ເພີ່ມທັກສະການລົງພົບປະຜູ້ມີສິດເລືອກຕັ້ງໃຫ້ ສສຂ

1.343 09 ພ.ພ. 2019 ຂ່າວໜ້າ​ໜຶ່ງ

    ວັນ​ທີ 6-7 ພຶດ­ສະ­ພາ 2019 ທີ່​ຫ້ອງ​ວ່າ­ການ​ປົກ­ຄອງ​ແຂວງ​ຫຼວງ​ພະ​ບາງ ສະ​ຖາ​ບັນ​ຄົ້ນ­ຄວ້າ​ນິ­ຕິ​ກຳ​ສະ­ພາ​ແຫ່ງ​ຊາດ ໄດ້​ຈັດ​ເຝິກ­ອົບ­ຮົມ​ທັກ​ສະ­ການ​ຕິດ­ຕາມ​ກວດ­ກາ ການ​ຊັກ​ຖາມ ແລະ ການ​ລົງ​ພົບ​ປະ​ຜູ້​ມີ​ສິດ​ເລືອກ​ຕັ້ງ​ໃຫ້​ສະ­ມາ­ຊິກ​ສະ­ພາ​ປະ­ຊາ­ຊົນ​ແຂວງ (ສສຂ) ໂດຍ​ເປັນ​ປະ­ທານ​ຂອງ​ທ່ານ ຄຳ​ເຜີຍ ປານ​ມະ​ໄລ​ທອງ ຫົວ­ໜ້າ​ສະ​ຖາ​ບັນ​ຄົ້ນ­ຄວ້າ​ນິ­ຕິ​ກຳ​ສະ­ພາ​ແຫ່ງ​ຊາດ ມີ​ຜູ້­ຕາງ­ໜ້າ​ຈາກ​ຄະ­ນະ​ວຽກ​ງານ​ຜູ້​ແທນ​ປະ­ຊາ­ຊົນ ຄະ­ນະ​ປະ­ຈຳ​ແຫ່ງ​ຊາດ​ຫວຽດ­ນາມ ນຳ​ໂດຍ​ທ່ານ ຫວຽນ ຕ໋ວນ ແອັງ ສະ­ມາ­ຊິກ​ສະ­ພາ​ແຫ່ງ​ຊາດ​ແຂວງ​ບິ່ງ​ເຟືອກ ຮອງ​ຫົວ­ໜ້າ​ຄະ­ນະ​ຊ່ວຍ​ວຽກ​ງານ​ຜູ້​ແທນ​ປະ­ຊາ­ຊົນ​ສະ­ພາ​ແຫ່ງ​ຊາດ​ຫວຽດ­ນາມ ພ້ອມ​ດ້ວຍ​ວິ­ທະ­ຍາ­ກອນ​ຈາກ​ຫວຽດ­ນາມ ມີ​ສະ­ມາ­ຊິກ​ສະ­ພາ​ປະ­ຊາ­ຊົນ​ແຂວງ​ຈາກ 7 ແຂວງ​ພາກ​ເໜືອ ຕາງ­ໜ້າ​ຄະ­ນະ​ເລ­ຂາ­ທິ­ການ​ສະ­ພາ​ປະ­ຊາ­ຊົນ​ແຂວງ​ຈາກ​ແຂວງ​ພາກ​ເໜືອ ເປົ້າ​ໝາຍ​ທີ່​ຈະ​ສ້າງ​ເປັນ​ຄູ​ເຝິກ​ທີ່​ມາ​ຈາກ​ສະ­ພາ​ແຫ່ງ​ຊາດ ແລະ ພະ­ນັກ­ງານ​ທີ່​ກ່ຽວ­ຂ້ອງ 200 ກວ່າ​ຄົນ​ເຂົ້າ​ຮ່ວມ.

