ຂ່າວຫຼ້າສຸດ

WHO ຮຽກຮ້ອງ​ສັກ​ວັກ​ແຊງ​ປ້ອງ​ກັນ​ພະຍາດ​ອີ​ໂບ​ລາ​ຢູ່​ໃນ ​ສປ ກົງ​ໂກ

1.041 10 ພ.ພ. 2019 ຂ່າວຕ່າງປະເທດ
WHO ຮຽກຮ້ອງ​ສັກ​ວັກ​ແຊງ​ປ້ອງ​ກັນ​ພະຍາດ​ອີ​ໂບ​ລາ​ຢູ່​ໃນ ​ສປ ກົງ​ໂກ

    ອົງການ​ອະນາໄມ​ໂລກ (WHO) ຮຽກຮ້ອງ​ອອກ​ມາ​ເມື່ອ​ວັນ​ທີ 7 ພຶດສະພາ​ນີ້​ວ່າ ການ​ສັກ​ວັກ​ແຊງ​ປ້ອງ​ກັນ​ພະຍາດ​ອີ​ໂບ​ລາ (Ebola) ເປັນ​ບໍລິເວນ​ກວ້າງ ເປັນ​ຮູບ​ການ​ທີ່​ໄດ້ຜົນ​ທີ່​ສຸດ ເພື່ອ​ສະກັດ​ກັ້ນ​ການ​ແຜ່​ລາມ​ຂອງ​ພະຍາດ​ດັ່ງກ່າວ ຢູ່​ໃນ​ສາທາລະນະ​ລັດ ປະຊາທິປະໄຕ ກົງ​ໂກ (​ສປ ກົງ​ໂກ) ບ່ອນ​ຊຶ່ງ​ເກີດ​ການ​ລະບາດ​ໃໝ່​ຫຼ້າ​ສຸດ ທີ່​ໄດ້​ເຮັດ​ໃຫ້​ມີ​ຜູ້​ເສຍ​ຊີວິດ​ໄປ​ແລ້ວ 1.000 ກວ່າ​ຄົນ.

    WHO ໃຫ້​ຮູ້​ວ່າ​ມີ 110.000 ກວ່າ​ຄົນ ໄດ້​ພົ້ນ​ຈາກ​ພະຍາດ ຍ້ອນ​ບັ້ນ​ສັກ​ວັກ​ແຊງ​ປ້ອງ​ກັນ ໃນ​ຈຸດ​ທີ່​ສຳຄັນ ນັ້ນ​ກໍ​ຄື​ການ​ສັກ​ວັກ​ແຊງ rVSV-ZEBOV ປ້ອງ​ກັນ​ພະຍາດ​ອີ​ໂບ​ລາ ໃຫ້​ແກ່​ຜູ້​ທີ່​ມີ ຄວາມ​ສ່ຽງ​ສູງ​ທີ່​ຈະ​ຕິດພະຍາດ ຍ້ອນ​ວ່າ​ໄດ້​ສຳຜັດ​ກັບ​ຄົນ​ເຈັບ ແລະ ​ຜູ້​ທີ່​ສຳ​ພັດ​ກັບ​ເຂົາເຈົ້າ.

    ເຖິງ​ຢ່າງໃດ​ກໍ​ຕາມ ເພື່ອ​ໃຫ້ການ​ສັກ​ຢາ​ປ້ອງ​ກັນ​ມີ​ຄວາມ​ເຂັ້ມ​ງວດ​ກວ່າ​ເກົ່າ​ນັ້ນ ບັນດາ ຊ່ຽວຊານ​ຂອງ WHO ໄດ້​ແຈ້ງ​ເຕືອນ​ໄປ​ຍັງ​ເຈົ້າ​ໜ້າທີ່​ສາທາລະນະ​ສຸກ​ຂອງ ​ສປ ກົງ​ໂກ ວ່າ​ຄວນ​ຜັນ​ຂະຫຍາຍ​ບັ້ນ​ສັກ​ຢາ​ກັນ​ພະຍາດ​ທັນທີ ໃຫ້​ແກ່​ປະຊາຊົນ​ທຸກໆ​ຄົນ ຢູ່​ໃນ​ທຸກໆ​ທ້ອງຖິ່ນ ທີ່​ມີ​ຜູ້​ຕິດພະຍາດ​ດັ່ງກ່າວ​ໃນ​ທົ່ວ​ປະເທດ.

    rVSV-ZEBOV ເປັນ​ວັກ​ແຊງ​ປະເພດ​ໃໝ່ ຊຶ່ງ​ປຸງ​ແຕ່ງ​ໂດຍ​ບໍລິສັດ​ການ​ຢາ Merck ເຖິງ​ວ່າ​ຍັງ​ບໍ່​ທັນ​ໄດ້​ມີ​ໃບ​ອະນຸຍາດ ແຕ່​ກໍ​ໄດ້​ມີ​ການ​ພິສູດ​ວ່າ​ມີ​ຄວາມ​ປອດ​ໄພ ແລະ​ມີ​ປະສິດທິພາບ. ໃນ​ຂະນະ​ດຽວ​ກັນ ບັນດາ​ຊ່ຽວຊານ ກໍ​ສະເໜີ​ໃຫ້​ໃຊ້​ວັກ​ແຊງ​ອີກ​ປະເພດ​ໜຶ່ງ ທີ່​ມີ​ຊື່ວ່າ MVA -BN ໂດຍ​ແມ່ນ​ກຸ່ມ​ບໍລິສັດ Johnson & Johnson ປຸງ​ແຕ່ງ.

ຂ່າວທີ່ກ່ຽວຂ້ອງ