ຂ່າວຫຼ້າສຸດ

ຮອງເຈົ້າຄອງ ລົງຊຸກຍູ້ການຜະລິດກະສິກຳ ຢູ່ເມືອງປາກງື່ມ ແລະ ໄຊທານີ

925 07 ພ.ພ. 2019 ຂ່າວໜ້າ​ໜຶ່ງ
ຮອງເຈົ້າຄອງ ລົງຊຸກຍູ້ການຜະລິດກະສິກຳ ຢູ່ເມືອງປາກງື່ມ ແລະ ໄຊທານີ

    ວັນ​ທີ 6 ພຶດ­ສະ­ພາ 2019 ທ່ານ ອາດ​ສະ­ພັງ​ທອງ ສີ​ພັນ​ດອນ ຮອງ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ພ້ອມ​ດ້ວຍ​ຂະ­ແໜງ­ການ​ກ່ຽວ­ຂ້ອງ ໄດ້​ລົງ​ເຄື່ອນ​ໄຫວ​ຊຸກ­ຍູ້​ຂະ​ບວນ​ການ​ຜະ­ລິດ​ຢູ່​ເມືອງ​ປາກ​ງື່ມ ນະ­ຄອນ­ຫຼວງ​ວຽງ​ຈັນ ຖືກ​ຕ້ອນ­ຮັບ​ຈາກ​ທ່ານ ຄຳ​ໝູນ ຕຽງ​ທະ​ລາດ ເຈົ້າ­ເມືອງ​ປາກ​ງື່ມ​ພ້ອມ​ດ້ວຍ​ຄະ­ນະ.

    ການ​ລົງ​ເຄື່ອນ​ໄຫວ​ຄັ້ງ​ນີ້ ທ່ານ​ຮອງ​ເຈົ້າ​ຄອງ ພ້ອມ​ຄະ­ນະ ໄດ້​ລົງ​ຕິດ­ຕາມ​ກວດ­ກາ​ປະ­ຕູ​ກັນ​ນ້ຳ​ຖ້ວມ​ຢູ່​ຫ້ວຍ​ໝາກ​ຮຽວ ປະ­ຕູ​ນ້ຳ​ເຂດ​ບ້ານ​ດອນ​ວັງ​ໂພ ແລະ ປະ­ຕູ​ນ້ຳ​ບ້ານ​ໂດນ ໃນ​ນີ້ ໄດ້​ກວດ­ກາ​ເບິ່ງ​ຄວາມ​ເປັນ​ລະ­ບຽບ​ຮຽບ​ຮ້ອຍ ຂອງ​ການ​ສ້ອມ­ແປງ​ໄລ­ຍະ​ຜ່ານ​ມາ ແລະ ເບິ່ງ​ຄວາມ​ແໜ້ນ­ໜາ​ຂອງ​ປະ­ຕູ​ນ້ຳ​ດັ່ງ­ກ່າວ ແນ­ໃສ່​ຮັບ­ປະ­ກັນ​ການ​ຕ້ານ​ແລ້ງ-ຕ້ານ​ຖ້ວມ ເພື່ອ​ຮອງ​ຮັບ​ໃຫ້​ແກ່​ການ​ຜະ­ລິດ​ກະ­ສິ­ກຳ​ຂອງ​ປະ­ຊາ­ຊົນ ທີ່​ດຳ­ລົງ​ຊີ­ວິດ​ໃນ​ເຂດ​ດັ່ງ­ກ່າວ ໃຫ້​ໄດ້​ຕາມ​ສະ­ມັດ­ຖະ­ພາບ ແລະ ຜົນ​ຜະ­ລິດ​ທີ່​ດີ​ຕາມ​ເປົ້າ​ໝາຍ​ທີ່​ວາງ​ໄວ້.

