ເບີ່ງບ້ານເຂົາເອົາບົດຮຽນ 16-05-2019

1.521 16 ພ.ພ. 2019 ຫົວຂໍ້ຂ່າວອື່ນໆ

    ພົບ​ກັນ​ປະຈຳ​ວັນ​ນີ້ ກັບ​ຂ່າວ​ກ່ຽວ​ກັບ​ນະໂຍບາຍ ຂອງ​ຢີ່​ປຸ່ນ ຕໍ່​ຊາວ​ຕ່າງປະເທດ ທີ່​ເຮັດ​ວຽກ ເບິ່ງແຍງ​ຜູ້​ເຖົ້າ ໃນ​ຍີ່ປຸ່ນ ເລື່ອງ​ອິນ​ໂດ​ເນ​ເຊຍ ຫ້າມ​ຕ່າງປະເທດ​ລົງທຶນ ໃນ​ຂະແໜງ​ປະມົງ ແລະ ຂ່າວ​ກ່ຽວ​ກັບ​ບັນຫາ​ຂີ້​ເຫຍື້ອ ເອ​ເລັກ​ໂຕຣ​ນິກ​ຢູ່​ຫວຽດນາມ.

   ທີ່​ຍີ່ປຸ່ນ: ມີ​ຂ່າວ​ດີ​ຈາກ​ຍີ່ປຸ່ນ​ວ່າ ຄົນ​ຕ່າງປະເທດ ຈະ​ໄດ້​ຮັບ​ທຶນ​ຊ່ວຍເຫຼືອ ຈາກ​ລັດຖະບານ​ຍີ່ປຸ່ນ ຖ້າ​ເຮັດ​ອາຊີບ​ເປັນ​ຜູ້​ບົວລະບັດ​ເບິ່ງແຍງ​ຜູ້​ເຖົ້າ​ໃນ​ຍີ່ປຸ່ນ ໃນ​ປັດຈຸບັນ ສູນ​ເບິ່ງແຍງ​ຜູ້​ເຖົ້າ​ໃນ​ຍີ່ປຸ່ນ ພວມ​ປະ​ເຊີນ​ກັບ​ບັນຫາ​ຂາດແຄນ​ພະນັກງານ​ຢ່າງ​ໜັກ ແລະ ຄາດ​ວ່າ​ສະພາບ​ຂາດແຄນ​ດັ່ງກ່າວ ຈະ​ສູງ​ເຖິງ 380.000 ຄົນ ພາຍ​ໃນ​ປີ 2025 ( ວຽງ​ຈັນ​ທາມ 2 ເມສາ 2018 ) ຍ້ອນ​ແນວ​ນັ້ນ​ເອງ ນັບ​ແຕ່​ເດືອນ​ເມສາ 2018 ເປັນຕົ້ນ​ມາ​ທາງ​ການ​ຍີ່ປຸ່ນ ຈຶ່ງ​ໄດ້​ທຸ່ມ​ເທ​ການ​ສະໜັບສະໜູນ ບັນຫາ​ສູນ​ເບິ່ງແຍງ​ຜູ້​ເຖົ້າ ທີ່​ຮັບ​ເອົາ​ນັກ​ສຶກ​ສາ​ຕ່າງປະເທດ ຂໍ​ມາ​ເຝິກອົບຮົມ​ເພື່ອ​ໃຫ້​ກາຍເປັນ​ພະນັກງານ​ປະຈຳ​ບັນດາ​ສູນ​ດັ່ງກ່າວ ຂ່າວ​ບອກ​ວ່າ ທາງ​ການ​ຍີ່ປຸ່ນ ຈະ​ໃຫ້ການ​ຊ່ວຍເຫຼືອ​ດ້ານ​ການ​ເງິນ ແກ່​ນັກ​ສຶກ​ສາ​ເຫຼົ່ານັ້ນ ໃນ​ຈຳນວນ 1/3 ຂອງ​ຄ່າ​ຮຽນ ແລະ ຄ່າ​ເຊົາ​ທີ່​ພັກ​ຂອງ​ພວກ​ເຂົາເຈົ້າ ໄລ່​ລວມ​ແລ້ວ​ນັກ​ສຶກ​ສາ ແຕ່ລະຄົນ​ຈະ​ໄດ້​ຮັບ​ເງິນ​ສະໜັບສະໜູນ​ໃນ​ຈຳນວນ 320.000 ເຢັນ​ຕໍ່​ປີ ນອກຈາກ​ນະ​ໂຍ ບາຍ​ດີໆ​ດ້ານ​ການ​ເງິນ​ແລ້ວ ລັດຖະບານ​ຍີ່ປຸ່ນ​ຍັງ​ຈະ​ໃຫ້​ສິດ​ຊາວ​ຕ່າງປະເທດ​ສືບຕໍ່​ຢູ່​ຢີ່​ປຸ່ນ ຕື່ມ ຖ້າ​ພວກ​ເຂົາເຈົ້າ​ຫາກ​ເຮັດ​ວຽກ​ຢູ່​ຕາມ​ສູນ​ເບິ່ງແຍງ​ຜຸ້​ເຖົ້າ.

