ສະຫຼອງໄຊຊະນະບັ້ນຮົບດຽນບຽນຟູ ຄົບຮອບ 65 ປີ

1.117 13 ພ.ພ. 2019 ຂ່າວໜ້າ​ໜຶ່ງ

    ເພື່ອ​ເຮັດ​ໃຫ້​ປະ­ຊາ­ຊົນ​ລາວ​ບັນ­ດາ­ເຜົ່າ ກໍ​ຄື​ພະ­ນັກ­ງານ ທະ­ຫານ ຕຳ­ຫຼວດ ເຫັນ​ໄດ້​ປະ­ຫວັດ­ສາດ ແລະ ມູນ­ເຊື້ອ​ອັນ​ພິ­ລະ​ອາດ​ຫານ​ຂອງ​ກອງ­ທັບ ແລະ ປະ­ຊາ­ຊົນ​ຫວຽດ­ນາມ ໄຊ­ຊະ­ນະ​ໃນ​ບັ້ນ​ຮົບ ດຽນ​ບຽນ​ຟູ ປີ 1954.

    ໃນ​ໂອ­ກາດ​ສະ­ເຫຼີມ­ສະ­ຫຼອງ​ໄຊ­ຊະ­ນະ​ບັ້ນ​ຮົບ​ດຽນ​ບຽນ​ຟູ ຄົບ­ຮອບ 65 ປີ (7/5/1954-7/5/2019) ກະ­ຊວງ​ປ້ອງ​ກັນ​ປະ­ເທດ​ລາວ ຮ່ວມ​ກັບ​ສະ­ຖານ­ທູດ​ຫວຽດ­ນາມ ປະ­ຈຳ​ລາວ ໄດ້​ຈັດ​ພິ­ທີ​ໂຮມ​ຊຸມ­ນຸມ​ປາ­ຖະ­ກະ­ຖາ​ວັນ​ດັ່ງ­ກ່າວ​ຂຶ້ນ ວັນ​ທີ 9 ພຶດ­ສະ­ພາ 2019 ຢູ່​ສະ­ໂມ­ສອນ​ກົມ​ໃຫຍ່​ການ­ເມືອງ​ກອງ­ທັບ ເປັນ​ປະ­ທານ​ຮ່ວມ​ໂດຍ​ທ່ານ ພົນ​ຕີ ພູ​ວົງ ວົງ​ພົມ ຮອງ​ລັດ­ຖະ­ມົນ­ຕີ​ກະ­ຊວງ​ປ້ອງ​ກັນ​ປະ­ເທດ ແລະ ທ່ານ ຫງວຽນ​ບາ​ຮຸ່ງ ເອກ​ອັກ​ຄະ​ລັດ​ຖະ​ທູດ​ຫວຽດ­ນາມ ປະ­ຈຳ​ລາວ ມີ​ທ່ານ ພັນ​ເອກ ຕ່າວ​ວັນ​ທ້າຍ ທີ່​ປຶກ­ສາ​ທູດ​ປ້ອງ​ກັນ​ຊາດ​ຫວຽດ­ນາມ​ປະ­ຈຳ​ລາວ ບັນ­ດາ​ຕາງ­ໜ້າ​ຄະ­ນະ​ພັກ-ຄະ­ນະ​ບັນ­ຊາ​ຈາກ​ກົມ​ກອງ​ອ້ອມ​ຂ້າງ ຕະ­ຫຼອດ​ຮອດ​ພະ­ນັກ­ງານ-ນັກ­ຮົບ​ເຂົ້າ​ຮ່ວມ.

    ໃນ​ໂອ­ກາດ​ນີ້ ທ່ານ ພົນ​ຕີ ພູ​ວົງ ວົງ​ພົມ ໄດ້​ຍົກ​ໃຫ້​ເຫັນ​ໄຊ­ຊະ­ນະ​ດຽນ​ບຽນ​ຟູ​ແມ່ນ​ໝາກ­ຜົນ​ຂອງ​ການ​ຕໍ່­ສູ້​ອັນ​ພິ­ລະ​ອາດ​ຫານ ເຊິ່ງ​ເຕັມ​ໄປ​ດ້ວຍ​ຄວາມ​ເສຍ­ສະ­ຫຼະ​ຊີ­ວິດ ແລະ ເລືອດ​ເນື້ອ​ຂອງ​ກອງ­ທັບ ແລະ ປະ­ຊາ­ຊົນ​ຫວຽດ­ນາມ​ອ້າຍ​ນ້ອງ ພາຍ​ໃຕ້​ການ​ນຳ­ພາ​ຂອງ​ພັກ​ກອມ​ມູ​ນິດ​ຫວຽດ­ນາມ ນຳ​ໂດຍ​ປະ­ທານ ໂຮ່​ຈີ​ມິງ ຜູ້­ນຳ​ທີ່​ຍິ່ງ​ໃຫຍ່​ຂອງ​ຊາວ​ຫວຽດ­ນາມ ແມ່ນ​ໄຊ­ຊະ­ນະ​ຂອງ​ກອງ­ທັບ ແລະ ປະ­ຊາ­ຊົນ​ຫວຽດ­ນາມ ໃນ​ການ​ຕໍ່­ສູ້​ປົດ​ປ່ອຍ​ຊາດ​ຕ້ານ​ພວກ​ລ່າ​ເມືອງ​ຂຶ້ນ​ແບບ​ເກົ່າ ແລະ ທັງ​ແມ່ນ​ໄຊ­ຊະ­ນະ​ທີ່​ໂດດ​ເດັ່ນ​ຂອງ​ກຳ­ລັງ​ປະ­ຕິ­ວັດ​ໂລກ ເປັນ​ການ​ປະ­ກອບ­ສ່ວນ​ຊຸກ­ຍູ້​ຢ່າງ​ແຂງ­ແຮງ ເຂົ້າ​ໃນ​ພາ­ລະ­ກິດ​ການ​ຕໍ່­ສູ້​ຂອງ​ປະ­ຊາ­ຊົນ​ໂລກ ເພື່ອ​ເປົ້າ​ໝາຍ​ແຫ່ງ​ຄວາມ​ເປັນ​ເອ­ກະ­ລາດ​ແຫ່ງ​ຊາດ ສັນ­ຕິ­ພາບ ປະ­ຊາ­ທິ­ປະ­ໄຕ ແລະ ຄວາມ​ກ້າວ­ໜ້າ​ທາງ​ສັງ­ຄົມ ໄດ້​ກາຍ­ເປັນ​ກ້ອນ​ພະ­ລັງ​ອັນ​ຍິ່ງ​ໃຫຍ່​ເຂັ້ມ­ແຂງ​ໃຫ້​ແກ່​ປະ­ຊາ​ຊາດ ທີ່​ພວມ​ດຳ­ເນີນ​ການ​ຕໍ່­ສູ້​ໃນ​ເວ­ລາ​ນັ້ນ ເພື່ອ​ຕີ​ຕ້ານ​ລັດ­ທິ​ລ່າ​ເມືອງ​ຂຶ້ນ​ແບບ​ເກົ່າ ແລະ ໃໝ່​ຢູ່​ໃນ​ອິນ­ດູ­ຈີນ ກໍ​ຄື​ໃນ​ໂລກ.

