ເບີ່ງບ້ານເຂົາເອົາບົດຮຽນ 15-05-2019

876 15 ພ.ພ. 2019 ຫົວຂໍ້ຂ່າວອື່ນໆ

     ພົບ​ກັນ​ປະຈຳ​ວັນ​ນີ້ ມີ​ເລື່ອງ​ມາ​ເລົ່າ​ສູ່​ຟັງ​ກ່ຽວ​ກັບ​ນະໂຍບາຍ​ດີໆ​ສຳລັບ​ຜູ້​ເປັນ​ພໍ່ ຫຼື ແມ່ ທີ່​ລ້ຽງ​ລູກ​ຕາມ​ລຳພັງ​ຢູ່​ຍີ່ປຸ່ນ ແລະ ເລື່ອງ​ນະໂຍບາຍ​ຂອງ​ຈີນ ເພື່ອ​ດຶງ​ດູດ​ນັກ​ສຶກ​ສາ​ຮຽນ​ຈົບ​ຢູ່​ຕ່າງປະເທດ​ໃຫ້​ກັບ​ຄືນ​ປະເທດ.

    ທີ່​ຍີ່ປຸ່ນ: ບັນຫາ​ອັດຕາ​ການ​ເກີດ​ລົດ​ໜ້ອຍ​ຖອຍ​ລົງ ແລະ ການ​ເພີ່ມ​ຂຶ້ນ​ຂອງ​ຈຳນວນ​ຜູ້​ເຖົ້າ​ນີ້ ເຮັດ​ໃຫ້​ຍີ່ປຸ່ນ​ຂາດແຄນ​ແຮງ​ງານ​ຢ່າງ​ໜັກໜ່ວງ ແນວທາງ​ແກ້​ໄຂ​ບັນຫາ​ນີ້ ໃນ​ສະເພາະ​ໜ້າ​ກໍ​ຄື​ເພີ່ມ​ການ​ນຳ​ເຂົ້າ​ແຮງ​ງານ​ຕ່າງປະເທດ​ເພື່ອ​ປ້ອນ​ຂະແໜງການ​ທີ່​ຂາດແຄນ​ແຮງ​ງານ​ສຸດໆ ແລະ ອີກ​ດ້ານ​ໜຶ່ງ​ກໍ​ແມ່ນ​ນະໂຍບາຍ​ກະ​ຕຸ້ນ​ການ​ເກີດ ດ້ວຍ​ນະໂຍບາຍ​ດີໆ​ສຳລັບ​ການ​ເບິ່ງແຍງ​ລ້ຽງ​ດູ​ລູກ ຕົວຢ່າງ​ທີ່​ເປັນ​ຂ່າວ​ອອກ​ມາ​ໃຫ້​ຮູ້ເມື່ອ 2 ປີ ກ່ອນ​ໜ້າ​ນີ້   ( ວຽງ​ຈັນ​ທາມ 23/8/2017 ) ວ່າ ລັດຖະບານ​ຍີ່ປຸ່ນ ໄດ້​ຕົກລົງ​ຊ່ວຍເຫຼືອ​ຜູ້​ເປັນ ພໍ່ ຫຼື ແມ່ ທີ່​ບໍ່​ໃດ້​ແຕ່ງດອງ ແຕ່​ມີ​ລູກ ໃຫ້​ລ້ຽງ​ດ້ວຍ​ຕົນ​ເອງ​ຕາມ​ລຳພັງ ໃນ​ເມື່ອ​ກັນ​ນັ້ນ​ທາງ​ການ​ຍີ່ປຸ່ນ​ມີ​ນະໂຍບາຍ​ຊ່ວຍເຫຼືອ​ສະເພາະ​ແຕ່​ຜູ້​ເປັນ​ພໍ່ ຫຼື​ແມ່ ທີ່​ລ້ຽງ​ລູກ ທີ່​ເກີດ​ຈາກ​ການ​ແຕ່ງດອງ​ໃນ​ອະດີດ​ພຽງ​ລຳພັງ ເຊິ່ງ​ໝາຍ​ຄວາມ​ວ່າ ພໍ່ ຫຼື ແມ່ ໄດ້​ລ້ຽງ​ລູກ​ພຽງ​ລຳພັງ​ພາຍຫຼັງ​ມີ​ການ​ຢ່າ​ຮ້າງ ຫຼື ຝ່າຍ​ໃດ​ຝ່າຍ​ໜຶ່ງ​ເສຍ​ຊີວິດ​ລົງ ສ່ວນ​ຜູ້​ທີ່​ມີ​ລູກ​ໂດຍ​ບໍ່​ມີ​ການ​ແຕ່ງດອງ​ນັ້ນ​ບໍ່​ໄດ້​ຮັບ​ນະໂຍບາຍ ມາ​ໃນ​ປັດຈຸບັນ ທາງ​ກະຊວງ ສາທາລະນະ​ສຸກ ແຮງ​ງານ ແລະ ສະຫວັດດີ​ການ​ສັງຄົມ​ຍີ່ປຸ່ນ​ໄດ້​ປັບປຸງ​ກົດໝາຍ​ຄືນໃໝ່ ເພື່ອ​ອະນຸຍາດ​ໃຫ້​ຜູ້​ເປັນ​ພໍ່ ຫຼື ແມ່ ທີ່​ລ້ຽງ​ລູກ​ທີ່​ບໍ່​ໄດ້​ເກີດ​ຈາກ​ການ​ແຕ່ງດອງ​ໄດ້​ຮັບ​ນະໂຍບາຍ​ລ້ຽງ​ລູກ​ເຊັ່ນ​ກັນ ກົດໝາຍ​ສະບັບ​ປັບປຸງ​ນີ້​ໄດ້​ມີ​ຜົນ​ບັງຄັບ​ໃຊ້​ແຕ່​ເດືອນ ເມສາ ປີ 2018 ເປັນຕົ້ນ​ມາ ນອກຈາກ​ນັ້ນ ທາງ​ກະຊວງ ຍັງ​ຈະ​ພິຈາລະນາ​ຄວາມ​ເປັນ​ໄປ​ໄດ້​ທີ່​ຈະ​ໃຫ້​ເດັກ​ພິການ ເດັກ​ເປັນ​ພະຍາດ​ຊຳ​ເຮື້ອ​ໄດ້​ຮັບ​ນະໂຍບາຍ​ດັ່ງກ່າວ​ເຊັ່ນ​ກັນ ມີ​ການ​ຄາດ​ຄະເນ​ວ່າ ຈະ​ມີ ພໍ່ ຫຼື ແມ່ ໂທນ ປະມານ 2.700 ຄົນ ຈະ​ໄດ້​ຮັບ​ຜົນ​ປະໂຫຍດ​ຈາກ​ນະໂຍບາຍ​ນຳ​ໃຊ້​ສະຖານທີ່​ລ້ຽງ​ເດັກ​ດ້ວຍ​ລາຄາ​ຜ່ອນຜັນ.