    ນອກ­ຈາກ​ນີ້ ຍັງ​ໄດ້​ລົງ​ຊຸກ­ຍູ້​ບ້ານ​ຕົວ​ແບບ​ເຊ​ມາ​ອຸນ​ທ່າ​ເດືອ-ສິງ​ຫອມ ເຊິ່ງ​ໄດ້​ຮັບ​ຟັງ​ລາຍ​ງານ​ໂດຍ​ຫຍໍ້ ກ່ຽວ​ກັບ​ກິດ­ຈະ­ກຳ​ຊຸກ­ຍູ້​ຊ່ວຍ­ເຫຼືອ​ຂອງ​ໂຄງ­ການ​ພັດ­ທະ­ນາ​ບ້ານ​ຕົວ​ແບບ​ເຊ​ມາ​ອຸນ​ຈາກ ສ ເກົາ­ຫຼີ ຈາກ​ທ່ານ ຊ້ວນ ແກ້ວ­ຕາ ນາຍ­ບ້ານ​ວັງ​ໂພ​ວ່າ: ໂຄງ­ການ​ດັ່ງ­ກ່າວ ເລີ່ມ​ຈັດ​ຕັ້ງ​ປະ­ຕິ­ບັດ​ມາ​ແຕ່​ເດືອນ​ມັງ­ກອນ 2018 ປະ­ກອບ​ມີ​ບ້ານ​ທ່າ​ເດື່ອ-ສິງ​ຫອມ ດອນ​ວັງ​ໂພ ແລະ ບ້ານ​ໝາກ​ຮຽວ ຜ່ານ​ມາ​ມູນ​ນິ­ທິ​ເຊ​ມາ​ອຸນ ໄດ້​ຊ່ວຍ­ເຫຼືອ​ຫ້ອງ­ການ​ຊຸມ​ຊົນ​ບ້ານ​ຕົວ​ແບບ​ເຊ​ມາ​ອຸນ​ບ້ານ​ລະ 1 ຫຼັງ ຕິດ​ຕັ້ງ​ໂຮງ​ອົບ​ເຂົ້າ­ເປືອກ​ຂະ­ໜາດ 3,5 ໂຕນ 4 ເຄື່ອງ ປຸກ​ສາງ​ເກັບ​ມ້ຽນ​ຜົນ​ຜະ­ລິດ​ກະ­ສິ­ກຳ​ສຳ­ເລັດ 2 ຫຼັງ ພ້ອມ​ນັ້ນ ຍັງ​ຊ່ວຍ­ເຫຼືອ​ວັດ­ຖຸ​ອຸ­ປະ­ກອນ ເພື່ອ​ສ້າງ​ທາງ​ເບ​ຕົງ​ເຂົ້າ​ຫ້ອງ­ການ​ຊຸມ​ຊົນ​ບ້ານ​ຕົວ​ແບບ (ທ່າ​ເດື່ອ-ສິງ​ຫອມ) ຍາວ 360 ແມັດ ປູ​ທາງ​ເບ​ຕົງ​ເຂົ້າ​ຫ້ອງ­ການ​ບ້ານ​ດອນ​ວັງ​ໂພ​ຍາວ 600 ແມັດ ແລະ ທາງ​ເຂົ້າ​ຫາ​ໂຮງ​ອົບ​ເຂົ້າ­ເປືອກ​ຍາວ 130 ແມັດ ປຸກ​ສ້າງ​ເຮືອນ​ຮົ່ມ​ປູກ​ຜັກ​ຂະ­ໜາດ​ກວ້າງ 14 ແມັດ ຍາວ 24 ແມັດ ສຳ­ເລັດ 41 ຫຼັງ ເພື່ອ​ທົດ​ລອງ​ປູກ​ໜໍ່­ໄມ້​ຝຣັ່ງ ແລະ ຫົວ​ກາ​ລົດ​ຢູ່​ບ້ານ​ດອນ​ວັງ​ໂພ ຈັດ​ຕັ້ງ​ກຸ່ມ​ຜະ­ລິດ​ກະ­ສິ­ກຳ​ບ້ານ​ຕົວ​ແບບ​ເຊ​ມາ​ອຸນ​ຂຶ້ນ​ລວມ​ມີ 3 ກຸ່ມ ມີ​ສະ­ມາ­ຊິກ​ທັງ​ໝົດ 125 ຄົນ ໄດ້​ນຳ​ເອົາ​ຊ່ຽວ­ຊານ​ດ້ານ​ການ​ປູກ​ເຂົ້າ​ມາ​ຈາກ ສ ເກົາ­ຫຼີ ມາ​ເຝິກ­ອົບ­ຮົມ​ເຕັກ​ນິ​ການ​ປູກ​ເຂົ້າ ໃຫ້​ໄດ້­ຜົນ​ຜະ­ລິດ​ສູງ​ແກ່​ຊາວ­ນາ​ແຕ່​ລະ​ບ້ານ ພ້ອມ​ເຮັດ​ແປງ​ສາ­ທິດ​ທົດ​ລອງ ເພື່ອ​ສົມ​ທຽບ​ການ​ປູກ​ເຂົ້າ​ແບບ​ລາວ ແລະ ການ​ປູກ​ເຂົ້າ​ແບບ​ເກົາ­ຫຼີ ຢູ່ 3 ບ້ານ ບ້ານ​ລະ 1 ຈຸດ ໃນ​ລະ­ດູ​ນາ­ແຊງ 2018-2019 ເຫັນ​ວ່າ ການ​ປູກ​ເຂົ້າ​ແບບ​ເກົາ­ຫຼີ​ໄດ້­ຜົນ​ຜະ­ລິດ​ສູງ​ກວ່າ​ແບບ​ລາວ ສະ­ເລ່ຍ​ນາ​ດຳ 6,30 ໂຕນ​ຕໍ່​ເຮັກ­ຕາ ແລະ ນາ­ຫວ່ານ 4,55 ໂຕນ​ຕໍ່​ເຮັກ­ຕາ ນອກ​ນັ້ນ ຈັດ​ເຝິກ­ອົບ­ຮົມ​ໃຫ້​ຄະ­ນະ​ກຸ່ມ ແລະ ສະ­ມາ­ຊິກ​ກຸ່ມ 3 ບ້ານ​ກ່ຽວ​ກັບ​ການ​ນຳ​ໃຊ້​ເຄື່ອງ​ຈັກ​ອົບ​ເຂົ້າ­ເປືອກ ໃຫ້​ແກ່​ສະ­ມາ­ຊິກ​ໃນ​ລະ­ດູ​ນາ­ແຊງ​ນີ້​ໄດ້ 302 ໂຕນ.

