ອີຣານ ງົດການປະຕິບັດຄຳສັນຍາຈຳນວນໜຶ່ງຂອງຂໍ້ຕົກລົງນີວເຄລຍ

703 17 ພ.ພ. 2019 ຂ່າວຕ່າງປະເທດ
ອີຣານ ງົດການປະຕິບັດຄຳສັນຍາຈຳນວນໜຶ່ງຂອງຂໍ້ຕົກລົງນີວເຄລຍ

    ສຳນັກ​ຂ່າວສານ ISNA ຂອງ​ອີ​ຣານ ອ້າງ​ຕາມ​ແຫຼ່ງ​ຂ່າວ​ທີ່​ໜ້າ​ເຊື່ອ​ຖື ຈາກ​ອົງການ ພະລັງງານ​ປາ​ລາມາ​ນູ​ອີ​ຣານ ໃຫ້​ຮູ້​ວ່າ ທາງ​ການ​ອີ​ຣານ ໄດ້​ງົດ​ການ​ປະຕິບັດ​ຢ່າງ​ເປັນ​ທາງ​ການ ສຳລັບ​ຄຳ​ສັນຍາ​ຈຳນວນ​ໜຶ່ງ ຢູ່​ໃນ​ຂໍ້​ຕົກລົງ​ນີວ​ເຄລຍ​ເມື່ອ​ປີ 2015 ທີ່​ບັນລຸ​ໄດ້​ກັບ​ບັນດາ​ປະເທດ ມະຫາ​ອຳນາດ​ໃນ​ໂລກ. ການ​ຕົກລົງ​ດັ່ງກ່າວ​ມີ​ອອກ​ມາ ຫຼັງ​ຈາກ​ມີ​ການ​ຊີ້​ນຳ​ຈາກ​ສະພາ​ຄວາມ​ໝັ້ນຄົງ ສູງ​ສຸດ​ຂອງ​ອີ​ຣານ.

    ເມື່ອ​ອາທິດ​ກ່ອນ ອີ​ຣານ​ໄດ້​ປະກາດ​ງົດ​ບາງ​ຄຳ​ສັນຍາ ຢູ່​ໃນ​ຊໍ້​ຕົກລົງ​ນີວ​ເຄລຍ​ດັ່ງກ່າວ ທີ່​ເອີ້ນ​ວ່າ​ແຜນການ​ລວມ​ຮອບດ້ານ (JCPOA) ຊຶ່ງ​ອີ​ຣານ ໄດ້​ລົງ​ນາມ​ເມື່ອ​ປີ 2015 ຮ່ວມ​ກັບ​ກຸ່ມ P5+1 (ປະກອບ​ດ້ວຍ ອັງກິດ ຝຣັ່ງ ສ ອາ​ເມ​ຣິ​ກາ ຣັດ​ເຊຍ ຈີນ ແລະ​ເຢຍ​ລະ​ມັນ) ເຖິງ​ວ່າ​ຍັງ​ປະຕິບັດ​ຕາມ​ເອກະສານ​ນີ້​ກໍ​ຕາມ.

   ການເຄື່ອນໄຫວ​ດັ່ງກ່າວ​ຂອງ​ອີ​ຣານ ຖື​ວ່າ​ເພື່ອ​ເປັນ​ການ​ຕອບ​ໂຕ້ ຕໍ່​ມາດ​ຕະການ​ປິດ​ລ້ອມ​ຂອງ ສ ອາ​ເມ​ຣິ​ກາ ທີ່​ແນໃສ່​ອີ​ຣານ ຫຼັງ​ຈາກ​ທີ່ ສ ອາ​ເມ​ຣິ​ກາ ໄດ້​ຖອນ​ອອກ​ໄປ​ຈາກ JCPOA ເມື່ອ​ປີ​ກາຍ.

ຂ່າວທີ່ກ່ຽວຂ້ອງ