ຂ່າວຫຼ້າສຸດ

ເລັ່ງເກັບກຳຂໍ້ມູນປະເມີນຄວາມເສຍຫາຍ ເຫດໄຟໄໝ້ສູນການຄ້າລາວ-ໄອເຕັກ

882 14 ພ.ພ. 2019 ຂ່າວໜ້າ​ໜຶ່ງ
ເລັ່ງເກັບກຳຂໍ້ມູນປະເມີນຄວາມເສຍຫາຍ ເຫດໄຟໄໝ້ສູນການຄ້າລາວ-ໄອເຕັກ

    ເຫດ​ໄຟ​ໄໝ້​ສູນ​ການ​ຄ້າ​ລາວ-ໄອ​ເຕັກ (ຕຶກ​ເກົ່າ) ເວ­ລາ​ປະ­ມານ 8:40 ໂມງ ວັນ​ທີ 10 ພຶດ­ສະ­ພາ 2019 ເຮັດ​ໃຫ້​ສິນ­ຄ້າ​ຂອງ​ບັນ­ດາ​ຜູ້​ປະ­ກອບ​ການ​ພາຍ​ໃນ ແລະ ຕ່າງ­ປະ­ເທດ ໄດ້​ຮັບ​ຄວາມ​ເສຍ​ຫາຍ​ຈຳ­ນວນ​ໜຶ່ງ ເຊິ່ງ​ບໍ­ລິ­ສັດ​ລາວ​ເວີນ​ມະ­ຫາ­ຊົນ (ເຈົ້າ​ຂອງ​ສູນ​ການ​ຄ້າ​ລາວ-ໄອ​ເຕັກ) ຢືນ­ຢັນ​ຈະ​ເລັ່ງ​ເກັບ​ກຳ​ຜົນ​ເສຍ​ຫາຍ ພ້ອມ​ທັງ​ປັບ­ປຸງ​ອາ­ຄານ​ໃຫ້​ສຳ­ເລັດ ແລະ ບໍ­ລິ­ການ​ໃນ​ເດືອນ​ກໍ­ລະ­ກົດ.

    ບໍ­ລິ­ສັດ ລາວ​ເວີນ​ມະ­ຫາ­ຊົນ ຮ່ວມ​ກັບ​ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ​ລາວ ຈັດ​ພິ­ທີ​ຖະ­ແຫຼງ​ຂ່າວ​ກ່ຽວ​ກັບ​ການ​ຈັດ​ງານ ແລະ ເຫດ​ໄຟ​ໄໝ້ ສູນ​ການ​ຄ້າ​ດັ່ງ­ກ່າວ ຂຶ້ນ​ວັນ​ທີ 10 ພຶດ­ສະ­ພາ 2019 ໂດຍ​ມີ​ທ່ານ ສີ​ບຸນ​ທຳ ສີ​ບຸນ​ມີ ຜູ້­ອຳ­ນວຍ­ການ​ໃຫຍ່​ບໍ­ລິ­ສັດ ລາວ​ເວີນ​ມະ­ຫາ­ຊົນ ທ່ານ​ນາງ ຈັນ­ທະ​ຈອນ ວົງ​ໄຊ ຮອງ​ປະ­ທານ​ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ​ລາວ ພ້ອມ​ດ້ວຍ​ຜູ້​ປະ­ກອບ​ການ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ສີ​ບຸນ​ທຳ ສີ​ບຸນ​ມີ ກ່າວ​ວ່າ: ເວ­ລາ 8:35 ໂມງ ພະ­ນັກ­ງານ​ສູນ​ການ​ຄ້າ​ພວກ​ເຮົາ​ໄດ້​ໄປ​ກວດ­ກາ ເປີດ​ໄຟ­ຟ້າ ແລະ ແອ ເພື່ອ​ຮອງ​ຮັບ​ລູກ​ຄ້າ ຊາວ​ຄ້າ-ຂາຍ​ທີ່​ຈະ​ເຂົ້າ​ມາ​ເວ­ລາ 9:00 ໂມງ ແຕ່​ເວ­ລາ​ນັ້ນ​ເຫັນ​ໄຟ​ລຸກ­ຂຶ້ນ​ຢູ່​ເຂດ​ເບື້ອງ​ຊ້າຍ (ເບິ່ງ​ຈາກ​ດ້ານ​ໜ້າ​ສູນ​ການ​ຄ້າ) ຈຸດ​ຮ້ານ​ຄ້າ​ປະ­ດັບ​ລົດ­ຍົນ ເຊິ່ງ​ພະ­ນັກ­ງານ 5 ຄົນ ກໍ​ໄດ້​ໃຊ້​ບັ້ງ​ດັບ​ເພີງ​ໄປ​ສີດ​ໃສ່ ແຕ່​ຍ້ອນ​ຮ້ານ​ດັ່ງ­ກ່າວ​ມີ​ປະ­ເພດ​ກະ​ປ໋ອງ​ເຄ​ມີ ແລະ ເຄື່ອງ​ຊັກ​ນຳ​ໄຟ ຈຶ່ງ​ບໍ່​ສາ­ມາດ​ຄວບ​ຄຸມ​ໄຟ​ໄດ້ ຈຶ່ງ​ໂທ​ຂໍ​ຄວາມ​ຊ່ວຍ­ເຫຼືອ​ຈາກ​ເຈົ້າ​ໜ້າ­ທີ່​ດັບ​ເພີງ​ນະ­ຄອນ­ຫຼວງ​ວຽງ​ຈັນ ເຊິ່ງ​ໃຊ້​ເວ­ລາ​ດັບ 45 ນາ­ທີ ຈຶ່ງ​ສາ­ມາດ​ຄວບ​ຄຸມ​ໄຟ​ໄດ້ ປັດ­ຈຸ­ບັນ​ເຈົ້າ​ໜ້າ­ທີ່​ກຳ­ລັງ​ເກັບ​ຫຼັກ​ຖານ​ຈາກ​ກ້ອງ​ວົງ​ຈອນ​ປິດ ເພື່ອ​ໄປ​ກວດ​ສອບ​ຕົວ​ຈິງ ແລະ ຈາກ​ການ​ສຳ​ຫຼວດ​ເບື້ອງ​ຕົ້ນ​ມີ 24 ຮ້ານ​ໄດ້​ຮັບ​ຄວາມ​ເສຍ​ຫາຍ ຈາກ​ຮ້ານ​ຄ້າ 382 ຮ້ານ ທີ່​ມາ​ຮ່ວມ​ງານ Made In Laos ສ່ວນ​ມູນ​ຄ່າ​ເສຍ​ຫາຍ ຄະ­ນະ​ກຳ­ມະ­ການ​ບໍ­ລິ­ສັດ​ຈະ​ສົມ­ທົບ​ກັບ​ບໍ­ລິ­ສັດ​ປະ­ກັນ​ໄພ ແລະ ເຈົ້າ​ຂອງ​ຮ້ານ ປະ​ເມີນ​ຕົວ​ຈິງ ພ້ອມ​ນີ້ ກໍ​ສຸມ​ທຶນ­ຮອນ​ຟື້ນ​ຟູ​ອາ­ຄານ​ໃຫ້​ສຳ­ເລັດ​ໃນ​ເວ­ລາ​ປະ­ມານ 1 ເດືອນ ແລະ ຄາດ​ວ່າ​ເດືອນ​ກໍ­ລະ­ກົດ 2019 ສ່ວນ​ການ​ຊົດ​ເຊີຍ​ຜົນ​ເສຍ​ຫາຍ ພວກ​ເຮົາ​ຈະ​ປຶກ­ສາ​ຫາ­ລື​ກັນ​ຕື່ມ ເນື່ອງ​ຈາ​ກວ່າ​ສູນ​ການ​ຄ້າ​ມີ​ປະ­ກັນ​ໄພ ແລະ ສິນ­ຄ້າ​ຂອງ​ຮ້ານ​ຄ້າ​ຕ່າງໆ​ຍັງ​ບໍ່​ທັນ​ອະ­ນຸ­ຍາດ​ໃຫ້​ເອົາ​ອອກ ຍົກ­ເວັ້ນ​ສິນ­ຄ້າ​ທີ່​ຈະ​ມີ​ການ​ບູດ­ເນົ່າ.

