ໂຄງການ 4 ປະຢັດ ເຮັດໃຫ້ບ້ານໂພນສະຫວ່າງ ມີຜົນສຳເລັດໃນການສ້າງທາງຮ່ອມເບຕົງ

631 09 ພ.ພ. 2019 ຂ່າວໜ້າ​ໜຶ່ງ
ໂຄງການ 4 ປະຢັດ ເຮັດໃຫ້ບ້ານໂພນສະຫວ່າງ ມີຜົນສຳເລັດໃນການສ້າງທາງຮ່ອມເບຕົງ

    ໃນ​ສະ­ພາບ​ທີ່​ພັກ-ລັດ​ຍັງ​ມີ​ຄວາມ​ຫຍຸ້ງ­ຍາກ​ທາງ​ດ້ານ​ງົບ­ປະ­ມານ ທີ່​ຈະ​ມາ​ພັດ­ທະ­ນາ​ພື້ນ­ຖານ​ໂຄງ​ລ່າງ​ໃຫ້​ທົ່ວ​ເຖິງ​ຍັງ​ມີ​ຈຳ­ກັດ​ຢູ່ ດັ່ງ­ນັ້ນ ມັນ​ຕ້ອງ​ຮຽກ­ຮ້ອງ​ມາ​ຍັງ​ທຸກ​ພາກ­ສ່ວນ​ຂອງ​ສັງ­ຄົມ ອົງ​ການ­ຈັດ­ຕັ້ງ ແລະ ປະ­ຊາ­ຊົນ​ບັນ­ດາ­ເຜົ່າ ຕ້ອງ​ເປັນ​ເຈົ້າ​ການ​ໃນ​ການ​ເພິ່ງ​ຕົນ​ເອງ ສ້າງ​ຄວາມ​ເຂັ້ມ­ແຂງ​ດ້ວຍ​ຕົນ​ເອງ ຈາກ​ຜ່ານ​ມາ​ໄດ້​ມີ​ອຳ­ນາດ​ການ​ປົກ­ຄອງ​ຫຼາຍ​ບ້ານ ໄດ້​ປຸກ­ລະ­ດົມ​ປະ­ຊາ­ຊົນ​ທີ່­ຢູ່​ພາຍ​ໃນ​ບ້ານ​ຂອງ​ຕົນ ປະ­ກອບ­ສ່ວນ​ທຶນ­ຮອນ​ເຂົ້າ​ໃນ​ການ​ສ້າງ​ເສັ້ນ­ທາງ​ຮ່ອມ​ເບ​ຕົງ​ສຳ­ເລັດ ແລະ ກໍ​ຍັງ​ມີ​ຫຼາຍ​ບ້ານ​ຍັງ​ບໍ່​ທັນ​ມີ​ໂຄງ­ການ​ນີ້​ເທື່ອ ເຊິ່ງ​ໜຶ່ງ​ໃນ​ບ້ານ​ທີ່​ປະ­ສົບ​ຜົນ­ສຳ­ເລັດ​ນັ້ນ ກໍ​ມີ​ບ້ານ​ໂພນ​ສະ­ຫວ່າງ ເມືອງ​ຈັນ­ທະ​ບູ​ລີ ນະ­ຄອນ­ຫຼວງ​ວຽງ​ຈັນ (ນວ) ທີ່​ໄດ້​ນຳ­ພາ​ປະ­ຊາ­ຊົນ​ສ້າງ​ທາງ​ຮ່ອມ​ເບ​ຕົງ ມາ​ຮອດ​ປັດ­ຈຸ­ບັນ ສຳ­ເລັດ​ເກືອບ 10 ເສັ້ນ​ໃນ​ຈຳ­ນວນ 45 ເສັ້ນ ແລະ ຄາດ​ວ່າ​ໂຄງ­ການ​ນີ້ ຈະ​ໃຫ້​ສຳ­ເລັດ​ພາຍ​ໃນ​ປີ 2023 ທັງ​ນີ້ ກໍ​ເພື່ອ​ອຳ­ນວຍ​ຄວາມ​ສະ­ດວກ​ໃຫ້​ແກ່​ການ​ໄປ​ມາ​ຂອງ​ປະ­ຊາ­ຊົນ​ພາຍ​ໃນ​ບ້ານ ແລະ ບ້ານ​ອ້ອມ​ຂ້າງ.

