ສ້າງຄວາມເຂັ້ມແຂງວຽກງານແນວລາວສ້າງຊາດ ໃຫ້ແຂວງພາກເໜືອ

1.228 09 ພ.ພ. 2019 ຂ່າວໜ້າ​ໜຶ່ງ

    ເພື່ອ​ແນ­ໃສ່​ຕອບ​ສະ­ໜອງ​ຄວາມ​ຮຽກ­ຮ້ອງ​ຕ້ອງ­ການ ຂອງ​ວຽກ​ງານ​ແນວ​ລາວ​ສ້າງ​ຊາດ ໃຫ້​ທັນ​ກັບ​ສະ­ພາບ​ການ ໃນ​ວັນ​ທີ 6-10 ພຶດ­ສະ­ພາ 2019 ຢູ່​ສູນ​ເຝິກ­ອົບ­ຮົມ​ສູນ​ກາງ​ແນວ​ລາວ​ສ້າງ​ຊາດ (ສນຊ) ຈັດ​ກອງ​ປະ­ຊຸມ​ອົບ­ຮົມ​ວຽກ​ງານ​ແນວ​ລາວ​ສ້າງ​ຊາດ ໃຫ້​ພະ­ນັກ­ງານ​ແນວ​ລາວ​ສ້າງ​ຊາດ 6 ແຂວງ​ພາກ​ເໜືອ ແຂວງ​ຜົ້ງ​ສາ­ລີ ບໍ່​ແກ້ວ ຫຼວງ​ນ້ຳ​ທາ ອຸ­ດົມ​ໄຊ ຫຼວງ​ພະ​ບາງ ແລະ ແຂວງ​ຊຽງ​ຂວາງ ເປັນ​ປະ­ທານ​ຂອງ​ທ່ານ​ນາງ ຄຳ​ຈັນ ພົມ​ແສງ​ສະ­ຫວັນ ຮອງ​ປະ­ທານ​ສູນ​ກາງ​ແນວ​ລາວ​ສ້າງ​ຊາດ ມີ​ປະ­ທານ ຮອງ​ປະ­ທານ​ແນວ​ລາວ​ສ້າງ​ຊາດ​ແຂວງ ເມືອງ ແລະ ພະ­ນັກ­ງານ​ວິ­ຊາ​ການ​ເຂົ້າ​ຮ່ວມ

    ໂອ­ກາດ​ນີ້ ທ່ານ​ຮອງ​ປະ­ທານ ສນຊ ໄດ້​ຫວນ​ຄືນ​ປະ­ຫວັດ​ການ​ກຳ­ເນີດ​ການ​ເຕີບ​ໃຫຍ່​ຂະ­ຫຍາຍ­ຕົວ ແລະ ມູນ­ເຊື້ອ​ອັນ​ສະ­ຫງ່າ​ລາ­ສີ​ຂອງ​ແນວ​ລາວ​ສ້າງ​ຊາດ​ໂດຍ​ຫຍໍ້ ພ້ອມ​ທັງ​ຮຽກ­ຮ້ອງ​ໃຫ້​ຜູ້​ເຂົ້າ​ຮ່ວມ​ຈົ່ງ​ພ້ອມ​ກັນ​ເຊີດ​ຊູ​ຄວາມ​ຮັບ­ຜິດ­ຊອບ ແລະ ເປັນ​ເຈົ້າ​ການ​ໃນ​ການ​ຮັບ​ຟັງ​ການ​ນຳ​ສະ­ເໜີ​ເອ­ກະ­ສານ​ທີ່​ສຳ­ຄັນ ຂອງ​ວຽກ​ງານ​ແນວ​ລາວ​ສ້າງ​ຊາດ ຍົກ​ສູງ​ນ້ຳ­ໃຈ​ຮັບ­ຜິດ­ຊອບ​ໃນ​ການ​ຄົ້ນ­ຄວ້າ ປຶກ­ສາ​ຫາ­ລື ແລະ ພ້ອມ​ກັນ​ປະ­ກອບ​ຄຳ​ຄິດ​ຄຳ​ເຫັນ​ແລກ­ປ່ຽນ​ບົດ­ຮຽນ​ເຊິ່ງ​ກັນ ແລະ ກັນ ທາງ​ທິດ​ສະ​ດີ ແລະ ພຶດ­ຕິ​ກຳ​ຕົວ​ຈິງ ໃນ​ການ­ເຄື່ອນ­ໄຫວ​ວຽກ​ງານ​ແນວ​ລາວ​ສ້າງ​ຊາດ ຢູ່​ແຕ່​ລະ​ທ້ອງ­ຖິ່ນ.

    ນອກ​ນີ້ ຜູ້​ເຂົ້າ​ຮ່ວມ​ຍັງ​ໄດ້​ຮັບ​ຟັງ​ການ​ເຜີຍ­ແຜ່ 8 ເອ­ກະ­ສານ​ທີ່​ສຳ­ຄັນ​ຂອງ​ວຽກ​ງານ​ແນວ​ລາວ​ສ້າງ​ຊາດ​ຄື: ທັດ­ສະ­ນະ​ຂອງ​ພັກ-ນະ­ໂຍ­ບາຍ​ຂອງ​ລັດ ຕໍ່​ວຽກ​ງານ​ແນວ​ລາວ​ສ້າງ​ຊາດ ວຽກ​ງານ​ກວດ­ກາ​ຂອງ​ແນວ​ລາວ​ສ້າງ​ຊາດ ວຽກ​ງານ​ຊັ້ນ​ຄົນ-ອົງ​ການ­ຈັດ­ຕັ້ງ​ສັງ­ຄົມ ວຽກ​ງານ​ໂຄ­ສະ­ນາ-ຂົນ­ຂວາຍ​ປະ­ຊາ­ຊົນ ວຽກ​ງານ​ສາ­ສະ­ໜາ ວຽກ​ງານ​ຈັດ​ຕັ້ງ-ພະ­ນັກ­ງານ ວຽກ​ງານ​ຊົນ­ເຜົ່າ ແລະ ວຽກ​ງານ​ຫ້ອງ­ການ​ຕື່ມ​ອີກ.

ຂ່າວທີ່ກ່ຽວຂ້ອງ