ຂ່າວຫຼ້າສຸດ

ລ້ຽງ​ງົວ​ບຣາ​ມັນ​​ສ ເປັນ​ສິນຄ້າ​ສ້າງ​ລາຍ​ຮັບ​ໃຫ້​ຟາມ ແລະ ຊາວ​ກະສິກອນ

1.191 15 ພ.ພ. 2019 ຂ່າວໜ້າ​ໜຶ່ງ
ລ້ຽງ​ງົວ​ບຣາ​ມັນ​​ສ ເປັນ​ສິນຄ້າ​ສ້າງ​ລາຍ​ຮັບ​ໃຫ້​ຟາມ ແລະ ຊາວ​ກະສິກອນ

    ເພື່ອ​ສ້າງ​ເສດຖະກິດ ແລະ ເຮັດ​ໃຫ້​ຊີວິດ​ການ​ເປັນ​ຢູ່​ຂອງ​ຄອບຄົວ​ນັບ​ມື້​ນັບ​ດີ​ຂຶ້ນ ແລະ ສາມາດ​ຫຼຸດ​ພົ້ນ​ຈາກ​ຄວາມທຸກ​ຍາກ ຕາມ​ນະໂຍບາຍ​ຂອງ​ພັກ-ລັດ​ວາງ​ອອກ ເຮັດ​ໃຫ້​ຫຼາຍ​ຄົນ​ຫັນ​ມາ​ລ້ຽງສັດ ໂດຍ​ສະເພາະ ລ້ຽງ​ງົວ ເປັນ​ສິນຄ້າ ໂດຍ​ໄດ້​ມີ​ການ​ນຳ​ພັນ​ງົວ​ຈາກ​ຕ່າງປະເທດ​ເຂົ້າ​ມາ​ປະສົມ​ກັບ​ພັນ​ພື້ນ​ບ້ານ ເພື່ອ​ໃຫ້​ໄດ້​ຊີ້ນ​ຫຼາຍ ຕອບ​ສະໜອງ​ຄວາມ​ຕ້ອງການ​ຂອງ​ຕະຫຼາດ ແລະ ຜູ້​ບໍລິໂພກ​ທີ່​ນັບ​ມື້​ຫຼາຍ​ຂຶ້ນ ຈຶ່ງ​ມີ​ນັກທຸລະກິດ​ຈຳນວນ​ໜຶ່ງ​ນຳ​ເອົາ​ແນວ​ພັນ​ງົວ​ທີ່​ໃຫ້​ຜົນ​ຜະລິດ​ສູງ​ຈາກ​ຕ່າງປະເທດ​ເຂົ້າ​ມາ​ລ້ຽງ ຂະຫຍາຍ​ພັນ​ຢູ່​ຟາມ​ງົວ​ບຣາ​ມັນ​​ສ (Brahmans) ຢູ່​ບ້ານ​ໜອງ​ໜ່ຽງ ເມືອງ​ໄຊ​ເສດ​ຖາ ນະຄອນຫຼວງ​ວຽງ​ຈັນ.

