ຈັດກິດຈະກຳ ສະຫຼອງວັນກາແດງ ແລະ ຊີກວົງເດືອນແດງສາກົນ

748 15 ພ.ພ. 2019 ວົງຈອນກີລາ
ຈັດກິດຈະກຳ ສະຫຼອງວັນກາແດງ ແລະ ຊີກວົງເດືອນແດງສາກົນ

    ອົງ­ການ​ກາ­ແດງ​ລາວ ຮ່ວມ​ກັບ​ສະ­ຫະ­ພັນ​ກີ­ລາ​ລົດ­ຖີບ​ແຫ່ງ​ຊາດ ຈັດ​ກິດ­ຈະ­ກຳ​ຂີ່​ລົດ­ຖີບ ເພື່ອ​ສະ­ເຫຼີມ­ສະ­ຫຼອງ​ວັນ​ກາ­ແດງ ແລະ ຊີກ​ວົງ​ເດືອນ​ແດງ​ສາ­ກົນ ຄົບ­ຮອບ 156 ປີ (8/5/1863-8/5/2019) ຂຶ້ນ​ວັນ​ທີ 11 ພຶດ­ສະ­ພາ 2019 ຢູ່​ສວນ​ປະ­ຕູ​ໄຊ ໂດຍ​ມີ​ທ່ານ ຄຳ​ຮຸ່ງ ເຮືອງ​ວົງ​ສີ ປະ­ທານ​ອົງ­ການ​ກາ­ແດງ​ລາວ ທ່ານ ຫົງ​ຄຳ ສຸ­ວັນ­ນະ​ວົງ ປະ­ທານ​ສະ­ຫະ­ພັນ​ກີ­ລາ​ລົດ­ຖີບ​ແຫ່ງ​ຊາດ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ທອງ​ພະ­ຈັນ ສອນ​ນະ​ສິນ ຮອງ​ປະ­ທານ​ອົງ­ການ​ກາ­ແດງ​ລາວ ກ່າວ​ວ່າ: 156 ປີ­ຜ່ານ­ມາ​ກາ­ແດງ​ສາ­ກົນ ນັບ​ມື້​ເຕີບ​ໃຫຍ່​ເຂັ້ມ­ແຂງ​ດ້ານ​ການ­ຈັດ­ຕັ້ງ​ປະ­ຕິ­ບັດ ແລະ ຜັນ​ຂະ­ຫຍາຍ​ໜ້າ­ທີ່ ພາ­ລະ​ບົດ­ບາດ​ວຽກ​ງານ​ດ້ານ​ມະ­ນຸດ­ສະ­ທຳ​ໄດ້​ຢ່າງ​ກວ້າງ­ຂວາງ ປະ­ກອບ­ສ່ວນ​ຢ່າງ​ໃຫຍ່​ຫຼວງ​ໃນ​ການ​ຊ່ວຍ­ເຫຼືອ ປະ­ຊາ­ກອນ​ຜູ້​ທຸກ​ຍາກ​ທຸກ​ແຫ່ງ​ຫົນ​ຂອງ​ທົ່ວ​ທຸກ​ມູນ​ໂລກ​ຢ່າງ​ມະ­ຫາ­ສານ ໄປ​ພ້ອມ​ກັບ​ການ​ເຕີບ​ໃຫຍ່​ຂະ­ຫຍາຍ­ຕົວ ບົດ­ຮຽນ ແລະ ປະ­ສົບ​ການ​ທີ່​ໄດ້​ສະ​ສົມ​ເປັນ​ເວ­ລາ​ຍາວ​ນານ ເປັນ​ສິ່ງ​ສຳ­ຄັນ​ໃນ​ການ­ເຄື່ອນ­ໄຫວ​ມະ­ນຸດ­ສະ­ທຳ ເປັນ­ຕົ້ນ ເອົາ­ໃຈ­ໃສ່​ສະ­ພາບ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ຜູ້​ທຸກ​ຍາກ ໃຫ້​ໄດ້​ຮັບ​ການ​ພັດ­ທະ­ນາ​ດີ​ຂຶ້ນ ມີ​ຫຼາຍ​ໂຄງ­ການ​ໄດ້​ຈັດ​ຕັ້ງ​ລັກ­ສະ­ນະ​ຍາວ​ນານ ແລະ ປະ­ຊາ­ຊົນ ໄດ້​ຮັບ​ຜົນ​ປະ­ໂຫຍດ 160,2 ລ້ານ​ຄົນ ຊ່ວຍ­ເຫຼືອ​ປະ­ຊາ­ຊົນ​ຜູ້​ທີ່​ປະ­ສົບ​ໄພ­ພິ­ບັດ​ຕ່າງໆ 110 ລ້ານ​ຄົນ ຊ່ວຍ­ເຫຼືອ​ນ້ຳ​ສະ­ອາດ 26,2 ລ້ານ​ຄົນ ສັກ​ຢາ​ກັນ​ພະ­ຍາດ​ໃຫ້​ເດັກ­ນ້ອຍ 1,4 ລ້ານ​ຄົນ ຢ້ຽມ­ຢາມ​ຜູ້​ຖືກ​ຄຸມ​ຂັງ​ຄື: ສະ­ໜັບ­ສະ­ໜູນ​ສະ­ບຽງ​ອາ­ຫານ 9 ລ້ານ​ຄົນ ແລະ ຊ່ວຍ​ເຄື່ອງ​ອຸ­ປະ­ໂພກ 4,3 ລ້ານ​ຄົນ.

