ຈັດສົ່ງອັດຖິທະຫານອາສາສະໝັກຫວຽດນາມ

896 09 ພ.ພ. 2019 ຂ່າວໜ້າ​ໜຶ່ງ
ຈັດສົ່ງອັດຖິທະຫານອາສາສະໝັກຫວຽດນາມ

    ວັນ​ທີ 7 ພຶດ­ສະ­ພາ 2019 ທີ່​ກອງ​ບັນ­ຊາ​ການ​ທະ­ຫານ​ນະ­ຄອນ­ຫຼວງ​ວຽງ​ຈັນ (ນວ) ໄດ້​ຈັດ​ພິ­ທີ​ມອບ ແລະ ຈັດ​ສົ່ງ​ອັດ­ຖິ​ທະ­ຫານ​ອາ​ສະ­ໝັກ ແລະ ຊ່ຽວ­ຊານ​ຫວຽດ­ນາມ​ທີ່​ເສຍ­ສະ­ຫຼະ​ຊີ­ວິດ​ໃນ​ປາງ​ສົງ­ຄາມ​ຢູ່​ດິນ­ແດນ ນວ ກັບ​ຄືນ​ສູ່​ປະ­ເທດ​ຈຳ­ນວນ 2 ອັດ­ຖິ ໂດຍ​ມີ​ທ່ານ ສີ​ຫຸນ ສິດ­ທິ​ລື​ໄຊ ຮອງ​ເຈົ້າ​ຄອງ ນວ ທ່ານ ຟານ​ກາວ ແທັງ ຫົວ­ໜ້າ​ຂົນ­ຂວາຍ​ແຂວງ​ຮ່າ​ຕິ່ງ ສສ ຫວຽດ­ນາມ ທ່ານ ພົ​ຈວ ສີ​ພອນ ຈັນ​ສົມ​ວົງ ຫົວ­ໜ້າ​ການ­ເມືອງ​ກອງ​ບັນ­ຊາ​ການ​ທະ­ຫານ ນວ ບັນ­ດາ​ຄະ­ນະ​ປະ­ຕິ­ບັດ​ງານ​ພິ­ເສດ​ທັງ​ສອງ​ຝ່າຍ ພະ­ແນກ­ການ ອຳ­ນາດ​ການ​ປົກ­ຄອງ​ເມືອງ ກອງ​ບັນ­ຊາ​ການ ປກຊ ປກສ ເມືອງ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ໃນ​ພິ­ທີ​ພາກ­ສ່ວນ​ຕ່າງໆ​ໄດ້​ເຂົ້າ​ວາງ​ພວງ­ມາ­ລາ ໃນ​ນັ້ນ ມີ​ການ​ນຳ ນວ ຄະ­ນະ​ປະ­ຕິ­ບັດ​ງານ​ພິ­ເສດ ນວ ຄະ­ນະ​ປະ­ຕິ­ບັດ​ງານ​ພິ­ເສດ​ແຂວງ​ຮ່າ​ຕິ່ງ ທູດ​ທະ­ຫານ​ຫວຽດ­ນາມ ປະ­ຈຳ​ລາວ ກອງ​ບັນ­ຊາ​ການ​ທະ­ຫານ ກອງ​ບັນ­ຊາ​ການ​ປ້ອງ​ກັນ​ຄວາມ​ສະ­ຫງົບ ສະ­ຫະ­ພັນ​ນັກ­ຮົບ​ເກົ່າ ພະ​ແນກ​ແຮງ​ງານ ແລະ ສະ­ຫວັດ­ດີ​ການ-ສັງ­ຄົມ ນວ ຄະ­ນະ​ພັກ-ຄະ­ນະ​ປົກ­ຄອງ​ເມືອງ​ສີ​ໂຄດ​ຕະ­ບອງ ກອງ​ບັນ­ຊາ​ການ​ທະ­ຫານ​ເມືອງ​ນາ​ຊາຍ​ທອງ ແລະ ກອງ​ບັນ­ຊາ​ການ​ທະ­ຫານ​ເມືອງ​ສີ​ໂຄດ​ຕະ­ບອງ ເພື່ອ​ເປັນ​ການ­ສະ­ແດງ​ເຖິງ​ຄວາມ​ກະ­ຕັນ­ຍູ​ຮູ້​ບຸນ­ຄຸນ​ຕໍ່​ຜົນ­ງານ​ຄຸນ­ງາມ­ຄວາມ­ດີ​ຂອງ​ບັນ­ດາ​ນັກ­ຮົບ​ວິ­ລະ​ຊົນ ທະ­ຫານ​ອາ­ສາ​ສະ­ໝັກ ແລະ ຊ່ຽວ­ຊານ​ຫວຽດ­ນາມ​ທີ່​ເສຍ­ສະ­ຫຼະ​ຊີ­ວິດ ເພື່ອ​ພາ­ລະ­ກິດ​ອັນ​ສູງ​ສົ່ງ ເພື່ອ​ຄວາມ​ສົມ­ບູນ​ພູນ​ສຸກ ຄວາມ​ເປັນ​ເອ­ກະ­ລາດ ຄວາມ​ຢູ່​ເຢັນ​ເປັນ​ສຸກ​ຂອງ​ປະ­ຊາ­ຊົນ​ລາວ ກໍ​ຄື​ການ​ປະ­ຕິ­ບັດ​ໜ້າ­ທີ່​ດ້ວຍ​ນ້ຳ­ໃຈ​ສາ­ກົນ​ກຳ​ມະ​ຊີບ​ອັນ​ສູງ​ສົ່ງ​ຂອງ​ບັນ­ດາ​ນັກ­ຮົບ​ວິ­ລະ​ຊົນ ທະ­ຫານ​ອາ­ສາ​ສະ­ໝັກ ແລະ ຊ່ຽວ­ຊານ​ຫວຽດ­ນາມ​ທີ່​ມາ​ປະ­ຕິ­ບັດ​ໜ້າ­ທີ່​ຢູ່​ລາວ ກໍ​ຄື​ຢູ່ ນວ ໃນ​ປາງ​ສົງ­ຄາມ.