    ເພື່ອ​ເປັນ​ການ​ຍົກ​ລະ­ດັບ​ທັກ​ສະ ແລະ ຂີດ​ຄວາມ​ສາ­ມາດ​ໃນ​ການ​ຕິດ­ຕາມ​ກວດ­ກາ​ໃຫ້ ສສຂ ໄດ້​ຢ່າງ​ທົ່ວ​ເຖິງ ແລະ ເລິກ­ເຊິ່ງ​ກວ່າ​ເກົ່າ ເພື່ອ​ເປັນ​ການ​ແລກ­ປ່ຽນ​ບົດ­ຮຽນ ທັກ​ສະ­ການ​ຊັກ​ຖາມ​ຂອງ ສສຂ ທັງ​ເປັນ​ການ​ສ້າງ​ໃຫ້​ມີ​ວິ­ທະ­ຍາ­ກອນ​ປະ­ຈຳ​ສະ­ພາ​ແຫ່ງ​ຊາດ ທີ່​ມີ​ຄວາມ​ຮູ້​ທາງ​ດ້ານ​ວຽກ​ງານ​ຕິດ­ຕາມ​ກວດ­ກາ ແລະ ຊັກ​ຖາມ ສືບ­ຕໍ່​ຜັນ​ຂະ­ຫຍາຍ​ໄປ​ສູ່ ສສຂ ປະ­ຈຳ​ຢູ່​ແຕ່​ລະ​ທ້ອງ­ຖິ່ນ ເຊິ່ງ​ຜູ້​ເຂົ້າ​ຮ່ວມ​ຈະ​ໄດ້​ຮັບ​ຟັງ​ທັກ​ສະ­ການ​ຕິດ­ຕາມ​ກວດ­ກາ​ຈາກ​ທ່ານ ເລືອງ ແອັງ ເຕ້ ສະ­ມາ­ຊິກ​ສະ­ພາ​ປະ­ຊາ­ຊົນ​ແຂວງ​ຫາຍ​ເຢືອງ ສະ­ໄໝ​ປີ 2011-2016 ຮອງ​ປະ­ທານ​ສະ­ມາ­ຄົມ​ມິດ­ຕະ­ພາບ​ຫວຽດ­ນາມ-ລາວ ແຂວງ​ຫາຍ​ເຢືອງ ທັກ​ສະ­ການ​ຊັກ​ຖາມ​ຈາກ​ທ່ານ ຫງວຽນ ມິງ​ຖ້ຽດ ອະ­ດີດ​ຮອງ​ປະ­ທານ​ກຳ­ມາ​ທິ​ການ​ວັດ­ທະ­ນະ­ທຳ ການ​ສຶກ​ສາ ຊາວ​ໝຸ່ມ ເຍົາ­ວະ​ຊົນ ແລະ ອະ­ນຸ­ຊົນ ແລະ ທັກ​ສະ­ການ​ລົງ​ພົບ​ປະ​ຜູ້​ມີ​ສິດ​ເລືອກ​ຕັ້ງ​ຈາກ​ທ່ານ​ນາງ ຫງວຽນ ທິ​ງາ ຫົວ­ໜ້າ​ສູນ​ບຳ­ລຸງ​ຜູ້​ແທນ​ປະ­ຊາ­ຊົນ ຫ້ອງ​ວ່າ­ການ​ສະ­ພາ​ແຫ່ງ​ຊາດ​ຫວຽດ­ນາມ ພ້ອມ​ນັ້ນ ຍັງ​ໄດ້​ມີ​ການ​ຈັດ​ແບ່ງ​ກຸ່ມ​ຄົ້ນ­ຄວ້າ ສົນ­ທະ­ນາ​ແລກ­ປ່ຽນ​ຄຳ​ຄິດ​ຄຳ​ເຫັນ ເຮັດ​ບົດ​ເຝິກ​ຫັດ ແລະ ແກ້​ໄຂ​ບັນ­ດາ​ຂໍ້​ຂ້ອງ​ໃຈ​ຕື່ມ​ອີກ.

ຂ່າວທີ່ກ່ຽວຂ້ອງ