    ທ່ານ ຊະ­ນະ​ນິ­ກອນ ອິນ​ທິ​ລາດ ນາຍ­ບ້ານ​ໂພນ​ສະ­ຫວ່າງ ໃຫ້​ສຳ­ພາດ​ວັນ​ທີ 8 ພຶດ­ສະ­ພາ 2019 ວ່າ: ບ້ານ​ໂພນ​ສະ­ຫວ່າງ ໄດ້​ປະ­ກາດ​ເປັນ​ບ້ານ​ພັດ­ທະ­ນາ ໃນ​ວັນ​ທີ 24 ພຶດ­ສະ­ພາ 2008 ແຕ່​ພື້ນ­ຖານ​ໂຄງ​ລ່າງ ເປັນ­ຕົ້ນ ຖະ­ໜົນ​ຫົນ­ທາງ​ໂດຍ​ສະ­ເພາະ​ທາງ​ຮ່ອມ​ພາຍ​ໃນ​ບ້ານ 45 ຮ່ອມ ຍັງ​ເປັນ​ທາງ​ດິນ​ແດງ​ເຮັດ​ໃຫ້­ການ​ໄປ​ມາ​ພົບ​ຄວາມ​ຫຍຸ້ງ­ຍາກ ແລະ ບໍ່​ມີ​ຄວາມ​ສະ­ອາດ ດັ່ງ­ນັ້ນ ໂດຍ​ອີງ­ໃສ່​ທ່າ­ແຮງ ແລະ ອີງ­ໃສ່​ແນວ­ທາງ​ນະ­ໂຍ­ບາຍ​ຂອງ​ພັກ-ລັດ ໂດຍ​ສະ­ເພາະ​ມະ­ຕິ​ກອງ​ປະ­ຊຸມ​ໃຫຍ່ ຄັ້ງ​ທີ 6 ຂອງ​ອົງ­ຄະ​ນະ​ພັກ ນວ ຕາມ​ນະ­ໂຍ­ບາຍ 5 ຮ່ວມ ແລະ ມະ­ຕິ​ເລກ​ທີ 03/ອປຄ.ນວ ຂອງ​ອົງ­ການ​ປົກ­ຄອງ ນວ ຕາມ​ນະ­ໂຍ­ບາຍ 8 ສະ­ອາດ ກໍ​ຄື​ຂໍ້​ຕົກ­ລົງ​ເລກ​ທີ 08/ນຍ ລົງ​ວັນ​ທີ 24 ມັງ­ກອນ 2017 ມາດ­ຕາ 5 6 7 ວ່າ​ດ້ວຍ​ການ​ປະ­ຕິ­ບັດ​ພັນ­ທະ ແລະ ປະ­ກອບ­ສ່ວນ​ຂອງ​ປະ­ຊາ­ຊົນ​ໃນ​ການ​ພັດ­ທະ­ນາ​ບ້ານ ສະ­ນັ້ນ ຄະ­ນະ​ພັກ​ອົງ­ການ​ປົກ­ຄອງ​ບ້ານ ຈຶ່ງ​ເປັນ​ເອ­ກະ​ພາບ​ສ້າງ​ໂຄງ­ການ​ດັ່ງ­ກ່າວ​ຂຶ້ນ ເອີ້ນ​ວ່າ​ໂຄງ­ການ 4 ປະ­ຢັດ​ລາຍ​ຈ່າຍ​ເພື່ອ​ພັດ­ທະ­ນາ​ທາງ​ຮ່ອມ​ຄື: ບໍ່​ໃຫ້​ຊື້​ເລກ​ຫຼາຍ ບໍ່​ໃຫ້​ໃສ່​ຊອງ​ຫຼາຍ ບໍ່​ໃຫ້​ຊຸມ​ແຊວ­ຫຼາຍ ໃຊ້​ຈ່າຍ​ຟຸມ​ເຟືອຍ ແລະ ບໍ່​ໃຫ້​ຫຼິ້ນ​ການ​ພະ­ນັນ​ທຸກ​ປະ­ເພດ ຍ້ອນ​ແນວ​ນັ້ນ ຄະ­ນະ​ພັກ ອົງ­ການ​ປົກ­ຄອງ​ບ້ານ​ໄດ້​ປະ­ຊຸມ​ກັນ ໄດ້​ມີ​ມະ­ຕິ​ແຕ່ງ­ຕັ້ງ​ຄະ­ນະ​ຮັບ­ຜິດ­ຊອບ​ປຸກ­ລະ­ດົມ​ກໍ່­ສ້າງ​ທາງ​ເບ​ຕົງ ໃນ​ວັນ​ທີ 31 ສິງ­ຫາ 2016 ເພື່ອ​ຄົ້ນ­ຄວ້າ​ຄວາມ​ເປັນ​ໄປ​ໄດ້ ລົງ​ເກັບ​ກຳ​ຂໍ້​ມູນ​ທາບ​ທາມ​ຫາງ​ສຽງ​ປະ­ຊາ­ຊົນ ໂດຍ​ມີ​ຂໍ້​ສະ­ຫຼຸບ​ວ່າ ປະ­ຊາ­ຊົນ​ພາຍ​ໃນ​ບ້ານ 94,73% ແມ່ນ​ເຫັນ​ດີ​ປະ­ກອບ ແລະ ຍັງ​ອີກ 5,27% ທີ່​ຄະ­ນະ​ພັກ​ຕ້ອງ​ໄດ້​ເຮັດ​ວຽກ​ງານ​ແນວ​ຄິດ-ການ­ເມືອງ​ຕື່ມ ເພື່ອ​ໃຫ້​ເຂົາ­ເຈົ້າ​ເຂົ້າ­ໃຈ ເມື່ອ​ປະ­ຊາ­ຊົນ​ເຫັນ​ດີ​ຈຶ່ງ​ໄດ້​ຕົກ­ລົງ​ສ້າງ​ທາງ​ຮ່ອມ​ເບ​ຕົງ​ຈຳ­ນວນ 45 ຮ່ອມ ມີ​ຄວາມ​ຍາວ 5.678 ແມັດ ໂຄງ­ການ​ໄລ­ຍະ 5 ປີ (2017-2023) ການ​ປະ­ກອບ­ສ່ວນ​ຂອງ​ປະ­ຊາ­ຊົນ ແມ່ນ​ກຳ­ນົດ​ພາ­ຫະ­ນະ​ເປັນ​ບ່ອນ​ອີງ​ໃນ​ການ​ຄິດ­ໄລ່​ຄື: ຄອບ­ຄົວ​ບໍ່​ມີ​ລົດ ແລະ ມີ​ລົດ­ຖີບ 20.000 ກີບ ຄອບ­ຄົວ​ມີ​ລົດ­ຈັກ 50.000 ກີບ ຄອບ­ຄົວ​ມີ​ລົດ 3 ລໍ້ 4 ລໍ້ ຄັນ​ດຽວ 70.000 ກີບ ຄອບ­ຄົວ​ມີ​ລົດ 3 ລໍ້ 4 ລໍ້ 2 ຄັນ​ຂຶ້ນ​ໄປ 1 ແສນ​ກີບ ຄອບ­ຄົວ​ມີ​ລົດ 6 ລໍ້ ລວມ​ທັງ​ລົດ​ກະ­ບະ​ຮຸນ​ໄດ 1 ແສນ​ກີບ ຄອບ­ຄົວ​ມີ​ລົດ 10 ລໍ້​ຂຶ້ນ​ໄປ 150.000 ກີບ​ຕໍ່​ຄອບ­ຄົວ​ຕໍ່​ເດືອນ ນອກ​ນີ້ ຜູ້​ທີ່​ມາ​ພັກ​ເຊົາ​ຫ້ອງ​ແຖວ​ຢູ່​ໃນ​ບ້ານ ຍັງ​ໄດ້​ປະ­ກອບ­ສ່ວນ 20.000 ກີບ​ຕໍ່​ຫ້ອງ​ຕໍ່​ເດືອນ.

