ມອບ-ຮັບ ທຶນສະໜັບສະໜູນ ເພື່ອປັບປຸງການປົກຄອງ (ປປຄ) 2019

954 07 ພ.ພ. 2019 ຂ່າວໜ້າ​ໜຶ່ງ
ມອບ-ຮັບ ທຶນສະໜັບສະໜູນ ເພື່ອປັບປຸງການປົກຄອງ (ປປຄ) 2019

    ກະ­ຊວງ​ພາຍ​ໃນ ຈັດ​ພິ­ທີ​ລົງ​ນາມ​ມອບ​ທຶນ​ສະ­ໜັບ­ສະ­ໜູນ ເພື່ອ​ປັບ­ປຸງ​ການ​ປົກ­ຄອງ ຫຼື (ທຶນ ປປຄ GPARPSIF) 2019 ໃນ​ທ້າຍ​ເດືອນ​ເມ­ສາ 2019 ຜ່ານ​ມາ ທີ່​ສູນ​ເຝິກ­ອົບ­ຮົມ​ສະ­ຫະ­ພັນ​ແມ່­ຍິງ ໂດຍ​ມີ​ທ່ານ ຄຳ​ມູນ ວິ​ພົງ​ໄຊ ຮອງ​ລັດ­ຖະ­ມົນ­ຕີ​ກະ­ຊວງ​ພາຍ​ໃນ ຕົວ​ແທນ​ອົງ­ການ​ຜູ້​ໃຫ້​ທຶນ ໂດຍ​ສະ­ເພາະ​ອົງ­ການ​ສະ­ຫະ​ປະ­ຊາ​ຊາດ ເພື່ອ​ການ​ພັດ­ທະ­ນາ ສປຊ (UNDP) ແລະ ອົງ­ການ​ສະ­ຫະ​ປະ­ຊາ​ຊາດ-ກອງ​ທຶນ​ເພື່ອ​ການ​ພັດ­ທະ­ນາ (UNCDF) ແລະ ອົງ­ການ​ຮ່ວມ​ມື​ເພື່ອ​ການ​ພັດ­ທະ­ນາ​ຂອງ​ປະ­ເທດ​ສະ​ວິດ (SDC) ແຂກ​ຖືກ​ເຊີນ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ການ​ລົງ​ນາມ​ມີ​ຂຶ້ນ​ລະ­ຫວ່າງ​ທ່ານ ນິ­ສິດ ແກ້ວ​ປັນ­ຍາ ຫົວ­ໜ້າ​ກົມ​ແຜນ­ການ ແລະ ການ​ຮ່ວມ​ມື ກະ­ຊວງ​ພາຍ​ໃນ ທັງ​ເປັນ​ຫົວ­ໜ້າ​ກອງ​ເລ­ຂາ​ແຜນ​ງານ​ປັບ­ປຸງ​ບູ­ລະ­ນະ​ການ​ປົກ­ຄອງ​ແຫ່ງ​ຊາດ (NGPAR Programme) ແລະ ຕົວ​ແທນ​ຈາກ 16 ໂຄງ­ການ ທີ່​ໄດ້​ຮັບ​ການ​ສະ­ໜັບ­ສະ­ໜູນ​ທຶນ ປປຄ 2018 ໃນ​ນີ້ ປະ­ກອບ​ມີ 6 ໂຄງ­ການ ທີ່​ຂຶ້ນ​ກັບ​ແຂວງ 9 ໂຄງ­ການ​ຂຶ້ນ​ກັບ​ເມືອງ ແລະ 1 ສະ­ມາ­ຄົມ​ທີ່​ບໍ່​ຫວັງ​ຜົນ​ກຳ­ໄລ ທັງ 16 ໂຄງ­ການ ລວມ​ມູນ​ຄ່າ 850 ລ້ານ​ກີບ ຈະ​ໄດ້​ເລີ່ມ​ຈັດ​ຕັ້ງ​ປະ­ຕິ­ບັດ​ໃນ​ເດືອນ​ພຶດ­ສະ­ພາ ແລະ ຈະ​ສິ້ນ​ສຸດ​ໃນ​ເດືອນ​ທັນ­ວາ 2019.

