ຍົກລະດັບຄູເຝິກກຳມະການຕັດສິນບານເຕະຂັ້ນພື້ນຖານ

1.048 17 ພ.ພ. 2019 ວົງຈອນກີລາ
ຍົກລະດັບຄູເຝິກກຳມະການຕັດສິນບານເຕະຂັ້ນພື້ນຖານ

    ສະ­ຫະ­ພັນ​ບານ­ເຕະ​ແຫ່ງ​ຊາດ​ລາວ (ສຕລ) ຈັດ​ເຝິກ­ອົບ­ຮົມ​ຄູ​ເຝິກ ແລະ ກຳ­ມະ­ການ​ບານ­ເຕະ ຂັ້ນ​ພື້ນ­ຖານ ຂຶ້ນ​ວັນ​ຈັນ 14-17 ພຶດ­ສະ­ພາ 2019 ຢູ່​ພະ​ແນກ​ສຶກ​ສາ​ທິ​ການ ແລະ ກີ­ລາ (ສສກ) ເມືອງ​ໄຊ ແຂວງ​ອຸ­ດົມ​ໄຊ ໂດຍ​ມີ​ທ່ານ ພິມ​ພາ ເພຍ​ເທບ ຮອງ​ຫົວ­ໜ້າ​ພະ​ແນກ ສສກ ແຂວງ​ອຸ­ດົມ​ໄຊ ທ່ານ ອະ​ກິ​ລະ ໂອະ​ໂນະ ຫົວ­ໜ້າ​ພະ​ແນກ​ເຕັກ­ນິກ-ວິ­ທະ­ຍາ ສຕລ ທ່ານ ສີ​ປະ­ເສີດ ສິນ​ບັນ­ດິດ ຫົວ­ໜ້າ​ພະ​ແນກ​ກຳ­ມະ­ການ​ຕັດ­ສິນ ສຕລ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ຊຸດ​ເຝິກ­ອົບ­ຮົມ​ຄັ້ງ​ນີ້ ມີ​ສຳ​ມະ­ກອນ​ທີ່​ຮຽນ​ຄູ​ເຝີກ 26 ຄົນ ຍິງ 4 ຄົນ ແລະ ຮຽນ​ກຳ­ມະ­ການ 25 ຄົນ ທີ່​ມາ​ຈາກ 7 ເມືອງ 10 ໂຮງ­ຮຽນ​ຂອງ​ແຂວງ​ອຸ­ດົມ​ໄຊ ການ​ຍົກ​ລະ­ດັບ​ຄູ​ເຝິກ​ບານ­ເຕະ​ຂັ້ນ​ພື້ນ­ຖານ ເພື່ອ​ເສີມ​ສ້າງ-ພັດ­ທະ­ນາ​ຄູ​ເຝິກ​ຮຸ່ນ​ສືບ​ທອດ​ກີ­ລາ​ບານ­ເຕະ​ໃຫ້​ໄດ້​ທົ່ວ​ທຸກ​ເຂດ ເພື່ອ​ນຳ​ໃຊ້​ການ​ເຝິກ​ສອນ​ທັກ​ສະ​ກີ­ລາ​ບານ­ເຕະ​ຂັ້ນ​ພື້ນ­ຖານ​ໃຫ້​ຖືກ­ຕ້ອງ ແລະ ມີ​ຄວາມ​ຄ່ອງ​ແຄ້ວ ເພື່ອ​ປັບ­ປຸງ ແລະ ພັດ­ທະ­ນາ​ຄູ​ເຝິກ​ໃຫ້​ມີ​ຄວາມ​ຮູ້-ຄວາມ​ສາ­ມາດ​ໃນ​ການ​ເຂົ້າ​ຮ່ວມ ການ​ເຝິກ­ອົບ­ຮົມ​ຄູ​ເຝິກ​ລະ­ດັບ​ພາກ​ພື້ນ​ຂອງ​ອາ­ຊີ​ໃນ​ອະ­ນາ­ຄົດ ເພື່ອ​ໃຫ້­ການ​ເຝິກ​ສອນ​ໃຫ້​ນັບ​ມື້​ນັບ​ມີ​ມາດ­ຕະ­ຖານ ຮັບ­ປະ­ກັນ​ດ້ານ​ປະ­ລິ­ມານ ແລະ ຄຸນ​ນະ​ພາບ.

    ສ່ວນ​ການ​ຍົກ​ລະ­ດັບ​ກຳ­ມະ­ການ​ຕັດ­ສິນ​ບານ­ເຕະ​ຂັ້ນ​ພື້ນ­ຖານ ເພື່ອ​ພັດ­ທະ­ນາ​ກຳ­ມະ­ການ​ຕັດ­ສິນ​ໃໝ່​ໃຫ້​ຂະ­ຫຍາຍ­ຕົວ ຄຽງ​ຄູ່​ກັບ​ການ​ພັດ­ທະ­ນາ​ນັກ­ກີ­ລາ​ບານ­ເຕະ​ໃຫ້​ຫຼາຍ​ຂຶ້ນ ທັງ​ເປັນ​ການ​ສ້າງ​ກຳ­ມະ­ການ​ຮຸ່ນ​ສືບ​ທອດ​ເພື່ອ​ທົດ​ແທນ ແລະ ຍົກ​ລະ­ດັບ​ໃຫ້​ສູງ​ຂຶ້ນ ເນື່ອງ​ຈາກ​ປັດ­ຈຸ­ບັນ​ກຳ­ມະ­ການ​ທີ່​ຮັບ​ໃຊ້​ມີ​ຈຳ­ກັດ ທັງ​ເປັນ​ການ​ສ້າງ​ໂອ­ກາດ​ໃຫ້​ກຳ­ມະ­ການ​ໃໝ່​ມີ​ການ​ພັດ­ທະ­ນາ ແລະ ຮຽນ​ຮູ້​ກ່ຽວ​ກັບ​ກະ­ຕິ​ກາ​ແຂ່ງ­ຂັນ ແລະ ຮູ້​ນຳ​ໃຊ້​ກະ­ຕິ​ກາ​ໃຫ້​ຖືກ­ຕ້ອງ ແລະ ເໝາະ​ສົມ​ກັບ​ການ​ແຂ່ງ­ຂັນ​ແຕ່​ລະ​ນັດ ເພື່ອ​ຈະ​ສອບ­ເສັງ​ທາງ​ພາກ​ທິດ​ສະ​ດີ ແລະ ທາງ​ດ້ານ​ພະ­ລະ​ກຳ­ລັງ​ໃຫ້​ໄດ້​ລະ­ດັບ​ຄາດ­ໝາຍ​ທີ່ ສຕລ ວາງ​ອອກ.

ຂ່າວທີ່ກ່ຽວຂ້ອງ