ພຶດຕິກຳສໍ້ລາດບັງຫຼວງ

1.059 13 ພ.ພ. 2019 ນານາສາລະ

    ຫາກ​ເວົ້າ​ເຖິງ​ການ​ສໍ້​ລາດ​ບັງ​ຫຼວງ ອາດ​ປາ­ກົດ​ຍັງ​ມີ​ຫຼາຍ​ຄົນ​ທີ່​ຍັງ​ບໍ່​ເຂົ້າ­ໃຈ​ແຈ້ງ­ວ່າ ພຶດ­ຕິ​ກຳ​ກົດ​ໜ່ວງ​ຖ່ວງ​ດຶງ​ເອ­ກະ­ສານ​ຂອງ​ປະ­ຊາ­ຊົນ ທີ່​ເຂົ້າ​ມາ​ຍື່ນ​ເພື່ອ​ຂໍ​ລາຍ​ເຊັນ​ອະ­ນຸ­ຍາດ​ຕາມ​ລະ­ບຽບ​ກົດ­ໝາຍ​ຂອງ​ບ້ານ​ເມືອງ ການ​ແອບ​ອ້າງ ຫຼື ບ່ຽງ​ເບນ​ຫາ​ຈຸດ​ຜິດ ຫຼື ຂໍ້​ບົກ​ຜ່ອງ​ກໍ​ແມ່ນ​ປາ­ກົດ­ການ​ໜຶ່ງ​ທີ່​ປາ­ກົດ​ມີ​ຫາງ​ສຽງ​ຈາກ​ປະ­ຊາ­ຊົນ ແທນ​ທີ່​ຈະ​ລົງ​ລາຍ​ເຊັນ ຫຼື ນະ­ໂຍ­ບາຍ​ໃຫ້​ເຂົາ​ທັນ​ກັບ​ເວ­ລາ​ທີ່​ຕ້ອງ­ການ ນັ້ນ​ກໍ​ແມ່ນ​ພຶດ­ຕິ​ກຳ​ສໍ້​ລາດ​ບັງ​ຫຼວງ.

    ການ​ກົດ​ໜ່ວງ​ຖ່ວງ​ດຶງ​ເອ­ກະ­ສານ​ຕາມ​ກົດ­ໝາຍ ວ່າ​ດ້ວຍ​ການ​ຕ້ານ​ການ​ສໍ້​ລາດ​ບັງ​ຫຼວງ (ສະ­ບັບ​ປັບ­ປຸງ) 2018 ມາດ­ຕາ 23 ຂຽນ​ໄວ້​ວ່າ: ການ​ກົດ​ໜ່ວງ​ຖ່ວງ​ດຶງ​ເອ­ກະ­ສານ ແມ່ນ​ການ​ກັກ​ໜ່ວງ​ໜ່ຽວ ແກ່­ຍາວ​ເວ­ລາ​ໃນ​ການ​ແກ້​ໄຂ​ເອ­ກະ­ສານ​ທາງ​ການ ໂດຍ​ຜູ້​ມີ​ຖາ­ນະ​ຕຳ­ແໜ່ງ ສິດ​ອຳ­ນາດ​ໜ້າ­ທີ່ ເຊິ່ງ​ກໍ່​ຄວາມ​ເສຍ​ຫາຍ​ແກ່​ຜົນ​ປະ­ໂຫຍດ​ຂອງ​ລັດ ສັງ­ຄົມ ຫຼື ສິດ ແລະ ຜົນ​ປະ­ໂຫຍດ​ອັນ​ຊອບ​ທຳ​ຂອງ​ພົນ­ລະ­ເມືອງ ຂ່າວ​ກ່ຽວ​ກັບ​ພະ­ນັກ­ງານ​ຖືກ​ລົງ​ວິ­ໄນ ປັບ​ໃໝ​ໃສ່​ໂທດ ຖື​ເປັນ​ຂ່າວ​ປະ­ຊາ­ຊົນ ຫຼື ສັງ­ຄົມ​ໃຫ້​ຄວາມ​ສົນ­ໃຈ​ຕິດ­ຕາມ​ເບິ່ງ ເຊິ່ງ​ເປັນ​ການ​ພິ­ສູດ​ໄປ​ໃນ​ໂຕ ເຖິງ​ວິ­ທີ​ການ​ນຳ​ໃຊ້​ກົດ­ໝາຍ​ສະ­ບັບ​ນີ້ ໂດຍ​ສະ­ເພາະ ການ​ເຮັດ​ແທ້​ທຳ​ຈິງ ບໍ່​ມີ​ຂໍ້​ຍົກ­ເວັ້ນ.