   ທີ່​ອິນ​ໂດ​ເນ​ເຊຍ:  ບົນ​ພື້ນຖານ​ແຜນ​ພັດທະນາ​ພື້ນ​ທີ່​ທະເລ​ໃຫ້​ເປັນ​ປະໂຫຍດ​ຕໍ່​ຊີວິດ​ການ​ເປັນ​ຢູ່​ຂອງ​ປະຊາຊົນ​ຂອງ​ຕົນ​ໃນ​ອະນາຄົດ ທາງ​ການ​ອິນ​ໂດ​ເນ​ເຊຍ​ໄດ້​ກຳນົດ​ແຜນການ​ປະມົງ​ເຂົ້າ​ໃນ​ບັນຊີ​ເກືອດ​ຫ້າມ​ການ​ລົງທຶນ​ຂອງ​ຕ່າງປະເທດ​ດ້ວຍ​ດຳລັດ ເລກ​ທີ 44 ກ່ຽວ​ກັບ​ຂະແໜງການ​ປະມົງ ປີ 2016 ນອກຈາກ ເກືອດ​ຫ້າມ​ການ​ລົງທຶນ​ແລ້ວ ດຳລັດ​ຍັງ​ກຳນົດ​ຫ້າມ​ເຮືອ​ຕ່າງປະເທດ​ເຂົ້າ​ໄປ​ຫາ​ປາ​ຢູ່​ນ່ານ​ນ້ຳຂອງ​ອິນ​ໂດ​ເນ​ເຊຍ​ອີກ​ດ້ວຍ ແນວໃດ​ກໍ​ດີ ດຳລັດ​ຍັງ​ເປີດ​ໄຟ​ຂຽວ​ສຳລັບ​ການ​ລົງທຶນ​ຕ່າງປະເທດ ໃນ​ການ​ປຸງ​ແຕ່ງ​ຢູ່​ຂະແໜງ​ປະມົງ ອິນ​ໂດ​ເນ​ເຊຍ ໄດ້​ຕົກລົງ​ແຜນ​ຮ່ວມ​ມື​ກັບ​ລັດເຊຍ ໃນ​ຂະແໜງ​ປຸງ​ແຕ່ງ​ການ​ປະ ມົງ​ຢູ່​ເຂດ​ທະເລ ນາ​ຕູ​ນາ ເຊິ່ງ​ລວມ​ມີ ການ​ສ້າງ​ສາງ ຕູ້​ແຊ່​ເຢັນ ສັດທະ​ເລ ແລະ ພື້ນຖານ​ໂຄງ​ລ່າງ​ອື່ນໆ.