    ໂດຍ​ປະ­ຕິ­ບັດ​ຕາມ​ສັນ­ຍາ​ສອງ​ລັດ­ຖະ­ບານ ແລະ ບົດ​ບັນ­ທຶກ​ຊ່ວຍ​ຈຳ ລະ­ຫວ່າງ​ສອງ​ຄະ­ນະ​ປະ­ຕິ­ບັດ​ງານ​ພິ­ເສດ​ລາວ-ຫວຽດ­ນາມ ກ່ຽວ​ກັບ​ການ​ຊອກ​ຫາ ແລະ ຂຸດ​ຄົ້ນ​ອັດ­ຖິ​ທະ­ຫານ​ອາ­ສາ​ສະ­ໝັກ ແລະ ຊ່ຽວ­ຊານ​ຫວຽດ­ນາມ ທີ່​ເສຍ​ຊີ­ວິດ​ໃນ​ປາງ​ສົງ­ຄາມ​ຢູ່​ລາວ​ເວົ້າ​ລວມ ເວົ້າ​ສະ­ເພາະ​ຢູ່ ນວ ໂດຍ​ໄດ້​ປະ­ສານ​ງານ​ກັນ​ແໜ້ນ​ລະ­ຫວ່າງ​ຄະ­ນະ​ປະ­ຕິ­ບັດ​ງານ​ພິ­ເສດ​ຂອງ​ທະ­ຫານ ນວ ກັບ​ຄະ­ນະ​ປະ­ຕິ­ບັດ​ງານ​ພິ­ເສດ​ແຂວງ​ຮ່າ​ຕິ່ງ ເລີ່ມ​ແຕ່​ປີ 2000-2018 ສາ­ມາດ​ຂຸດ​ຄົ້ນ​ໄດ້ 118 ອັດ­ຖິ ແລະ ໄດ້​ມອບ-ຮັບ​ຈັດ​ສົ່ງ​ແລ້ວ ສະ­ເພາະ​ປີ 2019 ໜ່ວຍ​ງານ​ຊອກ​ຄົ້ນ ແລະ ຂຸດ​ຄົ້ນ​ໄດ້​ລົງ­ມື​ປະ­ຕິ­ບັດ​ນັບ​ແຕ່​ເດືອນ​ມີ­ນາ​ຫາ​ເດືອນ​ເມ­ສາ ສາ­ມາດ​ຂຸດ​ຄົ້ນ​ໄດ້​ຕົວ​ຈິງ 2 ອັດ­ຖິ ດັ່ງ­ນັ້ນ ຈຶ່ງ​ໄດ້​ຈັດ​ພິ­ທີ​ມອບ-ຮັບ​ຄັ້ງ​ນີ້ ກ່າວ​ມອບ​ໂດຍ​ທ່ານ ສີ​ຫຸນ ສິດ­ທິ​ລື​ໄຊ ແລະ ກ່າວ​ຮັບ​ໂດຍ​ທ່ານ ຟານ​ກາວ ແທັງ.

ຂ່າວທີ່ກ່ຽວຂ້ອງ