ຂ່າວຫຼ້າສຸດ

ກະຊວງພາຍໃນ ຈະສຳຫຼວດເມືອງທົດລອງຢູ່ 4 ແຂວງ

1.486 10 ພ.ພ. 2019 ຂ່າວໜ້າ​ໜຶ່ງ

    ກະ­ຊວງ​ພາຍ​ໃນ ຈັດ​ກອງ​ປະ­ຊຸມ​ວິ­ຊາ​ການ​ຂອງ​ໜ່ວຍ​ງານ​ຍ່ອຍ ດ້ານ​ການ​ປັບ­ປຸງ​ບໍ­ລິ­ຫານ​ລັດ​ຖະ​ການ ພາຍ​ໃຕ້​ໜ່ວຍ​ງານ​ດ້ານ​ການ​ປົກ­ຄອງ ຂຶ້ນ​ວັນ​ທີ 9 ພຶດ­ສະ­ພາ 2019 ທີ່​ສູນ​ການ​ຮ່ວມ​ມື​ສາ­ກົນ​ລາວ-ຍີ່­ປຸ່ນ (ຫຼັກ 5) ນະ­ຄອນ­ຫຼວງ​ວຽງ​ຈັນ ມີ​ທ່ານ ນິ­ສິດ ແກ້ວ​ປັນ­ຍາ ຫົວ­ໜ້າ​ກົມ​ແຜນ­ການ ແລະ ການ​ຮ່ວມ​ມື ທ່ານ ບາ​ລາ​ສູບ​ຣາ​ນຽມ ໂມ​ຣາ​ລີ ຮອງ​ຜູ້­ຕາງ­ໜ້າ​ອົງ­ການ​ສະ­ຫະ​ປະ­ຊາ​ຊາດ ເພື່ອ​ການ​ພັດ­ທະ­ນາ ທ່ານ​ນາງ ມິ­ຄາ ຮາ​ຣາ​ຣີ ຫົວ­ໜ້າ​ແຜນ​ງານ​ດ້ານ​ການ​ປົກ­ຄອງ​ອົງ­ການ​ຮ່ວມ​ມື ເພື່ອ​ການ​ພັດ­ທະ­ນາ​ປະ­ເທດ​ສະ​ວິດ ພ້ອມ​ດ້ວຍ​ຜູ້­ຕາງ­ໜ້າ​ຈາກ​ກະ­ຊວງ ອົງ​ການ­ຈັດ­ຕັ້ງ​ທາງ​ສັງ­ຄົມ ແລະ ອຳ­ນາດ​ການ​ປົກ­ຄອງ​ທ້ອງ­ຖິ່ນ​ເຂົ້າ​ຮ່ວມ.

    ກອງ​ປະ­ຊຸມ​ໄດ້​ນຳ​ເອົາ 2 ຫົວ­ຂໍ້​ສຳ­ຄັນ​ມາ​ແລກ­ປ່ຽນ​ຖອດ​ຖອນ​ບົດ­ຮຽນ ປະ­ກອບ​ມີ​ຮ່າງ​ດຳ­ລັດ​ວ່າ​ດ້ວຍ​ວຽກ​ງານ​ຊົນ­ເຜົ່າ ແລະ ແນວ​ຄວາມ​ຄິດ​ໃນ​ການ​ສຳ​ຫຼວດ​ຄວາມ​ຄິດ​ເຫັນ ຂອງ​ການ​ສຳ​ຫຼວດ​ຄວາມ​ຄິດ​ເຫັນ ຂອງ​ປະ­ຊາ­ຊົນ ຕໍ່​ກັບ​ການ​ບໍ­ລິ­ຫານ​ຂອງ​ລັດ ເຊິ່ງ​ໃນ​ການ​ປັບ­ປຸງ​ໃໝ່​ປີ​ນີ້ ຮ່າງ​ດຳ­ລັດ​ວ່າ​ດ້ວຍ​ວຽກ​ງານ​ຊົນ­ເຜົ່າ ປະ­ກອບ​ດ້ວຍ 6 ໝວດ 36 ມາດ­ຕາ ເຊິ່ງ​ດຳ­ລັດ​ດັ່ງ­ກ່າວ ສ້າງ​ຂຶ້ນ​ເພື່ອ​ກຳ­ນົດ​ຫຼັກ­ການ ລະ­ບຽບ​ການ ແລະ ມາດ​ຕະ­ການ​ກ່ຽວ​ກັບ​ການ​ຄຸ້ມ​ຄອງ ຕິດ­ຕາມ​ກວດ­ກາ​ວຽກ​ງານ​ຊົນ­ເຜົ່າ ແນ­ໃສ່​ເຮັດ​ໃຫ້​ໄດ້​ຮັບ​ການ­ຈັດ­ຕັ້ງ​ປະ­ຕິ­ບັດ​ຢ່າງ​ມີ​ປະ­ສິດ­ທິ­ພາບ ເຮັດ​ໃຫ້​ຊົນ­ເຜົ່າ​ຕ່າງໆ ມີ​ຄວາມ​ສາ­ມັກ­ຄີ​ປອງ​ດອງ ສະ­ເໝີ­ພາບ ເຄົາ­ລົບ​ນັບ­ຖື ຊ່ວຍ­ເຫຼືອ​ເຊິ່ງ​ກັນ ແລະ ກັນ ຮັບ­ປະ­ກັນ​ການ​ມີ​ສ່ວນ​ຮ່ວມ​ຂອງ​ທຸກ​ຊົນ­ເຜົ່າ ເຂົ້າ​ໃນ​ການ​ປັກ​ປັກ​ຮັກ­ສາ ແລະ ສ້າງ­ສາ​ພັດ­ທະ­ນາ​ປະ­ເທດ​ຊາດ ພ້ອມ​ນີ້ ຜູ້​ເຂົ້າ​ຮ່ວມ​ຍັງ​ໄດ້​ແລກ­ປ່ຽນ​ສົນ­ທະ­ນາ​ກ່ຽວ​ກັບ​ວຽກ​ງານ​ການ​ບໍ­ລິ­ຫານ​ລັດ ແລະ ປັບ­ປຸງ​ຍົກ​ລະ­ດັບ​ຈາກ​ການ​ສຳ​ຫຼວດ​ໃນ​ເມືອງ​ທົດ​ລອງ ໄລ­ຍະ​ປີ 2015-2016 ຢູ່​ເມືອງ​ຮຸນ ແຂວງ​ອຸ­ດົມ​ໄຊ ແລະ ເມືອງ​ສາ­ລະ​ວັນ ແຂວງ​ສາ­ລະ​ວັນ ໃນ​ປີ 2019 ການ​ສຳ​ຫຼວດ​ດັ່ງ­ກ່າວ ຈະ​ໄດ້​ປະ­ຕິ­ບັດ​ຢູ່ 4 ເມືອງ ປະ­ກອບ​ມີ​ເມືອງ​ຂວາ ແຂວງ​ຜົ້ງ​ສາ­ລີ ເມືອງ​ຊຽງ​ຄໍ້ ແຂວງ​ຫົວ­ພັນ ເມືອງ​ຫີນ​ບູນ ແຂວງ​ຄຳ​ມ່ວນ ແລະ ເມືອງ​ໄຊ​ເສດ​ຖາ ແຂວງ​ອັດ​ຕະ​ປື.

ຂ່າວທີ່ກ່ຽວຂ້ອງ