ຜູ້ປະສານງານອົງການ ສປຊ ຄົນໃໝ່ ເລີ່ມເຮັດວຽກຢູ່ລາວ

1.478 07 ພ.ພ. 2019 ຂ່າວໜ້າ​ໜຶ່ງ

    ທ່ານ​ນາງ ຊາ​ຣາ ເຊັກ​ເກນ​ເນ​ສ ໄດ້​ຍື່ນ​ສານ​ຕາ​ຕັ້ງ​ຕໍ່​ທ່ານ ສະ­ເຫຼີມ​ໄຊ ກົມ​ມະ​ສິດ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ເພື່ອ​ຮັບ​ໜ້າ­ທີ່​ເປັນ​ຜູ້​ປະ­ສານ​ງານ​ອົງ­ການ​ສະ­ຫະ​ປະ­ຊາ​ຊາດ (ສປຊ) ຄົນ​ໃໝ່ ປະ­ຈຳ​ລາວ ໃນ​ວັນ​ທີ 3 ພຶດ­ສະ­ພາ 2019.

    ທ່ານ​ນາງ ເຊັກ​ເກນ​ເນ​ສ ເປັນ​ບຸກ­ຄົນ​ທຳ​ອິດ ທີ່​ສຸມ​ໃສ່​ສະ­ເພາະ​ວຽກ​ງານ​ການ​ນຳ­ພາ ແລະ ການ​ສະ­ໜັບ­ສະ­ໜູນ​ທີມ ສປຊ ປະ­ຈຳ​ປະ­ເທດ ເຊິ່ງ​ປະ­ກອບ​ດ້ວຍ​ອົງ­ການ​ພັດ­ທະ­ນາ​ຕ່າງໆ​ຂອງ ສປຊ ທີ່​ປະ­ຈຳ​ຢູ່​ລາວ ຜູ້​ປະ­ສານ​ງານ​ອົງ­ການ ສປຊ ຍັງ​ໄດ້​ເຮັດ​ໜ້າ­ທີ່​ເປັນ​ຜູ້­ຕາງ­ໜ້າ​ອົງ­ການ ສປຊ ເພື່ອ​ການ​ພັດ­ທະ­ນາ (UNDP) ມາ​ຮອດ​ເດືອນ​ທັນ­ວາ 2018 ແລະ ໃນ​ເດືອນ​ພຶດ­ສະ­ພາ 2018 ສະ­ມັດ­ຊາ​ໃຫຍ່ ສປຊ ໄດ້​ຮັບ­ຮອງ​ເອົາ​ມະ­ຕິ​ກອງ​ປະ­ຊຸມ​ສະ­ບັບ​ໜຶ່ງ ເພື່ອ​ປະ­ຕິ​ຮູບ​ລະ­ບົບ​ການ​ພັດ­ທະ­ນາ ສປຊ ທົ່ວ​ໂລກ ໂດຍ​ມີ​ການ​ປ່ຽນ­ແປງ​ໂຄງ​ສ້າງ ແລະ ການ​ນຳ­ພາ ເພື່ອ​ສ້າງ​ຄວາມ​ເຂັ້ມ­ແຂງ​ໃຫ້­ການ​ເຊື່ອມ​ໂຍງ​ກັນ ລະ­ຫວ່າງ​ການ​ເຮັດ​ວຽກ​ຂອງ​ອົງ­ການ​ຕ່າງໆ​ຂອງ ສປຊ ເພື່ອ​ນຳ​ໃຊ້​ຊັບ­ພະ­ຍາ­ກອນ ແລະ ການ​ປະ­ກອບ­ສ່ວນ​ຕ່າງໆ​ໃຫ້​ເກີດ​ຜົນ​ປະ­ໂຫຍດ​ສູງ​ສຸດ​ຕໍ່​ປະ­ຊາ­ຊົນ ໃນ​ຖາ­ນະ​ທີ່​ເປັນ​ເຈົ້າ​ໜ້າ­ທີ່ ສປຊ ທີ່​ອາ­ວຸ­ໂສ​ທີ່​ສຸດ​ໃນ​ລາວ ທ່ານ​ນາງ ເຊັກ​ເກນ​ເນ​ສ ຈະ​ເຮັດ​ວຽກ​ນຳ­ພາ​ທີມ​ງານ ສປຊ ປະ­ຈຳ​ປະ­ເທດ ປະ­ກອບ​ມີ 16 ອົງ­ການ​ໃນ​ເຄືອ​ຄ່າຍ ສປຊ ໃນ​ວຽກ​ງານ​ການ​ສະ­ໜັບ­ສະ­ໜູນ ບຸ­ລິ­ມະ­ສິດ​ການ​ພັດ­ທະ­ນາ​ແຫ່ງ​ຊາດ ທີ່​ສອດ­ຄ່ອງ​ກັບ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ ຄັ້ງ​ທີ 8 ແລະ ເປົ້າ​ໝາຍ​ການ​ພັດ­ທະ­ນາ​ແບບ​ຍືນ​ຍົງ ນອກ​ນີ້ ທ່ານ​ຍັງ​ເປັນ​ຜູ້­ຕາງ­ໜ້າ​ຂອງ​ເລ­ຂາ­ທິ­ການ​ໃຫຍ່ ສປຊ ປະ­ຈຳ​ລາວ ນຳ​ອີກ.