    ພາຍ­ຫຼັງ​ເປັນ​ເອ­ກະ​ພາບ​ກັນ​ແລ້ວ ກໍ​ໄດ້​ນຳ​ສະ­ເໜີ​ຜ່ານ​ຫ້ອງ­ການ ຍທຂ ເມືອງ​ຈັນ­ທະ​ບູ​ລີ ເພື່ອ​ຂໍ​ທິດ​ຊີ້​ນຳ​ເຈົ້າ­ເມືອງ ໃນ​ເດືອນ​ເມ­ສາ 2017 ແລະ ເຈົ້າ­ເມືອງ​ເຫັນ​ດີ ໂດຍ​ໄດ້​ແຕ່ງ­ຕັ້ງ​ຄະ­ນະ​ຮັບ­ຜິດ­ຊອບ​ຈາກ​ເມືອງ​ລົງ​ມາ ເພື່ອ​ສຶກ​ສາ​ຄວາມ​ເປັນ​ໄປ​ໄດ້​ດ້ານ​ວິ­ຊາ​ການ ຈາກ​ນັ້ນ ກໍ​ເລີ່ມ​ຈັດ​ຕັ້ງ​ປະ­ຕິ­ບັດ​ໂຄງ­ການ​ດ້ວຍ​ການ​ລະ­ດົມ​ເງິນ​ໃນ​ທ້າຍ​ປີ 2017 ແລະ ມາ​ຮອດ​ກາງ​ປີ 2018 ສາ­ມາດ​ສ້າງ​ທາງ​ຮ່ອມ​ເບ​ຕົງ​ໄດ້ 7 ຮ່ອມ ມີ​ຄວາມ​ຍາວ 639 ແມັດ ມູນ​ຄ່າ 600 ລ້ານ​ກວ່າ​ກີບ ສະ­ເລ່ຍ 1 ລ້ານ​ກີບ​ຕໍ່ 1 ແມັດ​ຍາວ​ຂອງ​ທາງ ແລະ ປີ 2019 ສືບ­ຕໍ່​ຈັດ​ຕັ້ງ​ປະ­ຕິ­ບັດ ແລະ ມາ​ຮອດ​ປັນ​ຈຸ​ບັນ​ສຳ­ເລັດ 2 ຮ່ອມ ລວມ​ເປັນ 9 ຮ່ອມ ສ່ວນ​ທີ່​ຍັງ​ເຫຼືອ​ນັ້ນ ສືບ­ຕໍ່​ເຮັດ​ໄປ​ເລື້ອຍໆ​ຈົນ​ຮອດ​ປີ 2023 ຈະ​ໃຫ້​ສຳ­ເລັດ​ໃນ​ຈຳ­ນວນ 45 ຮ່ອມ ລວມ​ມູນ​ຄ່າ​ທັງ​ໝົດ​ປະ­ມານ 3,2 ຕື້​ກີບ ແຕ່​ການ­ຈັດ­ຕັ້ງ​ປະ­ຕິ­ບັດ​ແມ່ນ​ບ້ານ​ເປັນ​ຜູ້​ເຮັດ​ເອງ ໂດຍ​ບໍ່​ໄດ້​ຈ້າງ​ບໍ­ລິ­ສັດ​ຖ້າ​ຈ້າງ​ບໍ­ລິ­ສັດ​ມູນ​ຄ່າ​ຈະ​ຕົກ​ຢູ່​ປະ­ມານ 30 ກວ່າ​ຕື້​ກີບ ຖື​ວ່າ​ບ້ານ ແລະ ປະ­ຊາ­ຊົນ​ເຮັດ​ເອງ​ຈະ​ຕົກ​ຢູ່​ປະ­ມານ 3 ຕື້​ກວ່າ​ກີບ​ເປັນ​ການ​ປະ­ຢັດ​ງົບ​ລົງ​ຕື່ມ.

ຂ່າວທີ່ກ່ຽວຂ້ອງ