ຂ່າວຫຼ້າສຸດ

ໄຊທານີ ປູກໄມ້ 496 ຕົ້ນ ປະດັບເສັ້ນທາງ 450 ປີ

869 14 ພ.ພ. 2019 ຂ່າວໜ້າ​ໜຶ່ງ
ໄຊທານີ ປູກໄມ້ 496 ຕົ້ນ ປະດັບເສັ້ນທາງ 450 ປີ

    ຫ້ອງ­ການ​ກະ­ສິ­ກຳ ແລະ ປ່າ­ໄມ້ ເມືອງ​ໄຊ​ທາ­ນີ ນະ­ຄອນ­ຫຼວງ​ວຽງ​ຈັນ (ນວ) ສົມ­ທົບ​ກັບ​ພະ​ແນກ​ກະ­ສິ­ກຳ ແລະ ປ່າ­ໄມ້ ນວ ຈັດ​ພິ­ທີ​ປູກ​ຕົ້ນ­ໄມ້​ຕາມ​ແຄມ​ທາງ ເສັ້ນ­ທາງ 450 ປີ ເພື່ອ​ສ້າງ​ຂະ​ບວນ​ການ​ຕ້ອນ­ຮັບ​ກອງ​ປະ­ຊຸມ​ໃຫຍ່ 3 ຂັ້ນ ວັນ­ເດັກ­ນ້ອຍ​ສາ­ກົນ ແລະ ວັນ​ປູກ​ຕົ້ນ­ໄມ້​ແຫ່ງ​ຊາດ (1 ມິ­ຖຸ­ນາ) ທັງ​ເປັນ​ການ​ເພີ່ມ​ພື້ນ​ທີ່​ປົກ​ຄຸ້ມ​ສີ­ຂຽວ​ໃຫ້ ນວ ຂຶ້ນ​ວັນ​ທີ 11 ພຶດ­ສະ­ພາ 2019 ຢູ່​ເສັ້ນ­ທາງ​ດັ່ງ­ກ່າວ ໂດຍ​ມີ​ທ່ານ ອາດ​ສະ­ພັງ​ທອງ ສີ​ພັນ​ດອນ ຮອງ​ເຈົ້່າ​ຄອງ ນວ ຜູ້​ຊີ້​ນຳ​ຂົງ­ເຂດ​ກະ­ສິ­ກຳ ແລະ ປ່າ­ໄມ້ ທ່ານ ຈັນ­ທະ​ລາ ອິນ​ທະ­ລັງ​ສີ ເຈົ້າ­ເມືອງ​ໄຊ​ທາ­ນີ ທ່ານ ຫຼ້າ​ສາຍ ນວນ​ທາ​ສິງ ຫົວ­ໜ້າ​ພະ​ແນກ​ກະ­ສິ­ກຳ ແລະ ປ່າ­ໄມ້ ນວ ພ້ອມ​ດ້ວຍ​ບັນ­ດາ​ຮອງ​ເຈົ້າ­ເມືອງ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ທອງ​ສຸກ ບົວ​ລີ​ຂັນ ຫົວ­ໜ້າ​ຫ້ອງ­ການ​ກະ­ສິ­ກຳ ແລະ ປ່າ­ໄມ້​ເມືອງ​ໄຊ​ທາ­ນີ ກ່າວ​ວ່າ: ໄລ­ຍະ​ຜ່ານ​ມາ​ເມືອງ​ໄຊ​ທາ­ນີ ໄດ້​ສົມ­ທົບ​ກັບ​ພະ​ແນກ​ກະ­ສິ­ກຳ ແລະ ປ່າ­ໄມ້ ນວ ຈັດ​ຕັ້ງ​ປະ­ຕິ­ບັດ​ການ​ປູກ​ຕົ້ນ­ໄມ້​ຕາມ​ແຄມ​ທາງ ແລະ ເລນ​ກາງ ເສັ້ນ­ທາງ 450 ປີ ຈຳ­ນວນ​ຫຼາຍ​ສົມ­ຄວນ ເຊິ່ງ​ຈຳ­ນວນ​ໜຶ່ງ​ກໍ​ມີ​ການ​ເຕີບ​ໂຕ​ແລ້ວ ແລະ ຈຳ­ນວນ​ໜຶ່ງ​ບໍ່​ຈະ­ເລີນ​ເຕີບ​ໂຕ ເນື່ອງ​ຈາກ​ການ​ບົວ­ລະ­ບັດ​ຮັກ­ສາ ແລະ ຄຸ້ມ​ຄອງ​ບໍ່​ໄດ້​ຮັບ​ໝາກ­ຜົນ​ເທົ່າ​ທີ່​ຄວນ ມື້­ນີ້​ພວກ​ເຮົາ​ຈຶ່ງ​ໄດ້​ພ້ອມ​ກັນ​ປູກ​ຕົ້ນ­ໄມ້ ເພື່ອ​ສ້ອມ­ແຊມ​ຄືນ​ຕົ້ນ­ໄມ້​ຈຳ­ນວນ​ທີ່​ຕາຍ ແລະ ເສຍ​ຫາຍ​ໃຫ້​ໄດ້​ຕາມ​ລະ­ດັບ​ຄາດ­ໝາຍ ເຊິ່ງ​ພາຍ­ຫຼັງ​ປູກ​ສຳ­ເລັດ ຈະ​ມອບ​ຄວາມ​ຮັບ­ຜິດ­ຊອບ​ໃຫ້​ບ້ານ​ທີ່​ມີ​ສ່ວນ​ກ່ຽວ­ຂ້ອງ​ກັບ​ເສັ້ນ­ທາງ 450 ປີ ເປັນ​ຜູ້​ປົກ​ປັກ​ຮັກ­ສາ ແລະ ຄຸ້ມ​ຄອງ​ໃຫ້​ຕົ້ນ­ໄມ້​ທີ່​ປູກ​ຄັ້ງ​ນີ້ ແລະ ປູກ​ໃນ​ໄລ­ຍະ​ຜ່ານ​ມາ ໃຫ້​ຈະ­ເລີນ​ເຕີບ​ໂຕ.