    ພ້ອມ​ດຽວ​ກັນ​ນີ້ ທ່ານ ພັນ​ເອກ ຕ່າວ​ວັນ​ທ້າຍ ໄດ້​ກ່າວ​ຕື່ມ​ວ່າ: ໄຊ­ຊະ­ນະ​ບັ້ນ​ຮົບ​ດຽນ​ບຽນ​ຟູ​ຂອງ​ປະ­ຊາ­ຊົນ​ຫວຽດ­ນາມ ສະ­ແດງ​ໃຫ້​ເຫັນ​ເຖິງ​ນ້ຳ­ໃຈ​ຕໍ່­ສູ້​ພິ­ລະ​ອາດ​ຫານ ເດັດ­ຂາດ ບໍ່​ຍອມ​ຈຳ­ນົນ ແລະ ການ​ເສຍ­ສະ­ຫຼະ​ອັນ​ຍິ່ງ​ໃຫຍ່​ໃນ​ພາ­ລະ­ກິດ​ການ​ຕໍ່­ສູ້ ທັງ​ເປັນ​ບາດ​ລ້ຽວ​ປະ­ຫວັດ­ສາດ​ການ​ຕໍ່­ສູ້​ກູ້​ຊາດ​ຂອງ​ສາມ​ຊາດ​ອິນ­ດູ­ຈີນ ເຮັດ​ໃຫ້​ລັດ­ທິ​ລ່າ​ເມືອງ​ຂຶ້ນ​ແບບ​ເກົ່າ ຖືກ​ພັງ​ທະ​ລາຍ​ລົງ​ເປັນ​ຄັ້ງ​ທຳ​ອິດ ຢູ່​ໃນ​ອິນ­ດູ­ຈີນ​ໃຫ້​ປະ​ລາ​ໄຊ​ຢ່າງ​ເຈັບ​ແສບ ໄຊ­ຊະ­ນະ​ດຽນ​ບຽນ​ຟູ ແມ່ນ​ສັນ­ຍະ­ລັກ​ທີ່​ມີ​ຊີ­ວິດ​ຊີ­ວາ​ຂອງ​ສາຍ​ພົວ­ພັນ​ມິດ­ຕະ­ພາບ​ທີ່​ຍິ່ງ​ໃຫຍ່ ຄວາມ​ສາ­ມັກ­ຄີ​ພິ­ເສດ ແລະ ການ​ຮ່ວມ​ສຳ­ພັນ​ສູ້​ຮົບ​ທີ່​ແໜ້ນ​ແຟ້ນ​ລະ­ຫວ່າງ​ກອງ­ທັບ ແລະ ປະ­ຊາ­ຊົນ​ສອງ​ຊາດ​ລາວ-ຫວຽດ­ນາມ​ຂອງ​ພວກ​ເຮົາ ຈາກ​ໄຊ­ຊະ­ນະ​ດັ່ງ­ກ່າວ ບວກ​ກັບ​ການ​ຕໍ່­ສູ້​ກູ້​ຊາດ​ອັນ​ລຳ­ບາກ​ຍາວ​ນານ​ຂອງ​ປະ­ຊາ­ຊົນ​ລາວ​ບັນ­ດາ­ເຜົ່າ ໄດ້​ເຮັດ​ໃຫ້​ແອກ​ຄອບ​ຄອງ​ຂອງ​ພວກ​ຈັກ­ກະ­ພັດ​ລ່າ​ເມືອງ​ຂຶ້ນ​ແບບ​ເກົ່າ​ຢູ່​ລາວ ໄດ້​ຖືກ​ພັງ​ທະ​ລາຍ​ລົງ.

ຂ່າວທີ່ກ່ຽວຂ້ອງ