ຂ່າວຫຼ້າສຸດ

ກອງກຳລັງປະສົມໃນອີຣັກ ແລະ ຊີຣີ ຢູ່ໃນພາວະກຽມພ້ອມສູ້ຮົບ

506 17 ພ.ພ. 2019 ຂ່າວຕ່າງປະເທດ
ກອງກຳລັງປະສົມໃນອີຣັກ ແລະ ຊີຣີ ຢູ່ໃນພາວະກຽມພ້ອມສູ້ຮົບ

    ທ່ານ ບີ​​ລ ອູ​ບານ ໂຄສົກ​ຂອງ​ກອງ​ບັນຊາ​ການ​ສູນ ສ ອາ​ເມ​ຣິ​ກາ (CENTCOM) ກ່າວ​ເມື່ອ​ວັນ​ທີ 14 ພຶດສະພາ​ນີ້​ວ່າ ກອງ​ກຳລັງ​ປະສົມ ອັນ​ມີ ສ ອາ​ເມ​ຣິ​ກາ ເປັນ​ແກນ​ນຳ ເພື່ອ​ຕ້ານ​ກັບ​ອົງການ ລັດ​ອິດ​ສະ​ລາມ (IS) ຢູ່​ໃນ​ອີ​ຣັກ ແລະ ​ຊີ​ຣີ ພວມ​ຢູ່​ໃນ​ພາວະ​ກຽມພ້ອມ​ສູ້​ຮົບ ທ່າມກາງ​ທີ່​ການ​ພົວພັນ​ກັບ​ອີ​ຣານ ພວມ​ມີ​ຄວາມ​ເຄັ່ງ​ຕຶງ.

    ທ່ານ ບີ​​ລ ອູ​ບານ ຊີ້​ແຈງ​ວ່າ ກອງ​ກຳລັງ​ປະສົມ​ເຮັດ​ໜ້າທີ່​ສູ້​ຮົບ​ພິເສດ (OIR) ພວມ​ຢູ່​ໃນ ພາວະ​ເຕືອນ​ໄພ​ໃນ​ລະດັບ​ສູງ ແລະ​ສືບຕໍ່​ຕິດຕາມ​ຢ່າງ​ເຄັ່ງ​ຄັດ ສຳລັບ​ບັນດາ​ໄພ​ຄຸກ​ຄາມ​ທີ່​ບົ່ມ​ຊ້ອມ ຕໍ່​ກອງ​ກຳລັງ​ຂອງ ສ ອາ​ເມ​ຣິ​ກາ ຢູ່​ໃນ​ອີ​ຣັກ.

    ໃນ​ໄລຍະ​ທີ່​ຜ່ານ​ມາ ສ ອາ​ເມ​ຣິ​ກາ ມີ​ການເຄື່ອນໄຫວ​ຢ່າງ​ຕໍ່​ເນື່ອງ ກ່ຽວ​ກັບ​ການ​ສົ່ງ​ການ​ທະຫານ​ໄປ​ຍັງ​ເຂດ​ຕາເວັນ​ອອກ​ກາງ ເພື່ອ​ຮັບ​ມື​ກັບ​ອັນ​ທີ່​ອຳນາດ​ການ​ປົກຄອງ ສ ອາ​ເມ​ຣິ​ກາ ເອີ້ນ​ວ່າ “ສິ່ງ​ບົ່ງ​ບອກ​ທີ່​ຈະແຈ້ງ” ກ່ຽວ​ກັບ​ໄພ​ຄຸກ​ຄາມ​ຈາກ​ອີ​ຣານ. ເມື່ອ​ວັນ​ທີ 7 ພຶດສະພາ​ທີ່​ຜ່ານ​ມາ ສ ອາ​ເມ​ຣິ​ກາ ປະກາດ​ກ່ຽວ​ກັບ​ການ​ສົ່ງ​ເຮືອບິນ​ຖິ້ມ​ລະເບີດ B-52 ໄປ​ຍັງ​ຕາເວັນ​ອອກ​ກາງ. ຕໍ່​ມາ ໃນ​ວັນ​ທີ 10 ພຶດສະພາ ກະຊວງ​ປ້ອງ​ກັນ​ປະເທດ ສ ອາ​ເມ​ຣິ​ກາ ສືບຕໍ່​ແຈ້ງ​ໃຫ້​ຮູ້​ວ່າ ພວມ​ຜັນ​ຂະຫຍາຍ ກຳປັ່ນ​ໂຈມ​ຕີ​ຂຶ້ນ​ບົກ​ລຳ​ໜຶ່ງ ພ້ອມ​ດ້ວຍ​ລະບົບ ຍິງ​ລູກ​ສອນ​ໄຟ Patriot ໜຶ່ງ​ຊຸດ ໄປ​ຍັງ​ເຂດ​ດັ່ງກ່າວ ເພື່ອ​ເພີ່ມ​ທະວີ​ກຳລັງ​ແຮງ​ໃຫ້​ແກ່​ໜ່ວຍ​ການ​ສູ້​ຮົບ ຂອງ​ກຳປັ່ນ​ບັນທຸກ​ເຮືອບິນ USS Abraham Lincoln.

