ຂ່າວຫຼ້າສຸດ

ຣັດ​ເຊຍ ໃຫ້​ສັດຕະຍາບັນ​ແຜນການ​ເຂົ້າ​ໄປ​ໃນ​ໝວດ 5 ພື້ນຖານ​ເສດຖະກິດ​ໃຫຍ່​ສຸດ​ໃນ​ໂລກ

1.018 10 ພ.ພ. 2019 ຂ່າວຕ່າງປະເທດ
ຣັດ​ເຊຍ ໃຫ້​ສັດຕະຍາບັນ​ແຜນການ​ເຂົ້າ​ໄປ​ໃນ​ໝວດ 5 ພື້ນຖານ​ເສດຖະກິດ​ໃຫຍ່​ສຸດ​ໃນ​ໂລກ

   ແຫຼ່ງ​ຂ່າວ​ຈາກ​ຣັດ​ເຊຍ ໃຫ້​ຮູ້​ວ່າ ວັນ​ທີ 8 ພຶດສະພາ​ນີ້ ນາຍົກລັດຖະມົນຕີ​ຣັດ​ເຊຍ ດີ​ມີ​ຕຣີ ເມດ​ເວ​ເດບ ໄດ້​ໃຫ້​ສັດຕະຍາບັນ​ແຜນການ​ກ່ຽວ​ກັບ​ບັນດາ​ຄາດໝາຍ​ແຫ່ງ​ຊາດ  ໃນ​ການ​ພັດທະນາ ປະເທດ​ຊາດ ແຕ່​ນີ້​ຮອດ​ປີ 2024 ຊຶ່ງ​ຕາມ​ນັ້ນແລ້ວ​ກໍ​ແມ່ນ​ຣັດ​ເຊຍ ຈະ​ລ້ຳ​ໜ້າ​ເຢຍ​ລະ​ມັນ ໃນ​ດ້ານ​ຍອດ​ຜະລິດ​ຕະ​ພັນ​ພາຍ​ໃນ​ປະເທດ (GDP) ແລະ ​ລອດ​ເຂົ້າ​ໄປ​ໃນ​ໝວດ 5 ພື້ນຖານ ເສດຖະກິດ​ໃຫຍ່​ສຸດ​ໃນ​ໂລກ.

    ໃນ​ໃບ​ສະເໜີ​ຄັດ​ຕິດ ຊີ້​ແຈງ​ວ່າ ແຜນການ​ດັ່ງກ່າວ​ໄດ້​ຮັບ​ການ​ໃຫ້​ສັດຕະຍາບັນ ເພື່ອ​ປະຕິບັດ ລັດ​ຖະ​ດຳລັດ​ຂອງ​ປະທານາທິບໍດີ​ຣັດ​ເຊຍ ສະບັບ​ວັນ​ທີ 7 ພຶດສະພາ ປີ 2018 “ວ່າ​ດ້ວຍ​ຄາດໝາຍ ແຫ່ງ​ຊາດ ແລະ​ ໜ້າທີ່​ຍຸດ​ທະ​ສາດ ການ​ພັດທະນາ​ສະຫະພັນ​ຣັດ​ເຊຍ ໄລຍະ​ຮອດ​ປີ 2024.” ໜຶ່ງ​ໃນ​ໜ້າທີ່​ດັ່ງກ່າວ ກໍ​ແມ່ນ​ການ​ນຳ​ເອົາ​ຣັດ​ເຊຍ ເຂົ້າ​ໄປ​ໃນ​ໝວດ 5 ພື້ນຖານ​ເສດຖະກິດ​ໃຫຍ່​ສຸດ ໃນ​ໂລກ ຮັບປະກັນ​ຈັງຫວະ​ຄວາມ​ເຕີບ​ໂຕ​ເສດຖະກິດ ຢູ່​ສູງ​ກວ່າ​ຈັງຫວະ​ເຕີບ​ໂຕ​ຂອງ​ໂລກ ໂດຍ​ທີ່​ຍັງ​ຄົງ​ຮັກສາ​ຄວາມ​ໝັ້ນຄົງ​ທາງ​ດ້ານ​ເສດຖະກິດ ແລະ​ເງິນ​ເຟີ້​ບໍ່​ເກີນ 4%.

