ຊຽງຂວາງ ປະເມີນວຽກງານ ກີລາ-ກາຍະກຳ

439 14 ພ.ພ. 2019 ວົງຈອນກີລາ
ຊຽງຂວາງ ປະເມີນວຽກງານ ກີລາ-ກາຍະກຳ

    ພະ​ແນກ​ສຶກ​ສາ​ທິ​ການ ແລະ ກີ­ລາ ແຂວງ​ຊຽງ​ຂວາງ ຈັດ​ກອງ​ປະ­ຊຸມ​ຕີ​ລາ­ຄາ​ຜົນ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ກີ­ລາ-ກາ​ຍະ​ກຳ ປະ­ຈຳ​ສົກ​ປີ 2018-2019 ແລະ ວາງ​ແຜນ​ຈຸດ​ສຸມ​ເຄື່ອນ​ໄຫວ 2019-2020 ໃນ​ວັນ​ທີ 9 ພຶດ­ສະ­ພາ 2019 ຜ່ານ​ມາ ທີ່​ຫ້ອງ​ປະ­ຊຸມ​ພະ​ແນກ​ດັ່ງ­ກ່າວ ໂດຍ​ມີ​ທ່ານ ບົວ​ລີ ພັນ​ນາ​ວົງ ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ​ແຂວງ​ຊຽງ​ຂວາງ ມີ​ບັນ­ດາ​ຮອງ​ເຈົ້າ­ເມືອງ ຫົວ­ໜ້າ-ຮອງ​ຫົວ­ໜ້າ​ຫ້ອງ­ການ​ສຶກ​ສາ​ທິ​ການ ແລະ ກີ­ລາ​ເມືອງ ຂະ­ແໜງ­ການ ໜ່ວຍ​ງານ ໂຮງ­ຮຽນ​ອ້ອມ​ຂ້າງ ແລະ ພາກ­ສ່ວນ​ທີ່​ກ່ຽວ­ຂ້ອງ​ເຂົ້າ​ຮ່ວມ.

    ໂອ­ກາດ​ນີ້ ທ່ານ ຄຳ​ພອນ ຍອຍ​ສາຍ​ຄຳ ຫົວ­ໜ້າ​ຂະ­ແໜງ​ກີ­ລາ​ມວນ​ຊົນ ໄດ້​ຍົກ​ໃຫ້​ເຫັນ​ເຖິງ​ຜົນ­ງານ​ຫຼາຍ​ດ້ານ​ທີ່​ສາ­ມາດ​ປະ­ຕິ­ບັດ​ໄດ້ ເປັນ­ຕົ້ນ​ແມ່ນ​ການ​ບໍ­ລິ­ຫານ​ຄຸ້ມ​ຄອງ ແລະ ຈັດ​ຕັ້ງ​ນຳ­ພາ​ການ​ເຂົ້າ​ຮ່ວມ​ເຄື່ອນ​ໄຫວ​ແຂ່ງ­ຂັນ​ກີ­ລາ​ລະ­ດັບ​ຕ່າງໆ​ທີ່​ທາງ​ຂັ້ນ​ເທິງ​ຈັດ​ຂຶ້ນ ໂດຍ​ສະ­ເພາະ ໄດ້​ຈັດ­ການ​ແຂ່ງ­ຂັນ​ກີ­ລາ​ຫຼາຍ​ປະ­ເພດ ເພື່ອ​ຄັດ​ເລືອກ​ເອົາ​ນັກ­ກີ­ລາ ກະ­ກຽມ​ເຂົ້າ​ຮ່ວມ​ແຂ່ງ­ຂັນ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ XI ທີ່​ແຂວງ​ຊຽງ​ຂວາງ ເປັນ​ເຈົ້າ­ພາບ​ຈັດ​ຕັ້ງ​ການ​ຮຽນ​ວິ­ຊາ​ພະ­ລະ-ສິ­ລະ​ປະ ຢູ່​ໃນ​ໂຮງ­ຮຽນ​ສາ­ມັນ​ຕາມ​ຫຼັກ­ສູດ​ໂຄງ­ການ ທີ່​ກະ­ຊວງ​ສຶກ​ສາ​ທິ​ການ ແລະ ກີ­ລາ ວາງ​ອອກ ນອກ­ຈາກ​ທີ່​ກ່າວ​ມາ​ນີ້ ຍັງ​ອີກ​ຫຼາຍໆ​ຜົນ­ງານ​ທີ່​ທາງ​ພະ​ແນກ​ຍາດ​ມາ​ໄດ້ ອັນ​ໄດ້​ສ້າງ​ຜົນ​ປະ­ໂຫຍດ​ຢ່າງ​ໃຫຍ່​ຫຼວງ​ໃຫ້​ແກ່​ສັງ­ຄົມ ແລະ ປະ­ເທດ​ຊາດ ທັ້ງ​ນີ້ ກໍ​ເພື່ອ​ແນ­ໃສ່​ສ້າງ​ໃຫ້​ທຸກ​ຄົນ​ໃນ​ທົ່ວ​ສັງ­ຄົມ​ມີ​ສຸ­ຂະ­ພາບ​ສົມ­ບູນ​ແຂງ­ແຮງ ມີ​ຈິດ­ໃຈ​ປອດ­ໂປ່ງ ກຽມ­ພ້ອມ​ຮັບ​ໃຊ້​ວຽກ​ງານ​ປົກ​ປັກ​ຮັກ­ສາ ແລະ ສ້າງ­ສາ​ພັດ­ທະ­ນາ​ປະ­ເທດ​ຊາດ​ໃຫ້​ມີ​ຄວາມ​ແຂງ​ແກ່ນ ຈະ­ເລີນ​ກ້າວ­ໜ້າ.

