ຂ່າວຫຼ້າສຸດ

ຢູ-16 ລາວ ຢູ່ກຸ່ມ ຍີ່ປຸ່ນ-ມາເລເຊຍ-ກຳປູເຈຍ ຊີງແຊັມອາຊີ

564 14 ພ.ພ. 2019 ວົງຈອນກີລາ
ຢູ-16 ລາວ ຢູ່ກຸ່ມ ຍີ່ປຸ່ນ-ມາເລເຊຍ-ກຳປູເຈຍ ຊີງແຊັມອາຊີ

    ທັບ​ນັກ​ເຕະ­ບານ​ເຍົາ­ວະ​ຊົນ​ທີມ​ຊາດ​ລາວ ຮຸ່ນ​ອາ­ຍຸ​ບໍ່​ເກີນ 16 ປີ ຕ້ອງ​ພົບ​ກັບ​ວຽກ​ໜັກ​ຢ່າງ​ແນ່­ນອນ ຫຼັງ​ຈັບ​ສະ­ຫຼາກ​ໂຄ­ຈອນ​ມາ​ຢູ່​ກຸ່ມ J ຮ່ວມ​ກັບ​ທີມ​ຊາດ​ຍີ່­ປຸ່ນ ທີມ​ຊາດ​ມາ​ເລ​ເຊຍ ແລະ ທີມ​ຊາດ​ກຳ­ປູ­ເຈຍ ໃນ​ການ​ແຂ່ງ­ຂັນ​ເຕະ­ບານ​ເຍົາ­ວະ​ຊົນ​ຊາຍ ຮຸ່ນ​ອາ­ຍຸ​ບໍ່​ເກີນ 16 ປີ ຊີງ​ແຊັມ​ອາ­ຊີ 2020 ຮອບ​ຄັດ​ເລືອກ ຫຼື (2020 AFC U-16 CHAMPIONSHIP QUALI FICATION) ທີ່​ນະ­ຄອນ­ຫຼວງ​ວຽງ​ຈັນ ສປປ ລາວ ເປັນ​ເຈົ້າ­ພາບ​ໃນ​ກາງ​ເດືອນ​ກັນ­ຍາ​ນີ້.

    ອີງ​ຕາມ​ຂໍ້​ມູນ​ຈາກ​ເວັບ​ໄຊ​ສະ­ຫະ­ພັນ​ບານ­ເຕະ​ອາ­ຊີ ແຈ້ງ​ໃຫ້​ຊາບ​ວ່າ: ເມື່ອ​ວັນ​ທີ 9 ພຶດ­ສະ­ພາ​ຜ່ານ​ມາ ທີ່​ສຳ­ນັກ­ງານ​ສະ­ຫະ­ພັນ​ບານ­ເຕະ​ອາ­ຊີ ນະ­ຄອນ­ຫຼວງ​ກົວ​ລາ​ລຳ​ເປີ ປະ­ເທດ​ມາ​ເລ​ເຊຍ ສະ­ຫະ­ພັນ​ບານ­ເຕະ​ອາ­ຊີ ໄດ້​ຈັດ​ພິ­ທີ​ຈັບ​ສະ­ຫຼາກ​ແບ່ງ​ກຸ່ມ ການ​ແຂ່ງ­ຂັນ​ເຕະ­ບານ​ເຍົາ­ວະ​ຊົນ​ຊາຍ ຮຸ່ນ​ອາ­ຍຸ​ບໍ່​ເກີນ 16 ປີ ຊີງ​ແຊັມ​ອາ­ຊີ 2020 ຮອບ​ຄັດ​ເລືອກ ໂດຍ​ມີ​ທັງ​ໝົດ 48 ປະ­ເທດ​ເຂົ້າ​ຮ່ວມ ແບ່ງ​ອອກ​ເປັນ 11 ກຸ່ມ A-K ໃນ​ນີ້ ຜ່ານ​ການ​ຈັບ​ສະ­ຫຼາກ​ຜົນ​ປາ­ກົດ​ວ່າ ທີມ​ຊາດ​ລາວ ຖືກ​ຢູ່​ກຸ່ມ J ຮ່ວມ​ກັບ​ທີມ​ຊາດ​ຍີ່­ປຸ່ນ ທີມ​ຊາດ​ມາ​ເລ​ເຊຍ ແລະ ທີມ​ຊາດ​ກຳ­ປູ­ເຈຍ ພ້ອມ​ກັບ​ຖືກ​ເລືອກ​ເປັນ​ເຈົ້າ­ພາບ ຈັດ­ການ​ແຂ່ງ­ຂັນ​ໃນ​ກຸ່ມ​ນີ້ ເຊິ່ງ​ຈະ​ເລີ່ມ​ແຂ່ງ­ຂັນ​ລະ­ຫວ່າງ​ວັນ​ທີ 14-22 ກັນ­ຍາ 2019 ທີ່​ສະ­ໜາມ​ກີ­ລາ​ແຫ່ງ​ຊາດ (ຫຼັກ 16) ນະ­ຄອນ­ຫຼວງ​ວຽງ​ຈັນ ສປປ ລາວ.