   ທີ່​ຫວຽດນາມ: ມີ​ຂ່າວ​ວ່າ ທາງ​ການ​ຫວຽດນາມ ໄດ້​ມີ​ມາດ​ຕະການ ເຫຼັກ​ເຊີ່ງ​ນຳ ໃຊ້​ມາ​ແຕ່​ເດືອນ​ມັງກອນ ປີ 2015 ເພື່ອ​ກຳຈັດ​ຂີ້​ເຫຍື້ອ ເອ​ເລັກ​ໂຕຣ​ນິກ ໃນ​ການ​ປະຕິບັດ​ມາດ​ຕະການ​ດັ່ງກ່າວ ຫວຽດນາມ​ໄດ້​ຕັ້ງ​ບັນດາ​ຈຸດ​ກຳຈັດ​ຂີ້​ເຫຍື້ອ ເພື່ອ​ເຮັດ​ໜ້າທີ່​ຮວບ​ຮວມ ຜະລິດ​ຕະ​ພັນ​ເຄື່ອງ​ເອ​ເລັກ​ໂຕຣ​ນິກ​ທີ່​ຖືກ​ເທ​ຖິ້ມ ແນໃສ່​ຫຼຸດ​ບັນຫາ​ມົນ​ລະ​ພິດ​ທາງ​ສິ່ງແວດລ້ອມ ໜ້າທີ່​ຕົ້ນຕໍ​ຂອງ​ບັນດາ​ຈຸດ​ກຳຈັດ​ຂີ້​ເຫຍື້ອ​ນີ້​ແມ່ນ​ເກັບ​ເອົາ​ສິ່ງ​ຂອງ​ເຄື່ອງໃຊ້ ເອ​ເລັກ​ໂຕຣ​ນິກ​ທີ່​ເປ່​ເພ​ຈາກ​ຜູ້​ໃຊ້​ງານ​ເພື່ອ​ແປ​ຮູບ ແລ້ວ​ນຳ​ໃຊ້​ຄືນໃໝ່ ຫຼື​ກຳຈັດ​ຖິ້ມ​ດ້ວຍ​ວິທີ​ການ​ທີ່​ເໝາະ​ສົມ ພ້ອມ​ດຽວ​ກັນ​ກໍ​ເຮັດ​ໜ້າທີ່​ປຸກລະດົມ​ຊຸກຍູ້​ໃຫ້​ປະຊາຊົນ​ເຂົ້າ​ຮ່ວມ​ໃນ​ຄວາມ​ພະຍາຍາມ​ກຳຈັດ​ຂີ້​ເຫຍື້ອ​ເອ​ເລັກ​ໂຕຣ​ນິກ​ເປັນ​ຂະ​ບວນ​ກວ້າງຂວາງ ກ່ອນ​ໜ້າ​ນີ້​ຢູ່​ຫວຽດນາມ ຂີ້​ເຫຍື້ອ​ທຸກ​ປະເພດ​ຖືກ​ນຳໄປ​ຖິ້ມ​ຢູ່​ຈຸດ​ດຽວ​ເຊິ່ງ​ສ່ຽງ​ເກີດ​ອັນຕະລາຍ ເພາະ​ຂີ້​ເຫຍື້ອ​ເອ​ເລັກ​ໂຕຣ​ນິກ​ນັ້ນ ມີ​ສານ​ອັນຕະລາຍ​ຕໍ່​ສິ່ງແວດລ້ອມ ແລະ ມະນຸດ ແລະ ສິ່ງ​ທີ່​ມີ​ຊີວິດ ສະຖິຕິ​ທາງ​ການ​ຊີ້​ອອກ​ວ່າ ຄົນ​ຫວຽດນາມ​ແຕ່ລະຄົນ​ຖິ້ມ​ຂີ້​ເຫຍື້ອ ເອ​ເລັກ​ໂຕຣ​ນິກ 1 ກິ​ໂລ​ກຼາມ​ຕໍ່​ປີ ຫວຽດນາມ​ມີ​ໂຮງງານ​ຜະລິດ​ສິນຄ້າ ເອ​ເລັກ​ໂຕຣ​ນິກ ຫຼາຍ​ກວ່າ 500 ແຫ່ງ ໃນ​ທົ່ວ​ປະເທດ.

ຂ່າວທີ່ກ່ຽວຂ້ອງ