    ປີ 2019 ເປັນ​ປີ​ແຫ່ງ​ການ​ເລີ່ມ​ຕົ້ນ​ຂອງ​ໄລ­ຍະ​ໃໝ່ ທີ່​ລະ­ບົບ​ຜູ້​ປະ­ສານ​ງານ ສປຊ ໄດ້​ແຍກ​ໂຕ​ອອກ​ຈາກ UNDP ແຕ່​ບໍ່​ໄດ້​ເປັນ​ສິ່ງ​ໃໝ່ ສຳ­ລັບ ສປຊ ໃນ​ລາວ ທີ່​ຈະ​ໄດ້​ເຮັດ​ວຽກ​ສະ­ໜອງ​ຜົນ​ໄດ້​ຮັບ​ທີ່​ເປັນ​ໜຶ່ງ​ດຽວ ໂດຍ​ມີ​ຂອບ​ການ​ຮ່ວມ​ມື​ລະ­ຫວ່າງ​ລາວ ແລະ ສປຊ (2017-2021) ທີ່​ເປັນ​ບ່ອນ​ອີງ​ໃນ​ການ​ເຮັດ​ວຽກ ເຊິ່ງ​ຈະ​ສືບ­ຕໍ່​ໃຫ້­ການ​ສະ­ໜັບ­ສະ­ໜູນ​ລັດ­ຖະ­ບານ​ລາວ ເພື່ອ​ບັນ­ລຸ​ຄວາມ​ມຸ່ງ​ມາດ​ປາດ​ຖະ​ໜາ ໃນ​ການ​ກາຍ­ເປັນ​ປະ­ເທດ​ທີ່​ມີ​ລາຍ​ຮັບ​ປານ​ກາງ​ໃນ​ລະ­ດັບ​ສູງ ໃນ​ປີ 2030 ທຸກ​ຄົນ​ຈະ​ໄດ້​ຮັບ​ການ​ບໍ­ລິ­ການ​ທີ່​ມີ​ຄຸນ​ນະ​ພາບ​ຢ່າງ​ເທົ່າ​ທຽມ ລວມ​ເຖິງ​ກຸ່ມ​ຄົນ​ທີ່​ມີ​ຄວາມ​ສ່ຽງ ຫຼື ດ້ອຍ​ໂອ­ກາດ​ທີ່​ສຸດ.

    ທ່ານ​ນາງ ເຊັກ​ເກນ​ເນ​ສ ໄດ້​ເລີ່ມ​ຕົ້ນ​ເຮັດ​ວຽກ​ກັບ​ອົງ­ການ ສປຊ ແຕ່​ປີ 2006 ຕຳ­ແໜ່ງ​ຫຼ້າ​ສຸດ​ແມ່ນ​ເປັນ​ທີ່​ປຶກ­ສາ​ການ​ຮ່ວມ​ມື​ດ້ານ​ການ​ປ້ອງ​ກັນ​ຂໍ້​ຂັດ​ແຍ່ງ​ຂອງ UNDP ເຊິ່ງ​ໄດ້​ເຮັດ​ວຽກ​ດ້ານ​ການ​ປ້ອງ​ກັນ​ການ​ໃຊ້​ຄວາມ​ຮຸນ​ແຮງ ການ​ຄວບ​ຄຸມ​ອາ­ວຸດ ແລະ ວຽກ​ລະ­ເບີດ​ຝັງ​ດິນ ກ່ອນ​ໜ້າ­ທີ່​ຈະ​ໄດ້​ເຮັດ​ວຽກ​ກັບ UNDP ທ່ານ​ໄດ້​ເຮັດ​ວຽກ​ກັບ​ອົງ​ການ­ຈັດ­ຕັ້ງ​ທີ່​ບໍ່​ສັງ­ກັດ​ລັດ­ຖະ­ບານ ອົງ­ການ​ຊ່ວຍ­ເຫຼືອ​ຂອງ​ປະ­ຊາ­ຊົນ​ນອກ​ແວ ຢູ່​ປະ­ເທດ​ໂມ​ຊຳ​ບິກ ອັງ​ໂກ​ລາ ແລະ ແຊັກ​ບີ ກ່ຽວ​ກັບ​ການ​ໂຄ­ສະ­ນາ​ຂົນ­ຂວາຍ​ກ່ຽວ​ກັບ​ລະ­ເບີດ​ຝັງ​ດິນ ແລະ ລະ­ເບີດ​ລູກ​ຫວ່ານ ເຊິ່ງ​ທ່ານ​ເປັນ​ຄົນ​ປະ­ເທດ​ນອກ​ແວ ຈົບ​ປະ­ລິນ­ຍາ​ໂທ​ຈາກ​ມະ­ຫາ­ວິ­ທະ­ຍາ­ໄລ​ໂກ​ເທັນ​ເບີກ ປະ­ເທດ​ສະ​ວິດ ສາ­ຂາ​ພູມ​ສາດ​ມະ­ນຸດ ແລະ ກາ​ຍະ​ພາບ ປະ­ລິນ­ຍາ​ຕີ​ສາ­ຂາ​ການ​ສຶກ​ສາ​ດ້ານ​ການ​ພັດ­ທະ­ນາ ແລະ ພູມ​ສາດ​ການ­ເມືອງ ສາ­ມາດ​ເວົ້າ​ພາ­ສາ​ອັງ­ກິດ ຝຣັ່ງ ແລະ ນອກ​ແວ.

ຂ່າວທີ່ກ່ຽວຂ້ອງ