    ສຳ­ລັບ 16 ໂຄງ­ການ​ທີ່​ໄດ້​ຮັບ​ທຶນ​ມີ​ໂຄງ­ການ​ປັບ­ປຸງ​ກົງ­ຈັກ​ການ­ຈັດ­ຕັ້ງ ແລະ ລະ­ບົບ​ການ​ບໍ­ລິ­ຫານ​ລັດ​ຢູ່​ເມືອງ​ເປົ້າ​ໝາຍ ສ້າງ​ເປັນ​ຫົວ­ໜ່ວຍ​ເຂັ້ມ­ແຂງ​ຮອບ­ດ້ານ​ຂອງ​ພະ​ແນກ​ພາຍ​ໃນ​ແຂວງ​ຫຼວງ​ພະ​ບາງ ໂຄງ­ການ​ສ້າງ​ຄວາມ​ເຂັ້ມ­ແຂງ​ກ່ຽວ​ກັບ​ວຽກ​ງານ​ປັບ­ປຸງ​ກົງ­ຈັກ ແລະ ຄຸ້ມ​ຄອງ​ລັດ­ຖະ­ກອນ​ຂອງ​ບັນ­ດາ​ຫ້ອງ­ການ​ຂຶ້ນ​ກັບ 6 ເມືອງ​ແຂວງ​ຈຳ­ປາ​ສັກ ຂອງ​ພະ​ແນກ​ພາຍ​ໃນ​ແຂວງ​ຈຳ­ປາ​ສັກ ນອກ​ນີ້ ມີ​ຢູ່​ແຂວງ​ອັດ​ຕະ​ປຶ ສາ­ລະ​ວັນ ເມືອງ​ວັງ​ວຽງ ກາ­ສີ ແຂວງ​ວຽງ​ຈັນ ແຂວງ​ຄຳ​ມ່ວນ ບໍ​ລິ​ຄຳ​ໄຊ ສະ­ຫວັນ​ນະ​ເຂດ ເຊ​ກອງ ຫຼວງ​ນ້ຳ​ທາ ແລະ ໂຄງ­ການ​ສ້າງ​ຄວາມ​ເຂັ້ມ­ແຂງ​ທາງ​ດ້ານ​ການ​ສ້າງ​ລາຍ​ຮັບ ຈາກ​ການ​ປູກ​ພືດ​ຜັກ​ອີນ​ຊີ ແລະ ການ​ແຍກ​ຂີ້​ເຫຍື້ອ ໂດຍ​ການ​ມີ​ສ່ວນ​ຮ່ວມ​ທາງ​ດ້ານ​ບົດ­ບາດ​ຍິງ-ຊາຍ ເພື່ອ​ເຮັດ​ໃຫ້​ສະ­ພາບ​ແວດ​ລ້ອມ​ໃນ​ສູນ​ພັດ­ທະ­ນາ​ຄົນ​ພິ­ການ ໂຮງ­ຮຽນ​ປະ­ຖົມ​ຮ່ອງ​ສຸ­ພາບ ແລະ ສະ­ຫະ­ພັນ​ແມ່­ຍິງ​ບ້ານ​ໃຫ້​ກາຍ­ເປັນ​ພື້ນ​ທີ່​ສີ­ຂຽວ ຂອງ​ສະ­ມາ­ຄົມ​ຊ່ວຍ­ເຫຼືອ​ເດັກ­ນ້ອຍ​ພິ­ການ ນະ­ຄອນ­ຫຼວງ​ວຽງ​ຈັນ.

ຂ່າວທີ່ກ່ຽວຂ້ອງ