       ທີ່ ​ສປ ຈີນ: ມີ​ນະໂຍບາຍ​ດີໆ ຂອງ ​ສປ ຈີນ ທີ່​ຄວນ​ເບີ່ງ​ໄວ້​ເປັນ​ບົດຮຽນ ນັ້ນ​ກໍ​ຄື ວິທີ​ດຶງ​ດູດ​ໃຫ້​ນັກ​ສຶກ​ສາ​ທີ່​ໄປ​ຮຽນ​ຢູ່​ຕ່າງປະເທດ​ກັບ​ຄືນ​ນຳ​ເອົາ​ຄວາມ​ຮູ້ ຄວາມ​ສາມາດ ມາ​ພັດທະນາ​ປະເທດ​ຊາດ ບໍ່​ໃຫ້​ເຈີດ​ໜີ​ເລີຍ​ກາຍເປັນ​ບັນຫາ ”ສະໝອງ​ໄຫຼ” ມາດ​ຕະການ​ດຶງ​ດູດ​ນັ້ນ​ລວມ​ມີ​ຄື: ເຮັດ​ໃຫ້​ຂະ​ບວນ​ຢັ້ງຢືນ ແລະ ຮັບ​ຮູ້​ໃນ​ປະກາດ​ສະ​ນິ​ຍະ​ບັດ ຢູ່​ຕາມ​ທ້ອງຖິ່ນ​ງ່າຍດາຍ​ຂຶ້ນ ຫຼຸດຜ່ອນ​ຂັ້ນ​ຕອນ​ໃນ​ການ​ສະເໜີ​ຂໍ​ທີ່​ພັກ​ແບບ​ຖາວອນ​ໃນ​ຕົວ​ເມືອງ​ນອກຈາກ​ນັ້ນ ກໍ​ຍັງ​ມີ​ນະໂຍບາຍ​ດີໆ​ກ່ຽວ​ກັບ​ບ່ອນ​ຮ່ຳຮຽນ​ສຳລັບ​ລູກໆ​ຂອງ​ນັກ​ສຶກ​ສາ​ເຫຼົ່ານັ້ນ​ອີກ​ດ້ວຍ ທາງ​ການ ​ສປ ຈີນ ໃຫ້​ຮູ້​ວ່າ ໃນ​ໄລຍະ​ຊຸມ​ປີ​ຫຼັງໆ​ມາ​ນີ້ ນັກ​ສຶກ​ສາ​ຈີນ​ທີ່​ຮຽນ​ຈົບ​ຢູ່​ຕ່າງປະເທດ​ນັ້ນ​ໄດ້​ເລືອກ​ກັບ​ຄືນ​ປະເທດ​ຫຼາຍ​ຂຶ້ນ ເພື່ອ​ເຂົ້າ​ຮ່ວມ​ຂະ​ບວນ​ການ​ສ້າງ​ວັດຕະ​ກຳ ກໍ​ຄື​ການ​ດຳເນີນ​ທຸລະ​ກິດ ແຕ່​ປີ 1978 ຫາ​ປີ 2017 ຈຳນວນ​ນັກ​ສຶກ​ສາ​ຈີນ​ທີ່​ກັບ​ຄືນ​ປະເທດ ພາຍຫຼັງ​ຮຽນ​ຈົບ​ນັ້ນ​ມີ 83,73% ເທົ່າ​ກັບ 3.132 ຄົນ ເວົ້າ​ສະເພາະ ໃນ​ປີ 2017 ປີ​ດຽວ​ເທົ່າ​ນັ້ນ​ກໍ​ມີ​ນັກ​ສຶກ​ສາ​ຮຽນ​ຈົບ​ກັບ​ຄືນ​ປະເທດ​ເຖິງ 480.900 ຄົນ ເພີ່ມ​ຂຶ້ນ 11,19% ທຽບໃສ່​ປີ 2016.

ຂ່າວທີ່ກ່ຽວຂ້ອງ