ເບີ່ງບ້ານເຂົາເອົາບົດຮຽນ 08-05-2019

932 08 ພ.ພ. 2019 ຫົວຂໍ້ຂ່າວອື່ນໆ

    ມື້ນີ້ ຂໍ​ເລີ່ມ​ກັບ​ຂ່າວ​ຄະດີ​ຊີ້ນ​ງົວ​ປອມ ຍ້ອມ​ແມວ​ຢູ່ ​ສປ ຈີນ ຕໍ່​ໃສ່​ຄະດີ​ພໍ່​ລູກ​ສອງ ຢູ່​ຝຣັ່ງ ຖືກ​ໂທດ​ຈຳ​ຄຸກ ຍ້ອນ​ລ້ຽງ​ລູກ​ດ້ວຍ​ນ້ຳຫວານ ສຸດ​ທ້າຍ​ແມ່ນ​ເລື່ອງ ແຜນ​ພັດທະນາ​ວຽກ​ສື່​ຢູ່​ກາ​ນາ​ດາ

       ທີ່ ​ສປ ຈີນ ມີ​ຂ່າວ​ທີ່​ຄວນ​ເບິ່ງ​ໄວ້ ເປັນ​ບົດຮຽນ​ກ່ຽວ​ກັບ​ອາຫານ ແປກ​ປອມ​ຍ້ອມ​ແມວ ທີ່​ເລັດ​ລອດ​ຈາກ​ຕ່າງປະເທດ ມາ​ຂາຍ​ຢູ່​ຕະຫຼາດ​ບ້ານ​ເຮົາ ໂດຍ​ສະເພາະ ແມ່ນ​ຈາກ​ບັນດາ​ປະເທດ​ໃກ້​ຄຽງ ເລື່ອງ​ມີ​ຢູ່​ວ່າ ໃນ​ທ້າຍ​ເດຶອນ​ພະຈິກ ປີ 2018 ທີ່​ເມືອງ​ໜານ​ຈິງ ແຂວງ​ຈຽງ​ຊູ ເຈົ້າ​ໜ້າທີ່​ຕຳຫຼວດ​ຈີນ ໄດ້​ຈັບ​ກຸມ​ຜູ້​ກະທຳ​ຜິດ ໄດ້​ຈຳນວນ 29 ຄົນ ທີ່​ພົວພັນ​ກັບ​ຄະດີ ຈຳໜ່າຍ​ຊີ້ນ​ງົວ​ທີ່​ສີດ​ນ້ຳ​ເຂົ້າ​ປົນ ເພື່ອ​ເພີ່ມ​ນ້ຳໜັກ ແລ້ວ​ເອົາ​ໄປ​ຂາຍ​ໃນ​ລາຄາ​ຖືກໆ ການ​ຈັບ​ກຸມ​ຄັ້ງ​ນີ້ ມີ​ຂຶ້ນ​ພາຍຫຼັງ​ຜູ້​ບໍລິໂພກ ທ້ອງຖິ່ນ​ພົບ​ວ່າ ຊີ້ນ​ງົວ​ແຊ່​ເຢັນ ທີ່​ຂາຍ​ຢູ່​ຕະຫຼາດ ຣຸນ​ເຮິງ (Runheng) ມີ​ລາຄາ​ຖືກ​ກວ່າ​ຊີ້ນ​ງົວ ທີ່​ຂາຍ​ຢູ່​ຕະຫຼາດ​ອື່ນໆ ຫຼັງ​ຈາກ​ຂ່າວ​ນີ້​ໄດ້​ຖືກ​ເຜີຍແຜ່​ຜ່ານ​ສື່ ເຈົ້າ​ໜ້າທີ່​ຕຳຫຼວດ​ກໍ​ໄດ້​ເຮັດ​ສອບ​ສວນ ຈົນ​ພົບ​ວ່າ ຊີ້ນ​ທີ່​ຂາຍ​ໃນ​ຕະຫຼາດ​ຣຸນ​ເຮິງ ນັ້ນ ມີ​ສ່ວນ​ປະສົມ​ຂອງ​ນ້ຳ ທີ່​ສີດ​ເຂົ້າ​ໄປ​ເພື່ອ​ເພີ່ມ​ນ້ຳໜັກ​ແທ້.