    ທ່ານ​ນາງ ຈັນ­ທະ​ຈອນ ວົງ​ໄຊ ກ່າວ​ວ່າ: Made In Laos ເປັນ​ງານ​ໃຫຍ່ ເຊິ່ງ​ພວກ​ເຮົາ​ໄດ້​ເຊີນ​ຜູ້​ປະ­ກອບ​ການ 18 ແຂວງ ທັງ​ເປັນ​ຜູ້​ປະ­ກອບ​ການ​ຂອງ​ສະ­ພາ​ການ​ຄ້າ ລູກ​ຄ້າ ຫຼື ຮ້ານ​ຄ້າ​ປະ­ຈຳ​ສູນ​ການ​ຄ້າ​ລາວ-ໄອ​ເຕັກ ມີ 300 ກວ່າ​ຮ້ານ ໃນ​ນີ້ 191 ຮ້ານ ເປັນ​ສະ­ມາ­ຊິກ ຫຼື ຮ້ານ​ທີ່​ສະ­ພາ​ການ​ຄ້າ​ເຊີນ​ມາ​ຮ່ວມ ແລະ ຮັບ­ຜິດ­ຊອບ​ຈາກ​ເຫດ­ການ​ໄຟ​ໄໝ້ 2 ຮ້ານ ທີ່​ໄດ້​ຮັບ​ການ​ເສຍ​ຫາຍ ຄື: L07 ແລະ L09 ສ່ວນ​ງານ Made In Laos ທີ່​ຈະ​ຈັດ​ຂຶ້ນ​ວັນ​ທີ 10-19 ພຶດ­ສະ­ພາ ພວກ​ເຮົາ​ຈະ​ບໍ່​ໄດ້​ຍົກ­ເລີກ ແຕ່​ຈະ​ເລື່ອນ​ໄປ​ຈັດ​ອີກ​ພາຍ­ຫຼັງ​ທີ່​ສູນ​ການ​ຄ້າ​ລາວ-ໄອ​ເຕັກ ສ້ອມ­ແປງ​ສຳ­ເລັດ ແລະ ຮັບ­ປະ­ກັນ​ຄວາມ​ປອດ​ໄພ ຫາກ​ແລ້ວ​ເດືອນ​ກໍ­ລະ­ກົດ ກໍ​ຈະ​ໄຂ​ງານ​ວັນ​ທີ 20-28 ກໍ­ລະ­ກົດ.

ຂ່າວທີ່ກ່ຽວຂ້ອງ