ເຂົ້າໜຽວຫອມ ກາດອກຈຳປາຂາວ ໄດ້ຮັບກາໝາຍໂອດ໋ອບ

961 09 ພ.ພ. 2019 ຂ່າວໜ້າ​ໜຶ່ງ
ເຂົ້າໜຽວຫອມ ກາດອກຈຳປາຂາວ ໄດ້ຮັບກາໝາຍໂອດ໋ອບ

    ເຂົ້າ­ໜຽວ​ຫອມ ກາ​ດອກ​ຈຳ­ປາ­ຂາວ ເປັນ​ເຂົ້າ​ທີ່​ມີ​ຄຸນ​ນະ​ພາບ​ດີ ເປັນ​ຜະ­ລິດ​ຕະ​ພັນ​ຂອງ​ກຸ່ມ​ໂຮງ­ສີ​ເຂົ້າ​ບ້ານ​ດອນ​ວັງ​ໂພ ເມືອງ​ປາກ​ງື່ມ ນະ­ຄອນ­ຫຼວງ​ວຽງ​ຈັນ ເຊິ່ງ​ເປັນ​ຜະ­ລິດ​ຕະ​ພັນ​ໃໝ່ ທີ່​ໄດ້​ຮັບ​ກາ​ໝາຍ​ສິນ­ຄ້າ​ໜຶ່ງ​ເມືອງ​ໜຶ່ງ​ຜະ­ລິດ​ຕະ​ພັນ​ແຫ່ງ​ຊາດ (ໂອ​ດ໋ອບ) ໃນ​ງານ​ວາງ­ສະ­ແດງ ແລະ ຈຳ­ໜ່າຍ​ສິນ­ຄ້າ​ໜຶ່ງ​ເມືອງ​ໜຶ່ງ​ຜະ­ລິດ​ຕະ​ພັນ ແລະ ຄອບ­ຄົວ​ຕົວ​ແບບ​ຂອງ​ນະ­ຄອນ­ຫຼວງ​ວຽງ​ຈັນ ຄັ້ງ​ທີ 6 ວັນ​ທີ 29 ເມ­ສາ 2019.

    ທ່ານ ຊ້ວນ ແກ້ວ­ຕາ ປະ­ທານ​ກຸ່ມ​ໂຮງ­ສີ​ເຂົ້າ​ບ້ານ​ດອນ​ວັງ​ໂພ ໃຫ້​ສຳ­ພາດ​ວ່າ: ນັບ​ແຕ່​ປີ 1989 ເປັນ­ຕົ້ນ​ມາ ຕົນ​ເອງ​ໄດ້​ປະ­ກອບ​ອາ­ຊີບ​ກ່ຽວ​ກັບ​ໂຮງ­ສີ​ດ້ວຍ​ທຶນ​ຕົນ​ເອງ ອີງ­ໃສ່​ສະ­ພາບ​ແວດ​ລ້ອມ ແລະ ການ​ຂະ­ຫຍາຍ­ຕົວ​ດ້ານ​ເສດ­ຖະ­ກິດ​ໃນ​ຍຸກ​ປັດ­ຈຸ­ບັນ ກໍ​ໄດ້​ມີ​ການ​ປຸກ­ລະ­ດົມ​ຊາວ­ນາ ກໍ​ຄື​ປະ­ຊາ­ຊົນ​ທີ່­ຢູ່​ພາຍ​ໃນ​ບ້ານ ແລະ ປະ­ຊາ­ຊົນ​ທີ່​ອາ­ໄສ​ຢູ່​ໃນ​ເຂດ​ບ້ານ​ໂດນ ປັບ­ປຸງ​ແນວ​ພັນ​ເຂົ້າ ເພື່ອ​ໃຫ້​ໄດ້​ເຂົ້າ​ທີ່​ດີ​ມີ​ຄຸນ​ນະ​ພາບ ແລະ ເປັນ​ທີ່​ຍອມ­ຮັບ​ຂອງ​ຕະ­ຫຼາດ ພ້ອມ​ນີ້ ຍັງ​ໄດ້​ປັບ­ປຸງ​ໂຮງ­ສີ​ເຂົ້າ​ໃຫ້​ໄດ້​ມາດ­ຕະ­ຖານ ເພື່ອ​ການ​ປຸງ​ແຕ່ງ ແລະ ສີ​ໃຫ້​ມີ​ຄຸນ​ນະ​ພາບ ຈາກ​ນັ້ນ ກໍ​ໄດ້​ປະ­ສານ​ສົມ­ທົບ​ກັບ​ພາກ­ສ່ວນ​ກ່ຽວ­ຂ້ອງ ເປັນ­ຕົ້ນ ຂັ້ນ​ບ້ານ ຂັ້ນ​ເມືອງ ແລະ ຂັ້ນ​ນະ­ຄອນ­ຫຼວງ​ວຽງ​ຈັນ ເພື່ອ​ສະ­ເໜີ​ເປັນ​ຜະ­ລິດ​ຕະ​ພັນ​ໂອ​ດ໋ອບ.