    ທ່ານ ຫັດສະດີ ທີລະ​ກຸນ ປະທານ​ບໍລິສັດ​ຂະ​ຍຸງ​ຄຳ​ທີລະ​ກຸນ​ຂຸດ​ຄົ້ນ​ແຮ່​ທາດ ເຈົ້າ​ຂອງ​ຟາມ​ງົວ Brahmans ປະທານ​ສະຫະພັນ​ງົວ​ສວຍ​ງາມ-ຄວາຍ​ສວຍ​ງາມ​ແຫ່ງ​ຊາດ ໃຫ້​ສຳພາດ​ວັນ​ທີ 10 ພຶດສະພາ 2019 ວ່າ: ຍ້ອນ​ຄວາມ​ມັກ-ຮັກ​ໃນ​ການ​ລ້ຽງສັດ ຈຶ່ງ​ໄດ້​ໄປ​ສຶກ​ສາ​ດ້ານ​ວິຊາ​ການ​ຢູ່​ປະເທດ​ເພື່ອນ​ບ້ານ ຈາກ​ນັ້ນ ກໍ​ໄດ້​ປ່ຽນ​ຈາກ​ການ​ລ້ຽງ​ງົວ​ແບບ​ທຳ​ມະ​ດາ 200-300 ໂຕ ພັດທະນາ​ເປັນ​ຟາມ​ງົວ​ໃຫ້​ເທົ່າ​ທຽມ​ກັບ​ປະເທດ​ໃກ້​ຄຽງ ໂດຍ​ການ​ຈັດ​ສັນ​ງົວ​ຈາກ ສ ອາ​ເມ​ຣິ​ກາ ທີ່​ເປັນ​ປະເທດ​ຕົ້ນ​ແບບ​ໃນ​ການ​ຜະລິດ​ງົວ​ອາ​ເມ​ຣິ​ກາ Brahmans ຈາກ​ນັ້ນ ກໍ​ໄດ້​ສຶກ​ສາ​ຢ່າງ​ລະອຽດ ຈຶ່ງ​ຕັດສິນ​ໃຈ​ລົງທຶນ​ເຂົ້າ​ໄປ​ຫາ​ນ້ຳເບີ 1 ຂອງ​ພັນ​ງົວ​ອາ​ເມ​ຣິ​ກາ ໂດຍ​ນຳ​ເອົາ​ງົວ​ດັ່ງກ່າວ​ມາ​ພັດທະນາ​ຢູ່​ຟາມ ແຕ່​ປີ 2017 ເປັນຕົ້ນ​ມາ ເຊິ່ງ​ຈຸດ​ດີ​ຂອງ​ງົວ Brahmans ແມ່ນ​ເປັນ​ງົວ​ຄຳຮູ້ ລ້ຽງ​ງ່າຍ ທົນ​ທານ​ຕໍ່​ສະພາບ​ອາກາດ ພະຍາດ ແລະ ບໍ່​ເລືອກ​ອາຫານ ຖ້າ​ເອົາ​ງົວ Brahmans ປະສົມ​ກັບ​ງົວ​ພື້ນ​ບ້ານ ຈະ​ເຮັດ​ໃຫ້​ໄດ້​ນ້ຳໜັກ​ຈາກ 70-80 ກິ​ໂລ​ຕໍ່​ໂຕ ເປັນ 200-300 ກິ​ໂລ​ຕໍ່​ໂຕ ເຊິ່ງ​ເຮັດ​ໃຫ້​ຊາວ​ກະສິກອນ​ມີ​ລາຍ​ຮັບ​ເພີ່ມ​ຂຶ້ນ.

