ຂ່າວຫຼ້າສຸດ

ຢູ-15 ລາວ ຊະນະ ກຳປູເຈຍ ຜ່ານເຂົ້າຮອບຮອງຊີງແຊັມອາຊຽນ

929 17 ພ.ພ. 2019 ວົງຈອນກີລາ

    ນັກ­ກີ­ລາ​ຍິງ​ທີມ​ຊາດ​ລາວ ຮຸ່ນ​ອາ­ຍຸ​ບໍ່​ເກີນ 15 ປີ​ຍັງ​ເຮັດ​ຜົນ­ງານ​ດີ​ຕໍ່​ເນື່ອງ ຫຼັງ​ຈາກ​ສາ­ມາດ​ຊະ­ນະ ທີມ​ຊາດ​ກຳ­ປູ­ເຈຍ ຮຸ່ນ​ອາ­ຍຸ​ບໍ່​ເກີນ 15 ປີ 2-0 ຜ່ານ​ເຂົ້າ​ສູ່​ຮອບ​ຮອງ​ຊະ­ນະ​ເລີດ​ໄດ້​ສຳ­ເລັດ ໃນ​ວັນ​ທີ 15 ພຶດ­ສະ­ພາ 2019 ຢູ່​ສະ­ໜາມ Institute of Physical Education Chonburi Campus Stadium ແຂວງ​ຊົນ​ບູ​ຣີ ປະ­ເທດ​ໄທ.

    ການ​ແຂ່ງ­ຂັນ​ບານ­ເຕະ​ຍິງ​ຊີງ​ແຊັມ​ອາ​ຊຽນ ຮຸ່ນ​ອາ­ຍຸ​ບໍ່​ເກີນ 15 ປີ ຫຼື AFF U15 GIRLS’ CHAMPIONSHIP 2019 ເຊິ່ງ​ທີມ​ຊາດ​ລາວ ທີມ​ນຳ​ຕາ­ຕະ­ລາງ​ຄະ­ແນນ ລົງ​ສະ­ໜາມ​ນັດ​ທີ 3 ພົບ​ກັບ ທີມ​ຊາດ​ກຳ­ປູ­ເຈຍ ເຊິ່ງ​ເກມ​ການ​ແຂ່ງ­ຂັນ​ນັດ​ດັ່ງ­ກ່າວ ທີມ​ຊາດ​ລາວ ໄດ້​ພັກ​ນັກ­ກີ­ລາ​ຕົວ​ຫຼັກ​ຫຼາຍ​ຕຳ­ແໜ່ງ ຜ່ານ​ການ​ແຂ່ງ­ຂັນ​ຜົນ​ປາ­ກົດ​ວ່າ ທີມ​ຊາດ​ລາວ ສາ­ມາດ​ເອົາ​ຊະ­ນະ ທີມ​ຊາດ​ກຳ­ປູ­ເຈຍ 2-0 ໂດຍ ທີມ​ຊາດ​ລາວ ໄດ້​ປະ­ຕູ​ຈາກ ຈິນ­ດາ ສີ​ຫາ​ລາດ ນາ­ທີໆ 29 ແລະ ແສງ​ເດືອນ ພົງ​ໄພ­ລັດ ນາ­ທີໆ 49 ຈາກ​ໄຊ­ຊະ­ນະ​ດັ່ງ­ກ່າວ ເຮັດ​ໃຫ້​ທີມ​ຊາດ​ລາວ ມີ​ເພີ່ມ​ເປັນ 9 ຄະ­ແນນ ຜ່ານ​ເຂົ້າ​ສູ່​ຮອບ​ຮອງ​ຊະ­ນະ​ເລີດ ຫຼັງ​ຈາກ​ລົງ​ສະ­ໜາມ 3 ນັດ ຊະ­ນະ 3 ນັດ ເປັນ​ທີມ​ນຳ​ກຸ່ມ ບີ.

    ສຳ­ລັບ​ທີມ​ຊາດ​ລາວ ຍັງ​ເຫຼືອ​ການ​ແຂ່ງ­ຂັນ​ນັດ​ສຸດ​ທ້າຍ ເພື່ອ​ຍາດ​ຊີງ​ອັນ​ດັບ 1 ຂອງ​ກຸ່ມ ບີ ໂດຍ​ຈະ​ແຂ່ງ­ຂັນ​ວັນ​ທີ 17 ພຶດ­ສະ­ພາ 2019 ເວ­ລາ 18:00 ໂມງ ພົບ ທີມ​ຊາດ​ໄທ ແຂ່ງ­ຂັນ​ຢູ່​ສະ­ໜາມ Institute of Physical Education Chonburi Campus Stadium.

    ການ​ແຂ່ງ​ບານ­ເຕະ​ຍິງ​ຊີງ​ແຊັມ​ອາ​ຊຽນ ຮຸ່ນ​ອາ­ຍຸ​ບໍ່​ເກີນ 15 ປີ ຈັດ​ຂຶ້ນ​ຢູ່​ແຂວງ​ຊົນ​ບູ​ຣີ ປະ­ເທດ​ໄທ ໃນ​ລະ­ຫວ່າງ​ວັນ​ທີ 7–21 ພຶດ­ສະ­ພາ 2019 ມີ 9 ປະ­ເທດ​ເຂົ້າ​ຮ່ວມ​ແຂ່ງ­ຂັນ​ແບ່ງ​ອອກ​ເປັນ 2 ກຸ່ມ​ຄື: ກຸ່ມ ເອ: ມຽນ​ມາ ຫວຽດ­ນາມ ຟີ​ລິບ​ປິນ ແລະ ຕີ​ມໍ ເລ​ສ​ເຕ ສ່ວນ​ກຸ່ມ ບີ: ໄທ ລາວ ມາ​ເລ​ເຊຍ ສິງ­ກະ­ໂປ ແລະ ກຳ­ປູ­ເຈຍ.

ຂ່າວທີ່ກ່ຽວຂ້ອງ