ຂ່າວຫຼ້າສຸດ

ລາວ ຈະ​ມີ​ລະບົບ​ເກັບ​ກຳ​ຂໍ້​ມູນ ຟາມ​ລ້ຽງສັດ​ຜ່ານ​ລະບົບ​ອອນ​ລາຍ

842 15 ພ.ພ. 2019 ຂ່າວໜ້າ​ໜຶ່ງ
ລາວ ຈະ​ມີ​ລະບົບ​ເກັບ​ກຳ​ຂໍ້​ມູນ ຟາມ​ລ້ຽງສັດ​ຜ່ານ​ລະບົບ​ອອນ​ລາຍ

     ພິທີ​ລົງ​ນາມ​ບົດ​ບັນທຶກ​ຄວາມ​ເຂົ້າໃຈ​ກ່ຽວ​ກັບ​ໂຄງການ​ສ້າງ​ລະບົບ​ເກັບ​ກຳ​ຂໍ້​ມູນ​ຟາມ​ລ້ຽງສັດ ໂດຍ​ຜ່ານ​ລະບົບ​ອອນ​ລາຍ ຈັດ​ຂຶ້ນ​ວັນ​ທີ 13 ພຶດສະພາ 2019 ຢູ່​ກະຊວງ​ກະສິກຳ ແລະ ປ່າໄມ້ ລະຫວ່າງ ທ່ານ ສົມ​ພັນ ຈັນ​ເພັງ​ໄຊ ຫົວໜ້າ​ກົມ​ລ້ຽງສັດ ແລະ ການ​ປະມົງ ແລະ ທ່ານ ດາວ ຮາ ຈຸງ ປະທານ​ບໍລິສັດ​ເທ​ຟູດ​ສາກົນ ຈີ​ເອັມ​ບີ​ເຮັດ ປະເທດ​ເຢຍ​ລະ​ມັນ (TE-Food International Gmbh) ໂດຍ​ມີ​ທ່ານ ບຸນ​ຂວາງ ຄຳ​ບຸນ​ເຮືອງ ຮອງ​ລັດຖະມົນຕີ​ກະຊວງ​ກະສິກຳ ແລະ ປ່າໄມ້ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

    ຄວາມ​ປອດ​ໄພ​ດ້ານ​ອາຫານ ແມ່ນ​ວຽກ​ບຸລິມະສິດ​ໜຶ່ງ​ຂອງ​ລັດຖະບານ​ທີ່​ໄດ້​ສຸມ​ໃສ່ ແລະ ສ້າງ​ຫຼາຍ​ໂຄງການ ເພື່ອ​ແກ້​ໄຂ​ບັນຫາ​ນີ້​ຢ່າງ​ຕັ້ງໜ້າ​ມາ​ໂດຍ​ຕະຫຼອດ ແຕ່​ຍັງ​ບໍ່​ທັນ​ສາມາດ​ຄວບ​ຄຸມ ແລະ ຮັບປະກັນ​ໄດ້​ເທົ່າ​ທີ່​ຄວນ ໂດຍ​ສະເພາະ ຟາມ​ລ້ຽງສັດ​ຂອງ​ຜູ້​ປະກອບ​ການ ພາກ​ເອກະ​ຊົນ ແລະ ຊາວ​ກະສິກອນ (ເປັນ​ຜູ້​ຜະລິດ​ອາຫານ) ຕ້ອງ​ໄດ້​ຮັບ​ການ​ພັດທະນາ ເພື່ອ​ໃຫ້​ເຂົ້າ​ມາດຕະຖານ​ສາກົນ​ດ້ານ​ຟາມ​ລ້ຽງສັດ​ທີ່​ດີ ເພື່ອ​ສາມາດ​ກວດ​ສອບ​ຄືນ​ທີ່​ມາ​ຂອງ​ອາຫານ​ໄດ້ ແລະ ວຽກ​ດັ່ງກ່າວ​ແມ່ນ​ໜ້າທີ່​ຂອງ​ພາກ​ລັດ ກໍ​ຄື ກົມ​ລ້ຽງສັດ ແລະ ການ​ປະມົງ ມີໜ້າ​ທີ່​ຄຸ້ມ​ຄອງ ພັດທະນາ ແລະ ຊຸກຍູ້​ສົ່ງເສີມ​ໃຫ້​ເຂົ້າ​ລະບົບ​ການ​ລ້ຽງສັດ​ແບບ​ເປັນ​ຟາມ​ທີ່​ດີ ໃນ​ປັດຈຸບັນ​ບັນຫາ​ການ​ຂາດ​ຂໍ້​ມູນ​ລາຍ​ງານ​ໃນ​ຟາມ​ສັດລ້ຽງ ເປັນຕົ້ນ ລາຍ​ງານ​ຊັກ​ຊ້າ ແລະ ຂາດ​ຄວາມ​ເຊື່ອ​ຖື ເປັນ​ບັນຫາ​ທີ່​ຕ້ອງ​ໄດ້​ແກ້​ໄຂ.

    ເພື່ອ​ສາມາດ​ຄຸ້ມ​ຄອງ ວາງ​ແຜນ​ພັດທະນາ ແລະ ຄວບ​ຄຸມ​ການ​ລະບາດ​ຂອງ​ພະຍາດ​ຢູ່​ໃນ​ຟາມ​ລ້ຽງສັດ ກົມ​ລ້ຽງສັດ ແລະ ການ​ປະມົງ ຈິ່ງ​ໄດ້​ຮ່ວມ​ກັບ​ບໍລິສັດ TE-Food ສາກົນ ສ້າງ​ໂຄງການ ຫຼື ກິດຈະກຳ​ການ​ເກັບ​ກຳ​ຂໍ້​ມູນ​ຟາມ​ລ້ຽງສັດ ໂດຍ​ຜ່ານ​ລະບົບ​ແອັບ​ພິ​ເຄ​ຊັນ​ໂທລະສັບ​ມື​ຖື ເຊິ່ງ​ຈະ​ເປັນ​ການ​ລາຍ​ງານ​ທີ່​ແນ່ນອນ ແລະ ລາຍ​ງານ​ຈາກ​ຟາມ​ໂດຍ​ກົງ​ໄດ້​ທຸກ​ເວລາ ແລະ ຂໍ້​ມູນ​ທີ່​ໄດ້​ຈາກ​ລະບົບ​ນີ້​ມີ​ຄວາມ​ປອດ​ໄພ​ສູງ ທັງ​ໃນ​ດ້ານ​ການ​ປ້ອງ​ກັນ​ການ​ລັກລອບ​ຂໍ້​ມູນ ແລະ ປ່ຽນແປງ​ຂໍ້​ມູນ ເພື່ອ​ໃຫ້​ມີ​ຂໍ້​ມູນ​ສະຖິຕິ​ຝູງ​ສັດ ຈາກ​ການ​ລ້ຽງ​ແບບ​ເປັນ​ຟາມ​ມີ​ຄວາມ​ຖືກຕ້ອງ ວ່ອງໄວ ແລະ ຊັດ​ເຈນ.

ຂ່າວທີ່ກ່ຽວຂ້ອງ