ຣັດ​ເຊຍ ຈະ​ຈັດ​ສັນ​ງົບປະມານ​ຊ່ວຍເຫຼືອ​ການ​ພັດທະນາ​ຂະແໜງ​ກະສິກຳ

342 20 ພ.ພ. 2019 ຂ່າວຕ່າງປະເທດ
ຣັດ​ເຊຍ ຈະ​ຈັດ​ສັນ​ງົບປະມານ​ຊ່ວຍເຫຼືອ​ການ​ພັດທະນາ​ຂະແໜງ​ກະສິກຳ

   ລັດຖະບານ​ຣັດ​ເຊຍ ແຈ້ງ​ໃຫ້​ຮູ້ເມື່ອ​ບໍ່​ດົນ​ມາ​ນີ້​ວ່າ ຣັດ​ເຊຍ​ໄດ້​ຮັບຮອງ​ດຳລັດ​ສະບັບ​ໜຶ່ງ ເພື່ອ​ຈັດ​ສັນ​ເງິນ 3 ຕື້​ຣຸບ (ເທົ່າ​ກັບ 46,03 ລ້ານ​ໂດ​ລາ​ສະຫະລັດ) ເພື່ອ​ຍົກ​ລະດັບ​ອຸປະກອນ​ຮັບ​ໃຊ້​ໃຫ້​ແກ່​ຂະແໜງການ​ກະສິກຳ ພ້ອມ​ກັນ​ນັ້ນ​ກໍ​ເພື່ອ​ຫຼຸດຜ່ອນ​ແບກ​ຫາບ​ອັນ​ໜັກໜ່ວງ​ດ້ານ​ການ​ເງິນ ໃຫ້​ແກ່​ປະຊາຊົນ.

    ບົດ​ລາຍ​ງານ​ສະບັບ​ໜຶ່ງ​ໃຫ້​ຮູ້​ວ່າ ຈາກ​ຈຳນວນ​ເງິນ​ດັ່ງກ່າວ ມີ​ອຸປະກອນ​ກະສິກຳ​ໃໝ່ໆ ຈຳນວນ 374 ເຄື່ອງ ທີ່​ຂັບ​ເຄື່ອນ​ດ້ວຍ​ຕົວ​ມັນ​ເອງ ອັນ​ປະກອບ​ມີ​ເຄື່ອງ​ຈັກ​ລາກ​ແກ່ 153 ເຄື່ອງ ແລະ ຈັກ​ກ່ຽວ-ຟາດ​ປະສົມ 221 ເຄື່ອງ ຈະ​ໄດ້​ເພີ່ມ​ເຕີມ​ເຂົ້າ​ໄປ​ໃນ​ບັນຊີ​ບັນດາ​ອຸປະກອນ​ກະສິກຳ ຊຶ່ງ​ສາມາດ​ໃຫ້​ເຊົ່າ​ດ້ານ​ການ​ເງິນ ຕາມ​ລະດູ​ການ​ຜະລິດ.

    ທາງ​ການ​ຣັດ​ເຊຍ ໃຫ້​ຮູ້​ວ່າ ໃນ​ຊຸມ​ປີ​ທີ່​ຜ່ານ​ມາ ກຸ່ມ​ຂະແໜງ​ອຸດສາຫະກຳ-ກະສິກຳ ຂອງ​ຣັດ​ເຊຍ ພວມ​ສືບຕໍ່​ດຳເນີນ​ການ​ປ່ຽນແປງ​ໃໝ່ ສຳລັບ​ບັນດາ​ອຸປະກອນ​ກະສິກຳ ຕາມ​ນະໂຍບາຍ​ພິເສດ​ທີ່​ແຕກ​ຕ່າງ​ກັນ. ສິ່ງ​ດັ່ງກ່າວ ເປັນ​ການ​ສ້າງ​ເງື່ອນໄຂ ເພື່ອ​ໃຫ້​ບັນດາ​ຜູ້​ປະກອບ​ການ ຜະລິດ​ທາງ​ດ້ານ​ກະສິກຳ ສາມາດ​ເຂົ້າ​ເຖິງ​ອຸປະກອນ​ໃໝ່ໆ ດ້ວຍ​ຍອດ​ມູນ​ຄ່າ 22 ຕື້​ຣຸບ (ເທົ່າ​ກັບ 337,6 ລ້ານ​ໂດ​ລາ​ສະຫະລັດ) ໃນ​ໄລຍະ​ປີ 2012-2018.

    ກ່ອນ​ໜ້າ​ນັ້ນ ເມື່ອ​ເດືອນ​ພຶດສະພາ ປີ 2018 ປະທານາທິບໍດີ​ຣັດ​ເຊຍ ວາ​ລາ​ດີ​ເມຍ ປູ​ຕິນ ໄດ້​ລົງ​ນາມ​ດຳລັດ​ສະບັບ​ໜຶ່ງ ກ່ຽວ​ກັບ​ຂະ​ບວນ​ການ​ພັດທະນາ​ຍຸດ​ທະ​ສາດ​ຂອງ​ຣັດ​ເຊຍ ໂດຍ​ໄດ້​ວາງຄາດໝາຍ​ການ​ພັດທະນາ​ແຫ່ງ​ຊາດ ຢູ່​ໃນ​ຫຼາຍ​ຂົງເຂດ ຮອດ​ປີ 2024 ອັນ​ປະກອບ​ມີ​ການ​ແກ້​ໄຂ​ກຸ່ມ​ຂະແໜງ​ອຸດສາຫະກຳ-ກະສິກຳ ຂອງ​ປະເທດ​ຊາດ.

ຂ່າວທີ່ກ່ຽວຂ້ອງ