ຄະຕິຈາກການຟັງເທດພະເຫວດສັນດອນ

1.900 08 ພ.ພ. 2019 ນານາສາລະ

    ຜ່ານ​ມາ ເຖິງ​ແມ່ນ​ວ່າ​ມີ​ບາງ​ສື່​ໜັງ­ສື­ພິມ ຫຼື ວາ­ລະ­ສານ​ພະ­ຍາ­ຍາມ​ຕີ​ພິມ​ເຜີຍ­ແຜ່​ບຸນ​ພະ​ເຫວດ​ສັນ​ດອນ​ແລ້ວ​ກໍ​ຕາມ ແຕ່​ຜູ້​ຂຽນ​ກໍ​ໄດ້​ຟັງ​ຫາງ​ສຽງ​ຈາກ​ສັງ­ຄົມ​ຈຳ­ນວນ​ໜຶ່ງ ກໍ​ໄດ້​ຝາກ​ແງ່​ຄິດ​ຕື່ມ​ວ່າ: ຖ້າ​ນັກ​ຂຽນ ຫຼື ວ່າ​ສື່​ມວນ​ຊົນ​ຜູ້​ເຮັດ​ໜ້າ­ທີ່​ເຜີຍ­ແຜ່​ເລື່ອງ​ດັ່ງ­ກ່າວ ຖ້າ​ສະ­ທ້ອນ​ອອກ​ມາ​ບໍ່​ຖືກ​ຈຸດ ຫຼື ຮາກ​ເຫງົ້າ​ຂອງ​ບຸນ​ທີ່​ກ່ຽວ­ຂ້ອງ​ກັບ​ປະ­ເພ­ນີ ແລະ ວັດ­ທະ­ນະ­ທຳ ກໍ​ຈະ​ເຮັດ​ໃຫ້​ສັງ­ຄົມ​ຜູ້​ອ່ານ​ໄຂວ່​ເຂ​ໃນ​ຈຸດ​ຢືນ ແລະ ຄວາມ​ເຊື່ອ​ທີ່​ຖືກ­ຕ້ອງ.

    ດັ່ງ­ນັ້ນ ບຸນ​ພະ​ເຫວດ​ຈຶ່ງ​ບໍ່​ຄວນ​ເນັ້ນ​ພຽງ​ການ​ຕີ​ຄວາມ​ໝາຍ​ໃຫ້​ເອົາ​ຊາດ​ໜ້າ ຫຼື ຄວາມ​ເຊື່ອ​ເລື່ອງ​ລິດ­ເດດ ແລະ ເຮັດ­ບຸນ​ໜ້ອຍ​ດຽວ ແຕ່​ຫວັງ​ຜົນ​ຫຼາຍ ເຊິ່ງ​ຄວາມ​ຄິດ​ແບບ​ນີ້ ບໍ່​ເປັນ​ວິ­ທະ­ຍາ­ສາດ ແລະ ພະ­ພຸດ­ທະ­ເຈົ້າ​ກໍ​ເຄີຍ​ຫ້າມ​ສາ­ວົກ ສະ­ແດງ​ລິດ­ເດດ ເພາະ​ມັນ​ບໍ່​ແມ່ນ​ທາງ​ພົ້ນ​ທຸກ ດ້ວຍ​ເຫດ​ນີ້ ພວກ​ເຮົາ​ຈິ່ງ​ຄວນ​ຊອກ​ຈົກ​ເອົາ​ແກ່ນ​ເອົາ​ບົດ­ຮຽນ​ທີ່​ສາ­ມາດ​ນຳ​ມາ​ປະ­ຍຸກ​ນຳ​ໃຊ້​ແກ່​ຊີ­ວິດ​ຂອງ​ເຮົາ ເຊັ່ນ: ການ​ໃຫ້​ທານ​ຂອງ​ພະ​ເຫວດ​ທີ່​ເຕັມ​ໄປ​ດ້ວຍ​ເຫດ­ຜົນ ຄຸນ­ສົມ­ບັດ​ຂອງ​ນາງ​ມະ​ທີ​ທີ່​ຮັກ​ດຽວ​ໜຽວ​ແໜ້ນ ບໍ່​ວ່າ​ຜົວ ຄື​ພະ​ເຫວດ​ຈະ​ຖືກ​ຂັບ​ອອກ​ຈາກ​ເມືອງ​ຕົກ­ທຸກ​ໄດ້​ຍາກ ແຕ່​ນາງ​ມະ​ທີ​ຜູ້​ເປັນ​ເມຍ​ກໍ​ບໍ່​ເຄີຍ​ຄິດ​ປະ​ຖິ້ມ​ຜົວ​ໃນ​ຄາວ​ທຸກ​ຍາກ ເຊິ່ງ​ຕ່າງ​ຈາກ​ຄົນ​ເຮົາ​ໃນ​ສັງ­ຄົມ​ປັດ­ຈຸ­ບັນ.