    ພາຍ­ຫຼັງ​ທີ່​ຮັບ​ຟັງ​ລາຍ​ງານ​ແລ້ວ ປະ­ຊາ­ຊົນ​ໄດ້​ມີ​ຂໍ້​ສະ­ເໜີ​ຕໍ່​ທ່ານ​ຮອງ​ເຈົ້າ​ຄອງ​ນະ­ຄອນ­ຫຼວງ ເປັນ­ຕົ້ນ ເວ­ລາ​ນ້ຳ​ຖ້ວມ​ປະ­ຕູ​ນ້ຳ​ຢູ່​ຫ້ວຍ​ທ່າ​ໜອງ​ຄັນ ບ້ານ​ດອນ​ວັງ​ໂພ ແມ່ນ​ບໍ່​ສາ­ມາດ​ລະ­ບາຍ​ນ້ຳ​ໄດ້ ສະ­ເໜີ​ໃຫ້​ຕິດ​ຕັ້ງ​ຈັກ­ສູບ­ນ້ຳ ເພື່ອ​ດູດ​ນ້ຳ​ລະ­ບາຍ​ອອກ​ປ້ອງ​ກັນ​ນ້ຳ​ຖ້ວມ ເນື່ອງ​ຈາ​ກວ່າ​ນ້ຳ­ຂອງ​ເຕັມ​ຕະ​ລິ່ງ​ບໍ່​ສາ­ມາດ​ລະ­ບາຍ​ນ້ຳ​ອອກ​ໄດ້ ແລະ ເສັ້ນ­ທາງ​ຜ່ານ​ເລກ​ທີ 11 ຕອນ​ໃຕ້​ຜ່ານ​ບ້ານ ປັດ­ຈຸ­ບັນ ໄດ້​ມີ​ການ​ຢຸດ­ຕິ​ການ​ກໍ່­ສ້າງ ສະ­ເໜີ​ໃຫ້​ມີ​ການ​ສືບ­ຕໍ່​ສ້າງ​ໃຫ້​ສຳ­ເລັດ ເຮັດ​ໃຫ້­ການ​ໄປ​ມາ​ພົບ​ຄວາມ​ຫຍຸ້ງ­ຍາກ.

    ໂອ­ກາດ​ນີ້ ທ່ານ​ຮອງ​ເຈົ້າ​ຄອງ ໄດ້​ຍ້ອງ­ຍໍ​ຊົມ­ເຊີຍ​ຕໍ່​ໂຄງ­ການ​ພັດ­ທະ­ນາ​ບ້ານ​ຕົວ​ແບບ​ເຊ​ມາ​ອຸນ​ຈາກ ສ ເກົາ­ຫຼີ ທີ່​ໄດ້​ປັບ­ປຸງ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ ເຮັດ​ໃຫ້​ປະ­ຊາ­ຊົນ 3 ບ້ານ​ມີ​ຊີ­ວິດ​ການ​ເປັນ​ຢູ່​ນັບ​ມື້​ດີ​ຂຶ້ນ​ເປັນ​ກ້າວໆ ພ້ອມ​ນັ້ນ​ຍັງ​ເນັ້ນ​ໃຫ້​ສະ­ມາ­ຊິກ​ພາຍ​ໃນ​ກຸ່ມ ມີ​ການ​ແລກ­ປ່ຽນ​ບົດ­ຮຽນ​ກັບ​ບັນ­ດາ​ຜູ້​ທີ່​ໄດ້​ເຂົ້າ​ຮ່ວມ​ເຝິກ­ອົບ­ຮົມ ໃນ​ໂຄງ­ການ​ພັດ­ທະ­ນາ​ບ້ານ​ຕົວ​ແບບ​ເຊ​ມາ​ອຸນ​ຈາກ ສ ເກົາ­ຫຼີ ນອກ​ນັ້ນ ນະ­ຄອນ­ຫຼວງ ຈະ​ສືບ­ຕໍ່​ເອົາ­ໃຈ­ໃສ່​ຊຸກ­ຍູ້​ໃຫ້​ກຸ່ມ​ມີ​ຄວາມ​ຍືນ​ຍົງ ສາ­ມາດ​ພັດ­ທະ­ນາ​ໄປ​ເລື້ອຍໆ.

ຂ່າວທີ່ກ່ຽວຂ້ອງ