    ພວກ​ເຮົາ​ລ້ຽງ​ແບບ​ຂັງ ໃຫ້​ອາຫານ​ສຳເລັດ​ຮູບ​ນຳ​ເຂົ້າ​ຈາກ​ປະເທດ​ໃກ້​ຄຽງ ເຟືອງ ຫຍ້າ​ເນ​ເປຍ ຫຍ້າ​ແຟ​ໂກ​ລາ ແລະ ຫຍ້າ​ທົ່ວ​ໄປ ອາບນ້ຳ​ຢ່າງ​ຕ່ຳ​ອາທິດ​ລະ 3 ຄັ້ງ ອະນາໄມ​ຄອກ ແລະ ອະນາໄມ​ຂົນ​ໃຫ້​ສະອາດ ປັດຈຸບັນ​ພວກ​ເຮົາ​ມີ​ງົວ Brahmans 30 ກວ່າ​ໂຕ ໃນ​ນີ້ ມີ​ພໍ່​ພັນ 2 ໂຕ ຈາກ​ເບື້ອງ​ຕົ້ນ​ມີ 3 ໂຕ ແລະ ການ​ລ້ຽງ​ມີ​ເປົ້າ​ໝາຍ ຄື: ລ້ຽງ​ເພື່ອ​ສ້າງ​ລາຍ​ຮັບ​ໃຫ້​ຟາມ ທີ່​ຜ່ານ​ມາ​ໄດ້​ສົ່ງ​ເຂົ້າ​ຮ່ວມ​ແຂ່ງຂັນ​ງົວ​ສວຍ​ງາມ​ຢູ່​ປະເທດ​ໃກ້​ຄຽງ​ຫຼາຍ​ຄັ້ງ ແລະ ມີ 2 ຄັ້ງ​ໄດ້​ຮັບ​ລາງວັນ ຈຶ່ງ​ເຮັດ​ໃຫ້​ງົວ​ມີ​ຄຸນຄ່າ ປະເທດ​ໃກ້​ຄຽງ​ມາ​ຊື້​ເພື່ອ​ໄປ​ຂະຫຍາຍ​ແນວ​ພັນ​ຕໍ່ ເຊິ່ງ​ສາມາດ​ສ້າງ​ລາຍ​ຮັບ​ໃຊ້​ຊາວ​ກະສິກອນ​ເພີ່ມ​ຂຶ້ນ ຈາກ​ລ້ຽງ​ງົວ​ພື້ນ​ບ້ານ ລາຄາ​ປະມານ 3 ລ້ານ​ກີບ ສ່ວນ​ງົວ Brahmans ລາຄາ 25-50 ລ້ານ​ກີບ ຜ່ານ​ການ​ລ້ຽງ​ໃນ​ໄລຍະ​ຜ່ານ​ມາ ກໍ​ພົບ​ສິ່ງ​ທ້າ​ທາຍ ໂດຍ​ສະເພາະ ຂາດ​ວິຊາ​ການ​ທີ່​ເກ່ງ ແຕ່​ປັດຈຸບັນ​ພວກ​ເຮົາ​ມີ​ວິຊາ​ການ​ປະເທດ​ໃກ້​ຄຽງ​ມາ​ຖ່າຍ​ທອດ​ຄວາມ​ຮູ້​ໃຫ້​ວິຊາ​ການ​ລາວ​ເດືອນ​ລະ 2 ຄັ້ງ ເຮັດ​ໃຫ້​ວິຊາ​ການ​ລາວ​ເລີ່ມ​ເກ່ງ​ດ້ານ​ວິຊາ​ການ​ຫຼາຍ​ຂຶ້ນ ນອກ​ນີ້ ກໍ​ຢາກ​ໃຫ້​ພາກ​ລັດ ກໍ​ຄື ພາກສ່ວນ​ກ່ຽວຂ້ອງ​ລົງ​ມາ​ເບິ່ງ​ບັນຫາ​ທີ່​ຫຍຸ້ງຍາກ ໂດຍ​ສະເພາະ ການ​ນຳ​ເຂົ້າ​ອາຫານ ແລະ ງົວ​ຈາກ​ຕ່າງປະເທດ ມີ​ການ​ເກັບ​ພາສີ​ແພງ.

    ໃນຕໍ່ໜ້າ​ພວກ​ເຮົາ​ມີ​ແຜນ​ຂະຫຍາຍ​ແມ່​ພັນ​ໃຫ້​ໄດ້ 100 ໂຕ ແມ່​ພັນ​ໜຶ່ງ​ໂຕ​ໄດ້​ລູກ 5-10 ໂຕ ຂະຫຍາຍ​ເນື້ອທີ່​ປູກ​ຫຍ້າ​ໃຫ້​ຫຼາຍ​ຂຶ້ນ ລ້ຽງ​ງົວ​ຊີ້ນ​ສະໜອງ​ໃຫ້​ຕະຫຼາດ ຮັກສາ​ງົວ​ໂຕ​ທີ່​ງາມ​ເປັນ​ແນວ​ພັນ ຜະລິດ​ນ້ຳ​ເຊື້ອ​ໃຫ້​ເປັນ​ໂຕ​ແມ່​ເພື່ອ​ສະໜອງ​ໃຫ້​ຊາວ​ກະສິກອນ ສ່ວນ​ຊາວ​ກະສິກອນ​ລ້ຽງ​ງົວ​ທີ່​ມີ​ຄວາມ​ສົນໃຈ​ຢາກ​ລ້ຽງ​ງົວ Brahmans ຟາມ​ພວກ​ເຮົາ​ສາມາດ​ຖອດ​ຖອນ​ບົດຮຽນ ແລະ ສະໜອງ​ນ້ຳ​ເຊື້ອ​ງົວ​ໃຫ້​ເພື່ອ​ໄປ​ປະສົມ​ໃສ່​ງົວ​ຕົນ​ເອງ​ໃຫ້​ມີ​ນ້ຳໜັກ ນອກ​ນີ້ ຍັງ​ມີ​ງົວ​ນ້ອຍ​ສະໜອງ​ໃຫ້ ພ້ອມ​ວິຊາ​ການ​ລາວ​ທີ່​ຈະ​ໃຫ້​ຄວາມ​ຮູ້​ຕື່ມ. 

ຂ່າວທີ່ກ່ຽວຂ້ອງ