​ປະກອບ​ອາວຸດ​ປະສົມ (AFEA) ສົມທົບ​ກັບ​ບໍລິສັດ​ພາຍ​ໃນ​ປະເທດ​ເອ​ຢິບ​ຈຳນວນ​ໜຶ່ງ. ເຈົ້າ​ໜ້າທີ່​ເອ​ຢິບ ໃຫ້​ຮູ້​ວ່າ ໂຄງການ​ນີ້​ໄດ້​ເຮັດ​ສຳເລັດ​ພາຍ​ໃນ​ເວລາ 2 ປີ ໂດຍ​ມີ​ວິ​ສາ​ວະ​ກອນ ພະນັກງານ​ເຕັກນິກ ແລະ​ກຳມະກອນ ເຂົ້າ​ຮ່ວມ​ປະມານ 4.000 ຄົນ. ປະທານ​ຂອງ AFEA ເວົ້າ​ວ່າ ຄ່າ​ໃຊ້​ຈ່າຍ ໃຫ້​ແກ່​ໂຄງການ​ກໍ່ສ້າງ​ຂົວ​ແຂວນ​ດັ່ງກ່າວ​ຢູ່​ທີ່ 170 ຕື້​ປອນ​ເອ​ຢິບ (ເທົ່າ​ກັບ 9,94 ຕື້​ໂດ​ລາ​ສະຫະລັດ) ແຕ່​ຖ້າ​ຫາ​ກວ່າ​ໂຄງການ​ນັ້ນ ຜັນ​ຂະຫຍາຍ​ໃນ​ໄລຍະ​ເວລາ​ນີ້ ກໍ​ຈະ​ເຮັດ​ໃຫ້​ຄ່າ​ໃຊ້​ຈ່າຍ ຕົກ​ເປັນ​ທີ່​ປະມານ 23 ຕື້​ໂດ​ລາ​ສະຫະລັດ ຍ້ອນ​ວ່າ​ຄ່າ​ຂອງ ເງິນ​ປອນ​ເອ​ຢິບ ມີ​ການ​ເໜັງ​ຕີງ.

ຂ່າວທີ່ກ່ຽວຂ້ອງ