    ທາງ​ຝ່າຍ​ອີ​ຣານ ໄດ້​ກ່າວ​ຫາ ສ ອາ​ເມ​ຣິ​ກາ ວ່າ​ພວມ​ກະ​ຕຸ້ນ “ສົງຄາມ​ຈິດຕະສາດ” ພ້ອມ​ກັນ​ນັ້ນ​ກໍ​ຢືນຢັນ​ວ່າ​ຈະ​ຕອບ​ໂຕ້ ຖ້າ​ຫາກ ສ ອາ​ເມ​ຣິ​ກາ ມີ​ການ​ກະທຳ​ເກາະ​ຜິດ​ໃດໆ​ກໍ​ຕາມ.

    ຫຼ້າ​ສຸດ ກະຊວງ​ການ​ຕ່າງປະເທດ ສ ອາ​ເມ​ຣິ​ກາ ໄດ້​ສະເໜີ​ເມື່ອ​ວັນ​ທີ 15 ພຶດສະພາ​ນີ້ ໄປ​ຍັງ​ເຈົ້າ​ໜ້າທີ່​ຂອງ​ລັດຖະບານ ທີ່​ບໍ່​ເຮັດ​ໜ້າທີ່​ສຸກ​ເສີນ​ຢູ​ໃນ​ສະຖານທູດ ສ ອາ​ເມ​ຣິ​ກາ ປະຈຳ​ນະຄອນຫຼວງ​ແບກ​ແດດ ຂອງ​ອີ​ຣັກ ແລະ​ສະຖານກົງສູນ ຢູ່​ໃນ​ເອີ​ບີ​​ລ ນັ້ນ​ໃຫ້​ອອກ​ໄປ ຈາກ​ອີ​ຣັກ. ສະຖານທູດ ສ ອາ​ເມ​ຣິ​ກາ ປະຈຳ​ນະຄອນຫຼວງ​ແບກ​ແດດ ແຈ້ງ​ໃຫ້​ຮູ້​ຢູ່​ໃນ​ຖະແຫຼງການ ສະບັບ​ໜຶ່ງ​ວ່າ ການ​ບໍລິການ​ທີ່​ກ່ຽວຂ້ອງ​ເຖິງ​ວີ​ຊາ​ຕາມ​ປົກກະຕິ ຢູ່​ໃນ​ສອງ​ອົງການ​ດັ່ງກ່າວ ຈະ​ຖືກ​ງົດ ເປັນ​ການ​ຊົ່ວຄາວ ພ້ອມ​ກັນ​ນັ້ນ ລັດຖະບານ ສ ອາ​ເມ​ຣິ​ກາ ກໍ​ຈຳກັດ​ການ​ສະໜອງ​ການ​ບໍລິການ ສຸກ​ເສີນ ໃຫ້​ແກ່​ພົນລະເມືອງ​ຊາວ​ອາ​ເມ​ຣິ​ກັນ ຢູ່​ໃນ​ອີ​ຣັກ. ຖະແຫຼງການ​ຂອງ​ສະຖານທູດ ສ ອາ​ເມ​ຣິ​ກາ ປະຈຳ​ແບກ​ແດດ ຍັງ​ສະເໜີ​ໄປ​ຍັງ​ບັນດາ​ຜູ້​ທີ່​ໄດ້​ຮັບ​ຜົນ​ກະທົບ ໃຫ້​ອອກ​ໄປ​ຈາກ​ອີ​ຣັກ ດ້ວຍ​ພາຫະນະ​ການ​ຄົມມະນາຄົມ​ຕ່າງໆ ໄວ​ເທົ່າໃດ​ຍິ່ງ​ເປັນ​ການ​ດີ.

 

ຂ່າວທີ່ກ່ຽວຂ້ອງ