     ຕາມ​ຄາດໝາຍ​ດັ່ງກ່າວ​ແລ້ວ ຈັງຫວະ​ຄວາມ​ເຕີບ​ໂຕ​ເສດຖະກິດ​ຂອງ​ຣັດ​ເຊຍ ຕ້ອງ​ຢູ່​ທີ່ ລະດັບ​ກວ່າ 3% ຊຶ່ງ​ເປັນ​ລະດັບ​ທີ່​ຊ່ວຍ​ໃຫ້​ຣັດ​ເຊຍ ຮັດ​ແຄບ​ຊ່ອງ​ຫວ່າງ​ໃນ​ດ້ານ GDP ກັບ​ເຢຍ​ລະ​ມັນ ທີ່​ເປັນ​ພື້ນຖານ​ເສດຖະກິດ​ໃຫຍ່​ອັນ​ດັບ 5 ຂອງ​ໂລກ ແລະ​ສູງ​ກວ່າ​ຈັງຫວະ ການ​ຄາດ​ຄະເນ​ຄວາມ​ເຕີບ​ໂຕ​ຂອງ​ໂລກ. ແຜນການ​ໄດ້​ວາງ​ຕົວ​ເລກ​ຕົວ​ຈິງ​ອອກ​ມາ​ກ່ຽວ​ກັບ GDP ກໍ​ຄື​ປີ 2019 GDP ຂອງ​ຣັດ​ເຊຍ​ຈະ​ຕ້ອງ​ໄດ້​ເພີ່ມ​ຂຶ້ນ 1,3% ປີ 2020 ເພີ່ມ​ຂຶ້ນ 2,0% ປີ 2021 ເພີ່ມ​ຂຶ້ນ 3,1% ປີ 2022 ເພີ່ມ​ຂຶ້ນ 3,2% ປີ 2023 ເພີ່ມ​ຂຶ້ນ 3,3% ແລະ​ປີ 2024 ເພີ່ມ​ຂຶ້ນ 3,3%.

ຖ້າ​ຫາກ​ເປັນ​ໄປ​ຄື​ດັ່ງກ່າວ​ແລ້ວ ພື້ນຖານ​ເສດຖະກິດ​ຣັດ​ເຊຍ ຈະ​ເຂົ້າ​ໄປ​ຢູ່​ໃນ​ອັນ​ດັບ​ທີ 5 ຂອງ​ໂລກ ພາຍ​ໃນ​ປີ 2023. ກອງ​ທຶນ​ເງິນຕາ​ສາກົນ (IMF) ໃຫ້ການ​ຕີ​ລາຄາ​ວ່າ ປັດຈຸບັນ​ນີ້ ເສດຖະກິດ​ຣັດ​ເຊຍ ຈັດ​ຢູ່​ໃນ​ອັນ​ດັບ​ທີ 6 ໃນ​ດ້ານ GDP ຕາມ​ກຳລັງ​ຈັດ​ຊື້​ທີ່​ເທົ່າໆ​ກັນ (purchasing power parity). ກ່ຽວ​ກັບ​ດັດ​ສະ​ນີ​ດັ່ງກ່າວ ໃນ​ປີ 2017 ຣັດ​ເຊຍ​ເປັນ​ຮອງ​ເຢຍ​ລະ​ມັນ 4,4% ໃນ​ຂະນະ​ທີ່ GDP ຂອງ​ຣັດ​ເຊຍ ໃຫຍ່​ກວ່າ GDP ຂອງ​ອິນ​ໂດ​ເນ​ເຊຍ ທີ່​ຈັດ​ຢູ່​ໃນ​ອັນ​ດັບ​ທີ 7 (19,1%)./

ຂ່າວທີ່ກ່ຽວຂ້ອງ