ຂ່າວຫຼ້າສຸດ

ອີ​ຣານ​ງົດ​ປະຕິບັດ​ຄຳ​ສັນຍາ​ຈຳນວນ​ໜຶ່ງ​ຢູ່​ໃນ​ຂໍ້​ຕົກລົງ​ນີວ​ເຄລຍ

1.123 10 ພ.ພ. 2019 ຂ່າວຕ່າງປະເທດ
 ອີ​ຣານ​ງົດ​ປະຕິບັດ​ຄຳ​ສັນຍາ​ຈຳນວນ​ໜຶ່ງ​ຢູ່​ໃນ​ຂໍ້​ຕົກລົງ​ນີວ​ເຄລຍ

    ສຳນັກ​ຂ່າວສານ IRIB ຂອງ​ອີ​ຣານ ລາຍ​ງານ​ເມື່ອ​ວັນ​ທີ 8 ພຶດສະພາ​ນີ້​ວ່າ ອີ​ຣານ​ໄດ້​ແຈ້ງ​ຕໍ່​ເອກ​ອັກ​ຄະ​ລັດ​ຖະ​ທູດ​ຂອງ ອັງກິດ ຝຣັ່ງ ເຢຍ​ລະ​ມັນ ຈີນ ແລະ ຣັດ​ເຊຍ ປະຈຳ​ອີ​ຣານ ກ່ຽວ​ກັບ​ການ​ຕົກລົງ​ງົດ​ປະຕິບັດ​ຄຳ​ສັນຍາ​ຈຳນວນ​ໜຶ່ງ ຢູ່​ໃນ​ຂໍ້​ຕົກລົງ​ນີວ​ເຄລຍ ທີ່​ໄດ້​ລົງ​ນາມ​ເມື່ອ​ປີ 2015.

    ສື່ສານ​ໃນ​ອີ​ຣານ ລາຍ​ງານ​ເມື່ອ​ວັນ​ທີ 6 ພຶດສະພາ​ທີ່​ຜ່ານ​ມາ​ວ່າ ອີ​ຣານ​ອາດ​ຈະ​ປະກາດ ບັນດາ​ມາດ​ຕະການ​ຕອບ​ໂຕ້ ສ ອາ​ເມ​ຣິ​ກາ ໃນ​ວັນ​ທີ 8 ພຶດສະພາ ຊຶ່ງ​ເປັນ​ເວລາ​ຂີດ​ໝາຍ​ຄົບຮອບ 1 ປີ ຫຼັງ​ຈາກ​ທີ່ ສ ອາ​ເມ​ຣິ​ກາ ຖອນ​ອອກ​ຈາກ​ຂໍ້​ຕົກລົງ​ນີວ​ເຄລຍ​ກັບ​ອີ​ຣານ.

    ກ່ອນ​ໜ້າ​ນັ້ນ ສຳນັກ​ຂ່າວສານ ISNA ທີ່​ເປັນ​ເຄິ່ງ​ທາງ​ການ​ຂອງ​ອີ​ຣານ ໄດ້​ອ້າງ​ຕາມ ແຫຼ່ງ​ຂ່າວ​ເປີດເຜີຍ​ໃຫ້​ຮູ້​ວ່າ ປະທານາທິບໍດີ​ອີ​ຣານ ​ຮັສ​ຊັນ ຣູ​ຮາ​ນີ ອາດ​ຈະ​ປະກາດ​ແຜນການ​ຕອບ​ໂຕ້ ສ ອາ​ເມ​ຣິ​ກາ ເປັນ​ເທື່ອ​ລະ​ກ້າວ ອັນ​ປະກອບ​ດ້ວຍ​ການ​ຫຼຸດຜ່ອນ​ສ່ວນ​ໜຶ່ງ ຫຼື​ຕັດ​ຫຼຸດ​ຢ່າງ​ສິ້ນ​ເຊີງ ສຳລັບ​ຄຳ​ສັນຍາ​ຈຳນວນ​ໜຶ່ງ​ຂອງ​ອີ​ຣານ ກໍ​ຄື​ການ​ກັບ​ມາ​ເລີ່ມ​ເຄື່ອນ​ໄຫວ​ນີວ​ເຄລຍ ທີ່​ໄດ້​ຖືກ​ງົດ​ໄປ ຢູ່​ໃນ​ຂອບ​ຂອງ​ແຜນການ​ດຳເນີນ​ງານ​ຮ່ວມ​ຮອບດ້ານ  (JCPOA) ຊຶ່ງ​ກຸ່ມ P5+1 (ປະກອບ​ມີ​ອັງກິດ ສ ອາ​ເມ​ຣິ​ກາ ຣັດ​ເຊຍ ຝຣັ່ງ ຈີນ ແລະ ​ເຢຍ​ລະ​ມັນ) ໄດ້​ລົງ​ນາມ​ກັບ​ອີ​ຣານ ເມື່ອ​ປີ 2015.

    ໃນ​ຂະນະ​ດຽວ​ກັນ ປະທານາທິບໍດີ ສ ອາ​ເມ​ຣິ​ກາ ໂດ​ນາ​​ລ ທຣຳ ໄດ້​ມີ​ດຳລັດ​ອອກ​ມາ ໃນ​ວັນ​ທີ 8 ພຶດສະພາ​ນີ້ ກ່ຽວ​ກັບ​ການ​ປະຕິບັດ​ການ​ປິດ​ລ້ອມ​ຕໍ່​ສອງ​ຂະແໜງການ ອຸດສາຫະກຳ​ຕົ້ນຕໍ ຂອງ​ອີ​ຣານ. ດຳລັດ​ນີ້​ມີ​ອອກ​ມາ ບໍ່​ພໍ​ເທົ່າໃດ​ຊົ່ວໂມງ ຫຼັງ​ຈາກ​ທີ່​ອີ​ຣານ​ປະກາດ​ທີ່​ຈະ ປະລະ​ຄຳ​ສັນຍາ​ຈຳນວນ​ໜຶ່ງ ຢູ່​ໃນ​ຂໍ້​ຕົກລົງ​ນີວ​ເຄລຍ​ທີ່​ໄດ້​ລົງ​ນາມ​ເມື່ອ​ປີ 2015 ແລະ​ກໍ​ພໍດີ​ກັບ​ເວລາ​ຄົບຮອບ 1 ປີ ຫຼັງ​ຈາກ​ທີ່ ສ ອາ​ເມ​ຣິ​ກາ ປະກາດ​ຖອນ​ອອກ​ຈາກ​ຂໍ້​ຕົກລົງ​ນັ້ນ. ທຳ​ນຽບ​ຂາວ ແຈ້ງ​ໃຫ້​ຮູ້​ວ່າ ສອງ​ຂະແໜງການ​ດ້ານ​ອຸດສາຫະກຳ​ທີ່​ຖືກ​ປິດ​ລ້ອມ​ນັ້ນ ແມ່ນ​ແນໃສ່​ຂົງເຂດ​ບໍ່​ແຮ່ ແລະ ໂລຫະ ຊຶ່ງ​ເປັນ​ແຫຼ່ງ​ລາຍ​ຮັບ​ອັນ​ໃຫຍ່​ໂຕ​ຂອງ​ອີ​ຣານ ໂດຍ​ເປັນ​ຮອງ ຈາກ​ນ້ຳມັນ.

ຂ່າວທີ່ກ່ຽວຂ້ອງ