    ສ່ວນ​ຜົນ​ການ​ຈັບ​ສະ­ຫຼາກ​ກຸ່ມ​ອື່ນໆ ກຸ່ມ A ທາ​ຈິ­ກິ​ສະ­ຖານ ຊອກ​ດາ​ນີ (ຈໍ​ແດນ) ເຈົ້າ­ພາບ ເນ​ປານ ສີ​ລັງ­ກາ ແລະ ຄູ​ເວດ ກຸ່ມ B ອິນ​ເດຍ ອູ​ຊະ​ເບັກ​ກິ​ສະ­ຖານ ເຈົ້າ­ພາບ ບາ​ເຣນ ແລະ ຕວກ​ເມ​ນິ​ສະ­ຖານ ກຸ່ມ C ອີ​ຣານ ເຈົ້າ­ພາບ ອັບ​ກາ​ນິ​ສະ­ຖານ ປາ​ແລັດ​ສະ​ຕິນ ແລະ ມານ​ດີບ ກຸ່ມ D ໂອ​ມານ ຊາ​ອຸ​ດິ​ອາ​ຣັບ​ເບຍ ເຈົ້າ­ພາບ ຊີ​ຣີ ແລະ ປາ​ກິ​ສະ­ຖານ ກຸ່ມ E ເຢ​ເມນ ບັງ​ກລາ​ເທດ ກາ​ຕາ ເຈົ້າ­ພາບ ແລະ ພູ​ຖານ ກຸ່ມ F ອີ​ຣັກ ກີ​ກິດ​ສະ­ຖານ ເຈົ້າ­ພາບ ເລ​ບາ​ນອນ ແລະ ສະ­ຫະ­ລັດ​ອາ​ຣັບ​ເອ​ມິ​ເຣດ ຫຼື ຢູ​ເອ​ອີ ກຸ່ມ G ອິນ​ໂດ​ເນ​ເຊຍ ເຈົ້າ­ພາບ ສປ ຈີນ ບຣູ​ໄນ ຟີ​ລິບ​ປິນ ແລະ ນອດ​ເທິນ​ມາ​ເຣຍ​ນາ ກຸ່ມ H ອົດ​ສະ​ຕຣາ​ລີ ຫວຽດ­ນາມ ເຈົ້າ­ພາບ ຕີ​ມໍ ເລ​ສ​ເຕ ມົງ​ໂກ​ລີ ແລະ ມາ​ເກົາ ກຸ່ມ I ສປປ ເກົາ­ຫຼີ ຮົງ​ກົງ ສິງ­ກະ­ໂປ ເຈົ້າ­ພາບ ແລະ ກວມ ກຸ່ມ K ສ ເກົາ­ຫຼີ ໄທ ມຽນ​ມາ ເຈົ້າ­ພາບ ແລະ ໄຕ້​ຫວັນ.

    ສຳ­ລັບ​ການ​ແຂ່ງ­ຂັນ​ລາຍ­ການ​ດັ່ງ­ກ່າວ ແມ່ນ​ຈະ​ຄັດ​ເລືອກ​ເອົາ​ອັນ​ດັບ 1 ຂອງ 11 ກຸ່ມ ແລະ ຮອງ​ອັນ​ດັບ 1 ທີ່​ມີ​ຜົນ­ງານ​ທີ່​ດີ​ທີ່​ສຸດ 4 ທີມ ໄປ​ແຂ່ງ­ຂັນ​ຮອບ​ສຸດ​ທ້າຍ ໃນ​ປີ 2020 ຕໍ່​ໄປ.

ຂ່າວທີ່ກ່ຽວຂ້ອງ