ສັນຍາ​ການ​ຄ້າ​ເສລີ​ ລະຫວ່າງ​ຮົງ​ກົງ​ ກັບ​ສາມ​ປະ​ເທດ​ສະມາຊິກອາ​ຊຽນ ໃກ້ຈະ​ມີ​ຜົນບັງຄັບ​ໃຊ້​

841 17 ພ.ພ. 2019 ຂ່າວຕ່າງປະເທດ
ສັນຍາ​ການ​ຄ້າ​ເສລີ​ ລະຫວ່າງ​ຮົງ​ກົງ​ ກັບ​ສາມ​ປະ​ເທດ​ສະມາຊິກອາ​ຊຽນ ໃກ້ຈະ​ມີ​ຜົນບັງຄັບ​ໃຊ້​

    ອຳນາດ​ການ​ປົກຄອງ​ເຂດ​ບໍລິຫານ​ພິເສດ​ຮົງ​ກົງ (​ສປ ຈີນ) ໄດ້​ປະກາດ​ໃນ​ວັນ​ທີ 9 ພຶດສະພາ​ທີ່​ຜ່ານ​ມາ​ວ່າ ໃນ​ສັນຍາ​ການ​ຄ້າ​ເສລີ ທີ່​ຮົງ​ກົງ ແລະ​ ອາ​ຊຽນ​ເຊັນ​ກັນ​ນັ້ນ ລະຫວ່າງ​ຮົງ​ກົງ​ກັບ​ມຽນ​ມາ ສິງກະໂປ ແລະ ໄທ ຈະ​ມີ​ຜົນ​ບັງຄັບ​ໃຊ້​ນັບ​ແຕ່​ວັນ​ທີ 11 ມິຖຸນາ​ໜ້າ​ນີ້​ເປັນຕົ້ນ​ໄປ ແລະ ຈະ​ປະກາດ​ວັນ​ເວລາ​ທີ່​ລະອຽດ ກ່ຽວ​ກັບ​ການ​ມີ​ຜົນ​ບັງຄັບ​ໃຊ້​ລະຫວ່າງ​ຮົງ​ກົງ ກັບ​ອີກ 7 ປະເທດ ໃນ​ອາ​ຊຽນ​ທີ່​ເຫຼືອ​ບໍ່​ດົນ​ໃນຕໍ່ໜ້າ​ນີ້.

    ໂຄສົກ​ເຂດ​ບໍລິຫານ​ພິເສດ​ຮົງ​ກົງ ກ່າວ​ວ່າ ຫຼັງ​ຈາກ​ສັນຍາ​ການ​ຄ້າ​ເສລີ ມີ​ຜົນ​ບັງຄັບ​ໃຊ້​ແລ້ວ ໃນ​ດ້ານ​ການ​ຄ້າ​ສິນຄ້າ​ປະເພດ​ຈັບ​ຕ້ອງ​ໄດ້ (ຮູບ​ປະພັນ) ນັ້ນ ສິງກະໂປ​ໄດ້​ໃຫ້​ຄຳ​ໝັ້ນ​ສັນຍາ​ຈະ​ບໍ່​ເກັບ​ພາສີ​ຕໍ່​ຜະລິດ​ຕະ​ພັນ​ທຸກ​ຢ່າງ​ທີ່​ຜະລິດ​ຢູ່​ຮົງ​ກົງ ໃນ​ຂະນະ​ທີ່​ມຽນ​ມາ ແລະ ໄທ ຈະ​ຫຼຸດ​ລະດັບ​ພາສີ​ໃຫ້​ຕ່ຳ​ລົງ​ເປັນ​ກ້າວໆ. ການ​ປັບ​ຫຼຸດ​ລະດັບ​ພາສີ​ໄດ້​ກວມ​ເອົາ​ເພັດ​ນິນ​ຈິນດາ ເສື້ອ​ຜ້າ​ອາພອນ ເຄື່ອງ​ອາ​ໄຫຼ່ ໂມງ ເຄື່ອງ​ຫຼິ້ນ ແລະ​ຜະລິດ​ຕະ​ພັນ​ອື່ນໆ​ຂອງ​ຮົງ​ກົງ.

    ໃນ​ດ້ານ​ການ​ຄ້າ​ບໍລິການ ຜູ້​ໃຫ້​ບໍລິການ​ຂອງ​ຮົງ​ກົງ ຈະ​ມີ​ໂອກາດ​ການ​ຄ້າ​ດີ​ກວ່າ​ເກົ່າ​ອີກ ແລະ ມີ​ການ​ຮັບປະກັນ​ດ້ານ​ກົດໝາຍ ໃນ​ການ​ເຂົ້າ​ເຖິງ​ຕະຫຼາດ​ຂອງ​ອາ​ຊຽນ ຊຶ່ງ​ວົງ​ການ​ຕ່າງໆ​ທີ່​ຈະ​ໄດ້​ຮັບ​ຜົນ​ປະໂຫຍດ ລວມ​ທັງ​ການ​ບໍລິການ​ໃນ​ດ້ານ​ວິຊາ​ສະເພາະ ການ​ບໍລິການ​ທາງ​ການ​ຄ້າ ໂທລະ​ຄົມ ໂຄງການ​ກໍ່ສ້າງ ແລະ​ໂຄງການ​ທີ່​ກ່ຽວຂ້ອງ ການ​ສຶກ​ສາ ການ​ທະນາຄານ ການທ່ອງທ່ຽວ ແລະ ການ​ບໍລິການ​ທີ່​ກ່ຽວຂ້ອງ​ກັບ​ການທ່ອງທ່ຽວ ການ​ຂົນສົ່ງ ແລະ ການ​ບໍລິການ​ດ້ານ​ຕຸລາການ.

ຂ່າວທີ່ກ່ຽວຂ້ອງ