ໜ້າທີ່ອັນມີກຽດສະຫງ່າ

995 15 ພ.ພ. 2019 ນານາສາລະ

    ມື້­ກ່ອນ ຜູ້​ຂຽນ​ອ່ານ​ຂ່າວ​ຈາກ ຂປລ ໃຫ້​ຮູ້​ວ່າ: ໃນ​ວັນ​ທີ 3 ພຶດ­ສະ­ພາ 2019 ກົມ​ຄົ້ນ­ຄວ້າ ແລະ ວາ­ລະ­ສານ​ກວດ­ກາ​ອົງ­ການ​ກວດ­ກາ​ລັດ­ຖະ­ບານ ໄດ້​ຈັດ​ກອງ​ປະ­ຊຸມ​ສຳ​ມະ​ນາ ກ່ຽວ​ກັບ​ພາ­ລະ​ບົດ­ບາດ ແລະ ກົງ­ຈັກ​ການ­ຈັດ­ຕັ້ງ​ຂອງ​ຄະ­ນະ​ກວດ­ກາ​ສູນ​ກາງ​ພັກ ແລະ ອົງ­ການ​ກວດ­ກາ​ລັດ­ຖະ­ບານ​ໃຫ້​ແກ່​ສື່​ມວນ​ຊົນ​ນັ້ນ ກໍ​ໝາຍ​ຄວາມ​ວ່າ ສື່​ມວນ​ຊົນ​ພວກ​ເຮົາ​ມີ­ໜ້າ​ທີ່​ອັນ​ມີ​ກຽດ​ສະ­ຫງ່າ ໃນ​ວຽກ​ງານ​ກວດ­ກາ ຫາກ​ຄົ້ນ­ຄວ້າ​ເຖິງ​ຄຳ​ແນະ­ນຳ​ການ­ຈັດ­ຕັ້ງ​ປະ­ຕິ­ບັດ​ກົດ­ໝາຍ ວ່າ​ດ້ວຍ​ການ​ກວດ­ກາ​ລັດ (ສະ­ບັບ​ປັບ­ປຸງ) ເລກ​ທີ 419/ອກລ ລົງ​ວັນ​ທີ 4 ທັນ­ວາ  2018 ຍິ່ງ​ຈະ​ຮູ້​ດີ​ນໍ ?.

    ບໍ່​ທໍ່​ນັ້ນ ບັນ­ດາ​ຜູ້​ຢູ່​ໃນ​ວົງ​ການ​ສື່­ສານ​ຄົງ​ຈະ​ໄດ້​ຮັບ​ຮູ້​ດີ​ແລ້ວ​ວ່າ ທ່ານ​ຮອງ​ນາ­ຍົກ­ລັດ­ຖະ­ມົນ­ຕີ ສອນ​ໄຊ ສີ​ພັນ​ດອນ ໄດ້​ໃຫ້​ຄຳ​ເຫັນ​ຕໍ່​ສື່​ມວນ​ຊົນ​ວ່າ ຄວນ​ຫຼຸດ­ຜ່ອນ​ຂ່າວ​ພິ­ທີ­ການ ແລະ ເພີ່ມ​ຂ່າວ​ຕ້ານ​ປາ­ກົດ­ການ​ຫຍໍ້­ທໍ້... ສະ­ນັ້ນ ການ​ຂຽນ​ຜ່ານ​ວິ­ທີ​ການ​ຂຽນ​ຂ່າວ ຈຶ່ງ​ບໍ່​ແມ່ນ​ເຮັດ​ແບບ​ເກົ່າ​ຕໍ່​ໄປ​ອີກ​ແລ້ວ ຕ້ອງ​ບຸກ​ທະ­ລຸ... ຜູ້​ຂຽນ​ໄດ້​ອ່ານ­ໜັງ­ສື​ພິມ​ວຽງ​ຈັນ​ໃໝ່ ວັນ​ທີ 29 ເມ­ສາ​ຜ່ານ​ມາ ແນວ​ລາວ ໄດ້​ຂຽນ​ກ່ຽວ​ກັບ​ບົດ­ບາດ​ສື່​ມວນ​ຊົນ​ໃນ​ວຽກ​ງານ​ກວດ­ກາ ໂດຍ​ໄດ້​ນຳ​ສະ­ເໜີ​ຄຳ​ແນະ­ນຳ​ການ­ຈັດ­ຕັ້ງ​ປະ­ຕິ­ບັດ​ກົດ­ໝາຍ ວ່າ​ດ້ວຍ​ການ​ກວດ­ກາ​ລັດ (ສະ­ບັບ​ປັບ­ປຸງ) ເລກ​ທີ 419/ອກລ ລົງ​ວັນ​ທີ 4 ທັນ­ວາ 2018.

