ຍີ່ປຸ່ນ ໃຫ້​ທຶນ​ສະໜັບສະໜູນ​ໂຄງການ​ພັດທະນາ​ເດັກນ້ອຍ​ລາວ

566 15 ພ.ພ. 2019 ຂ່າວໜ້າ​ໜຶ່ງ
ຍີ່ປຸ່ນ ໃຫ້​ທຶນ​ສະໜັບສະໜູນ​ໂຄງການ​ພັດທະນາ​ເດັກນ້ອຍ​ລາວ

    ພິທີ​ລົງ​ນາມ​ບົດ​ບັນທຶກ​ຄວາມ​ເຂົ້າໃຈ​ໂຄງການ​ພັດທະນາ​ເດັກນ້ອຍ​ລາວ ຈັດ​ຂຶ້ນ​ວັນ​ທີ 14 ພຶດສະພາ 2019 ຢູ່​ກະຊວງ​ສຶກ​ສາ​ທິ​ການ ແລະ ກີລາ (​ສສກ) ລະຫວ່າງ ທ່ານ ບັນຈົງ ລັດ​ທະ​ວັນ ຮອງ​ຫົວໜ້າ​ກົມ​ສາມັນ​ສຶກ​ສາ ກະຊວງ ​ສສກ ແລະ ທ່ານ​ນາງ ຈັນທະ​ສອນ ອິນ​ທະ​ວົງ ປະທານ​ອົງການ​ສະມາຄົມ​ຮ່ວມ​ນ້ຳໃຈ​ກັບ​ເດັກນ້ອຍ​ລາວ (ALC) ມີ​ຜູ້ຕາງໜ້າ​ຈາກ​ກະຊວງ ​ສສກ ພະ​ແນກ ​ສສກ ແຂວງ​ວຽງ​ຈັນ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

    ທຶນ​ສະໜັບສະໜູນ​ໂຄງການ​ນີ້ ມູນ​ຄ່າ 433.300 ໂດ​ລາ​ສະຫະລັດ ຫຼື ປະມານ 3 ຕື້​ກີບ ເຊິ່ງ​ໄດ້​ຈາກ​ກະຊວງ​ການ​ຕ່າງປະເທດ​ຍີ່ປຸ່ນ ກອງ​ທຶນ oki volunteer ບໍລິສັດ CANON NC ມະຫາວິທະຍາໄລ​ແມ່ຍິງ Gakushuin ແລະ ຜູ້​ໃຫ້​ສ່ວນ​ຕົວ ຈາກ​ປະເທດ​ຍີ່ປຸ່ນ ຊຶ່ງ​ທຶນ​ດັ່ງກ່າວ​ຈະ​ນຳ​ໃຊ້​ໃນ​ໂຄງການ​ໃນ​ການ​ສົ່ງເສີມ​ທັກ​ສະ​ໃນ​ການ​ອ່ານ ຂະຫຍາຍ​ໂອກາດ​ການ​ເຂົ້າ​ເຖິງ​ການ​ອ່ານ ແລະ ພັດທະນາ​ການ​ສຶກ​ສາ​ໃຫ້​ເດັກນ້ອຍ​ລາວ ເພື່ອ​ປູກຝັງ​ນິໄສ​ຮັກ​ການ​ອ່ານ ປະກອບສ່ວນ​ພັດທະນາ​ຊັບພະຍາກອນ​ມະນຸດ ກິດຈະກຳ​ຂອງ​ໂຄງການ​ແມ່ນ​ປຸກ​ສ້າງ​ຫ້ອງ​ສະໝຸດ​ໃນ​ໂຮງຮຽນ​ມັດທະຍົມ ແລະ ສ້າງ​ຄວາມ​ເຂັ້ມແຂງ​ໃຫ້​ພະນັກງານ ອາສາ​ສະໝັກ ແລະ ຈັດ​ພິມ​ປຶ້ມ​ອ່ານ​ສຳລັບ​ເດັກນ້ອຍ.

    ໂຄງການ​ດັ່ງກ່າວ ຈະ​ຈັດ​ຕັ້ງ​ປະຕິບັດ​ນັບ​ແຕ່​ມື້​ລົງ​ລາຍ​ເຊັນ​ເປັນຕົ້ນ​ໄປ ເຖິງ​ວັນ​ທີ 31 ທັນວາ 2021 ຢູ່​ເມືອງ​ຫີນ​ເຫີບ ແລະ ເມືອງ​ໂພນ​ໂຮງ ແຂວງ​ວຽງ​ຈັນ.

ຂ່າວທີ່ກ່ຽວຂ້ອງ