    ປັດ­ຈຸ­ບັນ ກຸ່ມ​ໂຮງ­ສີ​ເຂົ້າ​ບ້ານ​ດອນ​ວັງ​ໂພ ມີ​ສະ­ມາ­ຊິກ 10 ໂຮງ­ສີ 10 ຄອບ­ຄົວ ໄລ­ຍະ​ຜ່ານ​ມາ ກໍ​ຄື​ປັດ­ຈຸ­ບັນ ໄດ້​ຮັບ​ຊື້​ເຂົ້າ​ຈາກ​ຊາວ­ນາ​ພາຍ​ໃນ​ບ້ານ ແລະ ບ້ານ​ໃກ້​ຄຽງ ເພື່ອ​ມາ​ສະ­ໜອງ​ໃຫ້​ກຸ່ມ​ໂຮງ­ສີ​ຂອງ​ຕົນ ໂດຍ​ສະ­ເພາະ​ເຂົ້າ​ບ້ານ​ໂດນ ເປັນ​ເຂົ້າ​ທີ່​ມີ​ຄຸ­ນະ­ພາບ​ດີ ແລະ ເປັນ​ທີ່​ນິ­ຍົມ​ຂອງ​ຜູ້​ບໍ­ລິ­ໂພກ​ທົ່ວ​ໄປ ເຊິ່ງ​ມີ​ຈຳ­ໜ່າຍ​ຢູ່​ຕະ­ຫຼາດ​ທົ່ວ​ໄປ​ໃນ​ນະ­ຄອນ­ຫຼວງ​ວຽງ​ຈັນ ຂະ­ໜາດ​ບັນ­ຈຸ ຖົງ​ລະ 12-48 ກິ​ໂລ 1 ໝື່ນ ລາ­ຄາ 85.000 ກີບ ພາຍ­ຫຼັງ​ທີ່​ເຂົ້າ­ໜຽວ​ຫອມ ກາ​ດອກ​ຈຳ­ປາ­ຂາວ ໄດ້​ຮັບ​ກາ​ໝາຍ​ໂອ​ດ໋ອບ​ແລ້ວ ຕົນ​ເອງ​ຈະ​ສືບ­ຕໍ່​ປັບ­ປຸງ ແລະ ພັດ­ທະ­ນາ​ຜະ­ລິດ​ຕະ​ພັນ​ໃຫ້​ນັບ​ມື້​ດີ​ຂຶ້ນ ແລະ ໃຫ້​ສາ­ມາດ​ສົ່ງ​ອອກ​ຈຳ­ໜ່າຍ​ຕ່າງ­ປະ­ເທດ​ໄດ້ ພ້ອມ​ນີ້ ຂໍ​ຝາກ​ເຖິງ​ປະ­ຊາ­ຊົນ​ພາຍ​ໃນ​ນະ­ຄອນ­ຫຼວງ​ວຽງ​ຈັນ ກໍ​ຄື​ຕ່າງ​ແຂວງ ສະ­ໜັບ­ສະ­ໜູນ​ເຂົ້າ­ໜຽວ​ຫອມ ກາ​ດອກ​ຈຳ­ປາ­ຂາວ ໃຫ້​ເປັນ​ທີ່​ຮູ້​ຈັກ­ຢ່າງ​ກວ້າງ­ຂວາງ.

ຂ່າວທີ່ກ່ຽວຂ້ອງ