    ພຶດ­ຕິ​ກຳ​ສໍ້​ລາດ​ບັງ​ຫຼວງ​ຂອງ​ພະ­ນັກ­ງານ ທີ່​ປາ­ກົດ​ມີ​ເປັນ​ຂ່າວ​ຍັງ​ກ່ຽວ­ຂ້ອງ​ກັບ​ມາດ­ຕາ 21 ຂອງ​ກົດ­ໝາຍ​ດັ່ງ­ກ່າວ ເພາະ​ພົວ­ພັນ​ເຖິງ​ການ​ໃຊ້​ສິດ​ອຳ­ນາດ​ໜ້າ­ທີ່​ປອມ​ແປງ​ເອ­ກະ­ສານ ຫຼື ການ​ນຳ​ໃຊ້​ເອ­ກະ­ສານ​ປອມ ເພາະ​ຜູ້­ກ່ຽວ​ຮູ້​ວ່າ ເອ­ກະ­ສານ​ປອມ ແຕ່​ນຳ­ໄປ​ໃຊ້​ເພື່ອ​ຫາ​ຜົນ​ປະ­ໂຫຍດ​ສ່ວນ​ຕົວ ເຊິ່ງ​ກໍ່​ຄວາມ​ເສຍ​ຫາຍ​ແກ່​ຜົນ​ປະ­ໂຫຍດ​ຂອງ​ລັດ ສັງ­ຄົມ ຫຼື ສິດ ແລະ ຜົນ​ປະ­ໂຫຍດ​ອັນ​ຊອບ​ທຳ​ຂອງ​ພົນ­ລະ­ເມືອງ.

    ກົດ­ໝາຍ​ສະ­ບັບ​ນີ້ ຍັງ​ໄດ້​ແນະ­ນຳ​ວິ­ທີ​ການ​ຕ້ານ ຫຼື ສະ­ກັດ​ກັ້ນ​ໃນ​ມາດ­ຕາ 25 ເຊັ່ນ: (1) ສຶກ​ສາ​ອົບ­ຮົມ​ລະ­ບຽບ​ກົດ­ໝາຍ​ຢ່າງ​ເຂັ້ມ​ງວດ (2) ປັບ­ປຸງ​ກົນ​ໄກ​ບໍ­ລິ­ຫານ​ລັດ​ໃຫ້​ໂປ່ງ​ໃສ (3) ກຳ­ນົດ​ແຜນ​ຈັດ​ຕັ້ງ​ປະ­ຕິ­ບັດ​ນະ­ໂຍ­ບາຍ​ຕໍ່​ພະ­ນັກ­ງານ​ແຕ່​ລະ​ຂັ້ນ​ໃຫ້​ຈະ­ແຈ້ງ (4) ລົງ​ວິ­ໄນ ລົງ­ໂທດ​ຜູ້​ກະ­ທຳ​ຜິດ​ໃນ​ຖານ​ສໍ້​ລາດ​ບັງ​ຫຼວງ​ຢ່າງ​ເຂັ້ມ​ງວດ ແລະ ທັນ​ການ.

    ຜູ້​ຂຽນ​ຂໍ​ສະ­ເໜີ​ເພື່ອ​ແລກ­ປ່ຽນ​ຕື່ມ​ວ່າ: ຝ່າຍ​ກວດ­ກາ ຫຼື ຄຸ້ມ​ຄອງ ຄວນ​ເອົາ­ໃຈ­ໃສ່​ຕິດ­ຕາມ ຊັກ​ຖາມ​ແຕ່​ລະ​ເມືອງ ຫຼື ແຂວງ ໃຫ້​ຈະ­ແຈ້ງ ເພື່ອ​ບໍ່​ເປັນ​ການ​ແຊ່​ດອງ​ບັນ­ຫາ ຖ້າ​ເກີດ​ມີ​ຂຶ້ນ​ເພາະ​ປະ­ຊາ­ຊົນ​ເປັນ​ຜູ້​ເສຍ​ຫາຍ.

ຂ່າວທີ່ກ່ຽວຂ້ອງ