    ສຳ­ລັບ ສປປ ລາວ 1 ປີ­ຜ່ານ­ມາ​ອົງ­ການ​ກາ­ແດງ​ລາວ ໄດ້​ໃຫ້­ການ​ຊ່ວຍ­ເຫຼືອ​ປະ­ຊາ­ຊົນ​ທີ່​ໄດ້​ຮັບ​ຜົນ​ກະ­ທົບ​ຈາກ​ໄພ­ພິ­ບັດ ໂດຍ​ສະ­ເພາະ ສັນ​ອ່າງ​ເຂື່ອນ​ໄຟ­ຟ້າ​ເຊ​ປຽນ-ເຊ​ນ້ຳ​ນ້ອຍ​ແຕກ ແລະ ໄພ­ພິ­ບັດ​ອື່ນໆ ເຊັ່ນ: ນ້ຳ​ຖ້ວມ ໄຟ​ໄໝ້ ນ້ຳ​ໄຫຼ­ຊຸ ດິນ​ເຈື່ອນ ລົມ­ພາ­ຍຸ​ລົມ ອຸ­ບັດ­ເຫດ​ຕາມ​ຖະ­ໜົນ ແລະ ອື່ນໆ ອັນ​ພົ້ນ​ເດັ່ນ​ໄດ້​ບັນ­ເທົາ​ທຸກ 16 ແຂວງ ແລະ ນະ­ຄອນ­ຫຼວງ​ວຽງ​ຈັນ 107 ເມືອງ 924 ບ້ານ 35.943 ຄອບ­ຄົວ 188.284 ຄົນ ຍິງ 92.951 ຄົນ ມູນ​ຄ່າ​ປະ­ມານ 12,7 ຕື້​ກີບ ຮັບ​ບໍ­ລິ­ຈາກ​ເລືອດ​ໄດ້ 50.187 ຖົງ ເທົ່າ 100,3%.

    ສຳ­ລັບ​ການ​ຂີ່​ລົດ­ຖີບ​ຄັ້ງ​ນີ້ ໄດ້​ເລີ່ມ​ຕົ້ນ​ຈາກ​ປະ­ຕູ​ໄຊ-ຫໍ­ຄຳ-ປະ­ຕູ​ໄຊ ຈາກ​ນັ້ນ ໄດ້​ໄປ​ຕາມ​ຖະ­ໜົນ​ໄກ­ສອນ​ພົມ­ວິ­ຫານ ຮອດ​ວົງ­ວຽນ​ດອນ​ໜູນ​ແລ້ວ​ກັບ​ຄືນ​ປະ­ຕູ​ໄຊ.

ຂ່າວທີ່ກ່ຽວຂ້ອງ