    ການ​ປູກ​ຕົ້ນ­ໄມ້​ຄັ້ງ​ນີ້ ມີ​ໄລ­ຍະ 3 ກິ­ໂລ­ແມັດ ຕົ້ນ­ໄມ້​ທີ່​ນຳ​ມາ​ປູກ​ມີ 4 ຊະ­ນິດ 496 ຕົ້ນ ລວມ​ມູນ​ຄ່າ 30.520.000 ກີບ ໃນ​ນີ້ ໄດ້​ຮັບ​ການ​ສະ­ໜັບ­ສະ­ໜູນ​ຈາກ​ພະ​ແນກ​ກະ­ສິ­ກຳ ແລະ ປ່າ­ໄມ້ ນວ ໄມ້​ຫຳ​ງົວ 46 ຕົ້ນ ໄມ້­ແຄນ 50 ຕົ້ນ ດອກ​ເຈ້ຍ 200 ຕົ້ນ ມູນ​ຄ່າ 20.520.000 ກີບ ຫ້ອງ­ການ​ກະ­ສິ­ກຳ ແລະ ປ່າ­ໄມ້​ເມືອງ​ໄຊ​ທາ­ນີ ຈຳ­ປາ­ຂາວ 200 ຕົ້ນ ມູນ​ຄ່າ 10 ລ້ານ​ກີບ ພາຍ­ຫຼັງ​ການ​ປູກ​ຄັ້ງ​ນີ້ ເມືອງ​ໄຊ​ທາ­ນີ ຍັງ​ຈະ​ສືບ­ຕໍ່​ປຸກ­ລະ­ດົມ​ທຶນ​ຈາກ​ຜູ້​ປະ­ກອບ​ການ​ທຸ­ລະ​ກິດ ປະ­ຊາ­ຊົນ​ໃຫ້​ມີ​ສ່ວນ​ຮ່ວມ​ໃນ​ການ​ປູກ​ຕົ້ນ­ໄມ້​ປະ­ດັບ​ເສັ້ນ­ທາງ 450 ປີ ຕື່ມ​ອີກ ນອກ​ນີ້​ຍັງ​ຈະ​ຈັດ​ພິ­ທີ​ປູກ​ຕົ້ນ­ໄມ້​ເນື່ອງ​ໃນ​ວັນ­ເດັກ­ນ້ອຍ​ສາ­ກົນ ແລະ ວັນ​ປູກ​ຕົ້ນ­ໄມ້​ແຫ່ງ​ຊາດ ເປັນ​ທາງ​ການ ໃນ​ວັນ​ທີ 31 ພຶດ­ສະ­ພາ 2019 ຢູ່​ວັດ​ນາ​ຄັນ​ທຸງ (ຕາດ​ຊອຍ​ວອຍ) ເນື້ອ­ທີ່ 3 ເຮັກ­ຕາ ອີກ​ດ້ວຍ.

ຂ່າວທີ່ກ່ຽວຂ້ອງ