    ເຊິ່ງ​ໃນ​ຄຳ​ແນະ­ນຳ ໄດ້​ເວົ້າ​ເຖິງ​ມາດ­ຕາ 4 ວັກ 2 ໂດຍ​ສະ­ເພາະ ໃນ​ຂໍ້ 7 ສຳ­ລັບ​ສື່​ມວນ​ຊົນ ນອກ­ຈາກ​ການ​ເຂົ້າ​ຮ່ວມ​ຕິດ­ຕາມ​ໂຄ­ສະ­ນາ​ເຜີຍ­ແຜ່​ນະ­ໂຍ­ບາຍ ກົດ­ໝາຍ ລະ­ບຽບ​ການ​ຂອງ​ລັດ ກ່ຽວ​ກັບ​ວຽກ​ງານ​ກວດ­ກາ​ແລ້ວ ຍັງ​ຕ້ອງ​ເຂົ້າ​ຮ່ວມ​ເກັບ​ກຳ​ຂ່າວ ແລະ ອອກ​ຂ່າວ​ການ­ເຄື່ອນ­ໄຫວ​ຕ່າງໆ​ຂອງ​ອົງ­ການ​ກວດ­ກາ​ລັດ​ຂັ້ນ​ຂອງ​ຕົນ ເປັນ­ຕົ້ນ ການ​ເກັບ​ກຳ​ຂ່າວ ແລະ ອອກ​ຂ່າວ​ກອງ​ປະ­ຊຸມ​ວຽກ​ງານ​ກວດ­ກາ ການ​ຈັດ​ສຳ​ມະ​ນາ​ຕ່າງໆ ການ​ເປີດ­ເຜີຍ​ຜົນ​ຂອງ​ການ​ກວດ­ກາ​ສະ­ກັດ​ກັ້ນ ແລະ ຕ້ານ​ການ​ສໍ້​ລາດ​ບັງ​ຫຼວງ ຄຳ​ພິ­ພາກ­ສາ​ຂອງ​ສານ​ທີ່​ໃຊ້​ໄດ້​ຢ່າງ​ເດັດ­ຂາດ ກ່ຽວ​ກັບ​ຄະ­ດີ​ສໍ້​ລາດ​ບັງ​ຫຼວງ​ຕາມ​ການ​ຕົກ­ລົງ​ເຫັນ​ດີ​ຂອງ​ຂັ້ນ​ເທິງ ດ້ວຍ​ຮູບ​ການ​ຕ່າງໆ​ຕາມ​ກົດ­ໝາຍ​ໄດ້​ກຳ­ນົດ.

    ກົດ­ໝາຍ​ວ່າ​ດ້ວຍ​ການ​ກວດ­ກາ​ລັດ (ສະ­ບັບ​ປັບ­ປຸງ) ມາດ­ຕາ 26 ໄດ້​ຂຽນ​ບອກ​ແຈ້ງ­ວ່າ: ຜົນ​ຂອງ​ການ​ກວດ­ກາ​ທີ່​ຖືກ​ຮັບ­ຮອງ ແລະ ໄດ້​ຮັບ​ອະ­ນຸ­ຍາດ​ຈາກ​ຜູ້​ຕົກ­ລົງ​ໃຫ້​ກວດ­ກາ ສາ­ມາດ​ເປີດ­ເຜີຍ​ດ້ວຍ​ຮູບ​ການ​ໃດ​ໜຶ່ງ​ຕາມ​ຄວາມ​ເໝາະ​ສົມ ເຊັ່ນ: (1) ແຈ້ງ​ຂ່າວ​ໃຫ້​ການ­ຈັດ­ຕັ້ງ​ທີ່​ກ່ຽວ­ຂ້ອງ (2) ແຈ້ງ​ຜົນ​ການ​ກວດ­ກາ​ສູ່​ສັງ­ຄົມ (3) ຮູບ​ການ​ອື່ນ ເມື່ອ​ເປັນ​ເຊັ່ນ​ນັ້ນ ສື່​ມວນ​ຊົນ​ພວກ​ເຮົາ​ຕ້ອງ​ໄດ້​ບຸກ​ທະ­ລຸ​ຕື່ມ​ອີກ ເພື່ອ​ເຮັດ​ສຳ­ເລັດ​ໜ້າ­ທີ່​ອັນ​ໜັກ­ໜ່ວງ ແລະ ມີ​ກຽດ​ສະ­ຫງ່າ​ງາມ​ດັ່ງ­ກ່າວ.

    ແນ່­ນອນ ການ​ທີ່​ຈະ​ເຮັດ​ສຳ­ເລັດ​ໜ້າ­ທີ່ ໂດຍ​ສະ­ເພາະ​ແມ່ນ​ການ​ນຳ​ສະ­ເໜີ​ຂ່າວ​ປາ­ກົດ­ການ​ຫຍໍ້­ທໍ້​ນັ້ນ ມັນ​ຮຽກ­ຮ້ອງ​ຫຼາຍ​ຢ່າງ ເປັນ­ຕົ້ນ​ແມ່ນ ສື່​ພວກ​ເຮົາ​ຕ້ອງ​ກຳ​ແໜ້ນ​ຕົວ​ບົດ​ກົດ­ໝາຍ​ຕ່າງໆ​ທີ່​ປິ່ນ​ອ້ອມ ໃນ​ນັ້ນ ມີ​ກົດ­ໝາຍ​ວ່າ​ດ້ວຍ​ສື່​ມວນ​ຊົນ.

    ເຖິງ​ຢ່າງ­ໃດ​ພວກ​ເຮົາ​ກໍ​ຕ້ອງ​ພ້ອມ​ກັນ​ບຸກ​ທະ­ລຸ​ນໍ ? ຂໍ​ສະ­ເໜີ​ເປັນ​ການ​ແລກ­ປ່ຽນ.

ຂ່າວທີ່ກ່ຽວຂ້ອງ