    ສຳ­ລັບ​ແຜນ​ວຽກ​ຈຸດ​ສຸມ​ປີ 2019-2020 ຈະ​ສືບ­ຕໍ່​ເອົາ­ໃຈ­ໃສ່​ຊຸກ­ຍູ້​ໃຫ້​ມີ​ການ​ອອກ­ກຳ­ລັງ​ກາຍ-ຫຼິ້ນ​ກີ­ລາ ຢູ່​ແຕ່​ລະ​ເມືອງ​ໃຫ້​ຫຼາຍ​ຂຶ້ນ​ຕື່ມ ຈັດ­ການ​ແຂ່ງ­ຂັນ​ກິ­ລາ​ປະ­ເພດ​ຕ່າງໆ​ຂັ້ນ​ພື້ນ­ຖານ ໂດຍ​ຕິດ​ພັນ​ກັບ​ການ​ສະ­ເຫຼີມ­ສະ­ຫຼອງ​ວັນ​ສຳ­ຄັນ​ຕ່າງໆ​ຂອງ​ຊາດ ລົງ​ຊຸກ­ຍູ້ ຕິດ­ຕາມ ກວດ­ກາ ເກັບ​ກຳ​ຂໍ້​ມູນ ການ​ອອກ­ກຳ­ລັງ​ກາຍ ຫຼິ້ນ​ກີ­ລາ ຢູ່​ບັນ­ດາ​ເມືອງ ສວນ​ສາ­ທາ­ລະ­ນະ​ພາຍ​ໃນ​ເທ­ສະ​ບານ​ແຂວງ ແລະ ສະ­ໂມ­ສອນ​ກີ­ລາ​ຕ່າງໆ​ໃຫ້​ໄດ້​ຢ່າງ​ໜ້ອຍ 2 ຄັ້ງ ຈັດ​ກອງ​ປະ­ຊຸມ​ເຜີຍ­ແຜ່​ພາ­ລະ​ບົດ­ບາດ ສິດ​ໜ້າ­ທີ່ ໃຫ້​ແກ່​ບັນ­ດາ​ສະ­ຫະ­ພັນ​ກີ­ລາ​ປະ­ເພດ​ຕ່າງໆ​ພາຍ​ໃນ​ແຂວງ​ໃຫ້​ສຳ­ເລັດ ກະ­ກຽມ​ນັກ­ກີ­ລາ​ຂອງ​ແຂວງ​ຈຳ­ນວນ 28 ປະ­ເພດ ເຂົ້າ​ສູນ​ເຝິກ­ຊ້ອມ ເພື່ອ​ກຽມ­ພ້ອມ​ເຂົ້າ​ຮ່ວມ​ແຂ່ງ­ຂັນ​ກີ­ລາ​ແຫ່ງ​ຊາດ ຄັ້ງ​ທີ XI ລົງ​ຊຸກ­ຍູ້​ໂຮງ­ຮຽນ​ປອດ​ສິ່ງ​ເສບ​ຕິດ​ຄືນ­ໃໝ່ ໂດຍ​ສະ­ເພາະ ແຫ່ງ​ໂຮງ­ຮຽນ​ທີ່​ຍັງ​ບໍ່​ທັນ​ໄດ້​ປະ­ກາດ ພ້ອມ​ທັງ​ສົມ­ທົບ​ກັບ​ເມືອງ​ໃນ​ການ​ຊຸກ­ຍູ້​ການ​ຮຽນ​ການ​ສອນ ວິ­ຊາ​ພະ­ລະ-ສິ­ລະ​ປະ​ຢູ່​ໃນ​ໂຮງ­ຮຽນ ແລະ ຍັງ​ອີກ​ບາງ​ໜ້າ​ວຽກ​ສຳ­ຄັນ​ທີ່​ຈະ​ຕ້ອງ​ໄດ້​ຈັດ​ຕັ້ງ​ປະ­ຕິ­ບັດ​ໃນ­ຕໍ່­ໜ້າ ເພື່ອ​ໃຫ້​ບັນ­ລຸ​ຕາມ​ເປົ້າ​ໝາຍ​ທີ່​ວາງ​ໄວ້.

ຂ່າວທີ່ກ່ຽວຂ້ອງ