ຂ່າວຫຼ້າສຸດ

ທົ່ງ​ໄຫ​ຫີນ ຖືກ​ຮັບຮອງ​ເປັນ​ມໍລະດົກ​ໂລກ​ແຫ່ງ​ທີ 3

1.068 15 ພ.ພ. 2019 ຂ່າວໜ້າ​ໜຶ່ງ
ທົ່ງ​ໄຫ​ຫີນ ຖືກ​ຮັບຮອງ​ເປັນ​ມໍລະດົກ​ໂລກ​ແຫ່ງ​ທີ 3

    ທົ່ງ​ໄຫ​ຫີນ​ຊຽງ​ຂວາງ ຖືກ​ຮັບຮອງ​ເປັນ​ມໍລະດົກ​ໂລກ​ຈາກ​ອົງການ​ຢູ​ເນ​​ສ​ໂກ ແລ້ວ​ເປັນ​ແຫ່ງ​ທີ 3 ຂອງ​ລາວ ຖັດ​ຈາກ​ຫຼວງ​ພະ​ບາງ ແລະ ຜາສາດ​ຫີນ​ວັດ​ພູ​ຈຳປາ​ສັກ ອີງ​ຕາມ​ການ​ເປີດເຜີຍ​ຂອງ​ທ່ານ ທອງ​ໃບ ໂພທິ​ສານ ຫົວໜ້າ​ກົມ​ມໍລະດົກ ກະຊວງ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ ຜ່ານ​ເຟດ​ບຸກ​ສ່ວນ​ຕົວ​ໃນ​ວັນ​ທີ 14 ພຶດສະພາ 2019.

    ທ່ານ ທອງ​ໃບ ໂພທິ​ສານ ໄດ້​ໃຫ້​ຮູ້​ວ່າ: ໃນ​ທີ່​ສຸດ​ທົ່ງ​ໄຫ​ຫີນ​ແຂວງ​ຊຽງ​ຂວາງ ກໍ​ໄດ້​ຖືກ​ຮັບຮອງ​ເຂົ້າ​ເປັນ​ມໍລະດົກ​ໂລກ​ແຫ່ງ​ທີ 3 ຂອງ ​ສປປ ລາວ ເຊິ່ງ​ຄາດ​ວ່າ​ຈະ​ໄດ້​ຖືກ​ປະກາດ​ຮັບຮອງ​ຢ່າງ​ເປັນ​ທາງ​ການ ໃນ​ກອງ​ປະຊຸມ​ຄະນະ​ກຳມະການ​ມໍລະດົກ​ໂລກ ຄັ້ງ​ທີ 43 ເຊິ່ງ​ຈະ​ຈັດ​ຂຶ້ນ​ໃນ​ລະຫວ່າງ​ວັນ​ທີ 30 ມິຖຸນາ ຫາ ວັນ​ທີ 7 ກໍລະກົດ 2019 ທີ່​ຈະ​ເຖິງ​ນີ້ ຢູ່​ທີ່​ປະເທດ​ອາ​ແຊັກ​ບາຍ​ຊານ.

    ອີງ​ຕາມ​ຂໍ້​ມູນ​ຂອງ​ກະຊວງ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ ໃນ​ປີ 2018 ລັດຖະບານ​ລາວ ໄດ້​ສົ່ງ ເອກະສານ​ຕ່າງໆ​ຫາ​ອົງການ​ຢູ​ເນ​​ສ​ໂກ ເພື່ອ​ໃຫ້​ຮັບຮອງ​ເອົາ​ທົ່ງ​ໄຫ​ຫີນ​ຊຽງ​ຂວາງ​ເຂົ້າ​ເປັນ​ມໍລະດົກ​ໂລກ ຫຼັງ​ຈາກ​ທີ່​ລັດຖະບານ​ໄດ້​ຮັບຮອງ​ເອົາ​ເອກະສານ​ທີ່​ຈຳເປັນ​ຕ່າງໆ​ເມື່ອ​ປີ 2017 ການ​ກວດ​ສອບ​ຂອງ​ອົງການ​ຢູ​ເນ​​ສ​ໂກ ໂດຍ​ທົ່ວ​ໄປ​ແລ້ວ​ໃຊ້​ເວລາ​ປະມານ 18 ເດືອນ.

    ທົ່ງ​ໄຫ​ຫີນ​ແຂວງ​ຊຽງ​ຂວາງ ປະກອບ​ດ້ວຍ​ພື້ນ​ທີ່​ຍ່ອຍ 11 ແຫ່ງ​ຢັ່ງຢາຍ​ກວມ​ເອົາ​ພື້ນ​ທີ່​ປະມານ 200 ເຮັກຕາ ໃນ​ເມືອງ​ຄຳ ຜາ​ໄຊ ແປກ ແລະ ພູ​ກູດ ພື້ນ​ທີ່​ດັ່ງກ່າວ​ນີ້​ມີ​ວັດຖຸ​ທີ່​ເອີ້ນ​ວ່າ ໄຫ​ຫີນ​ຫຼາຍ​ກວ່າ 1.000 ໜ່ວຍ.

ຂ່າວທີ່ກ່ຽວຂ້ອງ