    ຄຸນ​ນະ​ທຳ​ຂອງ​ນາງ ອະ­ມິດ​ຕະ​ຕາ ທີ່​ພໍ່​ແມ່​ຍົກ​ໃຫ້​ເປັນ​ເມຍ​ຂອງ​ພາມ ກໍ​ຖື​ວ່າ​ເປັນ​ການ​ເຮັດ​ໜ້າ­ທີ່​ຂອງ​ລູກ​ຕອບ​ແທນ​ບຸນ­ຄຸນ​ຂອງ​ພໍ່​ແມ່ ເມື່ອ​ໄດ້​ເປັນ​ເມຍ​ຂອງ​ພາມ​ກໍ​ເຮັດ​ໜ້າ­ທີ່​ແມ່­ຄົວ​ສຸດ​ຄວາມ​ສາ­ມາດ ນອກ­ຈາກ​ນີ້ ຄະ­ຕິ​ຈາກ​ກັນ­ເທດ​ຂອງ​ບຸນ​ພະ​ເຫວດ​ສັນ​ດອນ 13 ກັນ​ນັ້ນ ຍັງ​ໄດ້​ສອນ​ເນັ້ນ​ໃຫ້​ຜູ້​ຟັງ­ເທດ​ໄດ້​ໄຕ່­ຕອງ​ໃຫ້​ເກີດ​ປັນ­ຍາ ເຊັ່ນ: ກັນ­ເທດ​ເລື່ອງ​ມະ­ຫາ­ພົນ ແລະ ຈຸນ­ລະ­ພົນ ທີ່​ເວົ້າ​ພັນ​ລະ​ນາ​ເຖິງ​ຄວາມ​ອຸ­ດົມ­ສົມ­ບູນ​ຂອງ​ພູ­ຜາ​ປ່າ­ດົງ ນົກ​ໜູ​ປູ​ປີກ​ທີ່​ມັນ​ສະ­ທ້ອນ​ໃຫ້​ເຫັນ​ຄຸນ­ຄ່າ​ຂອງ​ຄົນ​ໃນ​ອະ­ດີດ​ທີ່​ເພິ່ນ​ຮັກ­ສາ​ສິ່ງ­ແວ­ດລ້ອມ ເລື່ອງ​ພະ​ເຫວດ​ສັນ​ດອນ ທີ່​ເນັ້ນ​ເລື່ອງ​ການ​ໃຫ້​ທານ ເພື່ອ​ເປັນ​ການ​ແບ່ງ­ປັນ​ເອື້ອ­ເຟື້ອ​ໃຫ້​ຄົນ​ໃນ​ສັງ­ຄົມ​ເກີດ​ຄວາມ­ສຸກ ຄວາມ​ສາ­ມັກ­ຄີ ມັນ​ສະ­ທ້ອນ​ໃຫ້​ເຫັນ​ວ່າ ຄົນ​ຢ່າງ​ພະ​ເຫວດ​ສັນ​ດອນ ຄື ເສດ­ຖີ​ນ້ຳ­ໃຈ ຄື​ນັກ​ປົກ­ຄອງ​ຜູ້​ເສຍ­ສະ­ຫຼະ ແລະ ມີ​ສະ­ຕິ​ປັນ­ຍາ­ສະ​ຫຼາດ ເບິ່ງ​ເຫັນ​ການ​ໄກ ຍາມ​ໃດ​ກໍ​ເປັນ​ຫ່ວງ​ປະ­ຊາ­ຊົນ.

    ສະ­ຫຼຸບ​ໄດ້​ວ່າ: ບຸນ​ພະ​ເຫວດ ໄດ້​ສະ­ທ້ອນ​ຮູບ​ແບບ​ການ​ດຳ­ເນີນ​ຊີ­ວິດ​ຂອງ​ຄົນ​ໃນ​ສັງ­ຄົມ ໃຫ້​ຢູ່​ກັນ​ຢ່າງ​ເອື້ອຍ​ເຟື້ອ ແລະ ຮັກ­ສາ​ຄວາມ​ສົມ​ດຸນ​ຂອງ​ສິ່ງ­ແວ­ດລ້ອມ ສັງ­ຄົມ​ຈຶ່ງ​ບໍ່​ຄວນ​ເບິ່ງ​ຂ້າມ​ຖື​ເບົາ​ບົດ­ຮຽນ​ຂອງ​ອະ­ດີດ.

ດັ້ນ​ກີບ​ເມກ

ຂ່າວທີ່ກ່ຽວຂ້ອງ