      ທີ່​ປະເທດ​ຝຣັ່ງ ເລື່ອງ​ນີ້​ເຫຼືອ​ເຊື່ອ​ແຕ່​ກໍ​ຕ້ອງ​ໄດ້​ເຊື່ອ ເພາະ​ມີ​ຄວາມ​ຈິງ​ຄື ພໍ່​ລູກ​ສອງ​ຄົນ​ໜຶ່ງ​ຢູ່​ປະເທດ​ຝຣັ່ງ ຖືກ​ຕັດສິນ ໂທດ​ຈຳ​ຄຸກ​ຍ້ອນ​ລ້ຽງ​ລູກ​ດ້ວຍ​ນ້ຳຫວານ​ໂຄ​ຄາ​ໂຄ​ລາ ເທົ່າ​ນັ້ນ ຂ່າວ​ບໍ່​ໄດ້​ບອກ​ຊື່ ພໍ່​ລູກ​ສອງ​ຄົນ​ນີ້ ພຽງ​ແຕ່​ໃຫ້​ຮູ້​ວ່າ​ເຂົາ​ເປັນ​ຄົນ​ຕິດ​ເຫຼົ້າ​ລະດັບ​ງອມ​ແງມ ບໍ່​ມີ​ການ​ສຶກ​ສາ ອ່ານ​ບໍ່​ໄດ້​ຂຽນ​ບໍ່​ເປັນ ບໍ່​ພຽງ​ແຕ່​ທໍ່​ນັ້ນ​ເຂົາ​ຍັງ​ເປັນ​ຄົນ​ໃຈຮ້ອນ ເປັນ​ຄົນ​ໃຈ​ໂຫດ ຕໍ່​ລູກ ແລະ ເມຍ ຢູ່​ເຮືອນ​ເຂົາ​ບໍ່​ມີ​ຕູ້ເຢັນ ບ່ອນ​ນອນ​ມີ​ພຽງ​ສາດ​ປູ ບໍ່​ມີ​ຜ້າຫົ່ມ ອາຫານ​ທີ່​ເຂົາ​ລ້ຽງ​ລູກ ທັງ​ສອງ​ນັ້ນ ມີ​ພຽງ​ເຂົ້າໜົມ ແລະ ນ້ຳຫວານ​ໂຄ​ຄາ​ໂຄ​ລາ ລູກ​ຊາຍ​ຜູ້​ກົກ​ຕ້ອງ​ໄດ້​ຫຼົກ​ແຂ້ວ​ອອກ 7 ເຫຼັ້ມ ທີ່​ເນົ່າ​ເປື່ອຍ​ຍ້ອນ​ກິນ​ແຕ່​ຂອງຫວານ ສ່ວນ​ລູກ​ຜູ້​ທີ 2 ນັ້ນ ປາກ​ບໍ່​ໄດ້​ເລີຍ  ສານ​ຝຣັ່ງ​ໄດ້​ຕັດສິນ​ຈຳ​ຄຸກ​ພໍ່​ລູກ​ສອງ​ຄົນ​ນີ້ ເປັນ​ເວລາ​ສາມ​ເດືອນ ຢູ່​ເມືອງ​ລີ​ໂມກ  lim oges ທາງ​ພາກ​ໃຕ້​ຂອງ​ຝຣັ່ງ ສ່ວນ​ລູກ​ທັງ​ສອງ​ຂອງ​ຊາຍ​ຂີ້​ເມົາ​ໄດ້​ຮັບ​ການ​ຟື້ນ​ຟູ​ຢູ່​ສູນ​ສົງເຄາະ ທີ່​ເວົ້າ​ເບື້ອງ​ຕົ້ນ​ວ່າ ເປັນ​ເລື່ອງ​ເຫຼືອ​ເຊື່ອ ກໍ່​ເພາະວ່າ ເປັນ​ເຫດການ​ທີ່​ເກີດ​ຂຶ້ນ​ຢູ່​ປະເທດ​ອຸດສາຫະກຳ​ຮັ່ງມີ​ລະດັບ​ແຖວ​ໜ້າ​ປະເທດ​ໜຶ່ງ​ຂອງ​ໂລກ ແຕ່​ກໍ່​ມີ​ຄົນ​ອຶດຫິວ​ຂະໜາດ​ນີ້.

      ທີ່ ກາ​ນາ​ດາ ມີ​ຂ່າວ​ຈາກ​ກາ​ນາ​ດາ​ວ່າ ທາງ​ການ​ຂອງ​ປະເທດ​ນີ້ ໄດ້​ທຸ່ມ​ງົບປະມານ​ຈຳນວນ​ມະຫາສານ ເພື່ອ​ພັດທະນາ​ວຽກ​ສື່​ຂ່າວ​ໃນ​ຍຸກ​ສື່ສານ​ລະບົບ​ດີ​ຈີ​ຕອນ​ກັບ​ລະບົບ​ຊື່​ແບບ​ເກົ່າ ພວມ​ບຽດ​ຢືດ​ພື້ນ​ທີ່​ກັນ​ຢ່າງ​ດຸເດືອດ ໃນ 10 ປີ ຜ່ານ​ມາ ສື່​ສິ່ງ​ພິມ ຢູ່​ກາ​ນາ​ດາ ກວ່າ 250 ຊະນິດ ໄດ້​ຖືກ​ລຶບ​ອອກ​ຈາກ​ບັນຊີ​ຍ້ອນ​ສູ້​ສື່​ສັງຄົມ​ຍຸກ​ໃໝ່​ບໍ່​ໄດ້ ນອກຈາກ​ນັ້ນ ລະຫວ່າງ​ໜ່ວຍ​ງານ​ສື່​ແບບ​ໃໝ່​ເອງ​ກໍ​ມີ​ການ​ແກ່ງ​ແຍ້ງ​ກັນ ສົ່ງ​ຜົນ​ກະທົບ​ຕໍ່​ບົດບາດ​ຂອງ​ບັນດາ​ສຳນັກ​ຂ່າວ​ເອກະລາດ ຂ່າວ​ບອກ​ວ່າ​ນັບ​ແຕ່ ປີ 2012 ມາ​ເຖິງ​ປະຈຸ​ບັນ ລາຍ​ຮັບ​ຂອງ​ສື່​ສິ່ງ​ພິມ​ໄດ້​ຫຼຸດ​ລົງ 40% ເພື່ອ​ສະໜັບສະໜູນ​ໃຫ້​ຂະແໜງການ ສື່ສານ​ຢູ່​ຄຽງ​ຄູ່​ກັນ​ໄດ້ ທາງ​ການ​ກາ​ນາ​ດາ ໄດ້​ປະກາດ​ຍົກ​ເວ້ນ​ຫຼື​ຫຼຸດ​ພາສີ ມູນ​ຄ່າ 453 ລ້ານ​ໂດ​ລາ​ສະຫະລັດ ໃຫ້​ຂະແໜງ ການ​ດັ່ງກ່າວ​ພາຍ​ໃນ 5 ປີ​ຕໍ່ໜ້າ.

ຂ່າວທີ່ກ່ຽວຂ້ອງ