ຂ່າວຫຼ້າສຸດ

ກຸ່ມຫັດຖະກຳຕ່ຳຫູກບ້ານປາກແຖບ ໄດ້ຮັບກາໝາຍ ໂອດ໋ອບ

985 07 ພ.ພ. 2019 ຂ່າວໜ້າ​ໜຶ່ງ
ກຸ່ມຫັດຖະກຳຕ່ຳຫູກບ້ານປາກແຖບ ໄດ້ຮັບກາໝາຍ ໂອດ໋ອບ

    ກຸ່ມ​ຫັດ­ຖະ­ກຳ​ຕ່ຳ­ຫູກ​ບ້ານ​ປາກ​ແຖບ ເມືອງ​ສັງ​ທອງ ນະ­ຄອນ­ຫຼວງ​ວຽງ​ຈັນ ເປັນ​ກຸ່ມ​ໜຶ່ງ​ທີ່​ໄດ້​ຮັບ​ກາ​ໝາຍ ໂອ​ດ໋ອບ ໜຶ່ງ​ຜະ­ລິດ​ຕະ​ພັນ​ແຫ່ງ​ຊາດ ເຊິ່ງ​ກົມ​ສົ່ງ­ເສີມ​ການ​ຄ້າ ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ໄດ້​ອະ­ນຸ­ມັດ​ນຳ​ໃຊ້​ກາ​ໝາຍ​ດັ່ງ­ກ່າວ ໃຫ້​ໃນ​ທ້າຍ​ເດືອນ​ເມ­ສາ 2019 ຜ່ານ​ມາ.

    ທ່ານ​ນາງ ນຸຍ ພົມ​ມະ​ລາ ຫົວ­ໜ້າ​ກຸ່ມ​ຫັດ­ຖະ­ກຳ​ຕ່ຳ­ຫູກ​ບ້ານ​ປາກ​ແຖບ ກ່າວ​ວ່າ: ເພື່ອ​ຮັກ­ສາ​ມູນ­ເຊື້ອ​ຂອງ​ບັນ­ພະ­ບຸ­ລຸດ​ໃນ​ການ​ຕ່ຳ­ຫູກ​ທໍ​ໄໝ ຈຶ່ງ​ໄດ້​ເອົາ​ເວ­ລາ​ຫວ່າງ​ຈາກ​ການ​ເຮັດ​ນາ ມາ​ປະ­ກອບ​ອາ­ຊີບ​ເສີມ​ໂດຍ​ການ​ຕ່ຳ­ຫູກ ເພື່ອ​ຊຸກ­ຍູ້​ໃຫ້​ເອື້ອຍ​ນ້ອງ​ແມ່­ຍິງ​ພາຍ​ໃນ​ບ້ານ​ມີ​ວຽກ​ເຮັດ​ງານ​ທຳ ເຊິ່ງ​ໄດ້​ສ້າງ­ຕັ້ງ​ເປັນ​ກຸ່ມ​ຫັດ­ຖະ­ກຳ​ຕ່ຳ­ຫູກ​ບ້ານ​ປາກ​ແຖບ ຂຶ້ນ​ປີ 2003 ປັດ­ຈຸ­ບັນ​ມີ 98 ກີ່ ແຕ່​ລະ​ເດືອ​ສາ­ມາດ​ຈຳ­ໜ່າຍ ແລະ ສ້າງ​ລາຍ​ຮັບ​ໄດ້ 1 ລ້ານ​ກີບ​ຕໍ່​ຄົນ ໂດຍ​ຜະ­ລິດ​ຕະ​ພັນ​ຫັດ­ຖະ­ກຳ​ທີ່​ຜະ­ລິດ​ອອກ​ມາ ແມ່ນ​ໄດ້​ຂາຍ​ທົ່ວ​ໄປ ແລະ ສ່ວນ​ໜຶ່ງ​ໄດ້​ສົ່ງ​ໃຫ້​ແມ່​ຄ້າ​ຢູ່​ຕະ­ຫຼາດ​ຂົວ​ດິນ​ຈຳ­ໜ່າຍ​ຕໍ່ ຜະ­ລິດ​ຕະ​ພັນ​ຫັດ­ຖະ­ກຳ​ທີ່​ຜະ­ລິດ​ປະ­ກອບ​ມີ ແພ​ບ່ຽງ​ໄໝ​ມ້ອນ ແພ​ເສື້ອ​ໄໝ​ມ້ອນ ສິ້ນ​ຍຳ ຕີນ​ສິ້ນ​ຄູ່ ແລະ ແພ​ຄ້ອງ​ຄໍ​ໄໝ​ມ້ອນ ແລະ ຝ້າຍ ເຊິ່ງ​ເປັນ​ຜະ­ລິດ​ຕະ​ພັນ​ທີ່​ຜະ­ລິດ​ຂຶ້ນ​ໃໝ່.

    ການ​ໄດ້​ຮັບ​ເຄື່ອງ­ໝາຍ​ການ​ຄ້າ ໜຶ່ງ​ເມືອງ ໜຶ່ງ​ຜະ­ລິດ​ຕະ​ພັນ ຈະ​ເປັນ​ສິ່ງ​ໜຶ່ງ​ທີ່​ຢັ້ງ­ຢືນ​ເຖິງ​ຄຸນ​ນະ​ພາບ ແລະ ຄວາມ​ຍືນ​ຍົງ​ຂອງ​ການ​ຜະ­ລິດ ເວົ້າ​ສະ­ເພາະ ຈະ​ສາ­ມາດ​ດຶງ​ດູດ ກໍ​ຄື ຂະ­ຫຍາຍ​ຕະ­ຫຼາດ​ໃຫ້​ກວ້າງ​ອອກ​ໄດ້ ເພາະ​ປັດ­ຈຸ­ບັນ ຜະ­ລິດ​ຕະ​ພັນ​ທີ່​ຜະ­ລິດ​ອອກ​ມາ​ແມ່ນ​ບໍ່​ທັນ​ໄດ້​ມີ​ຕະ­ຫຼາດ​ຮອງ​ຮັບ​ກວ້າງ­ຂວາງ ບາງ​ຄັ້ງ​ຈິ່ງ​ໄດ້​ຜັດ­ປ່ຽນ​ກັນ​ຜະ­ລິດ ເພື່ອ​ຈຳ­ໜ່າຍ​ໃຫ້​ຕະ­ຫຼາດ​ທີ່​ມີ​ຢູ່ ຖ້າ​ມີ​ຕະ­ຫຼາດ​ຮອງ​ຮັບ​ເພີ່ມ ກຸ່ມ​ພວກ​ເຮົາ​ກໍ​ມີ​ຄວາມ​ພ້ອມ​ທີ່​ຈະ​ຂະ­ຫຍາຍ​ກີ່​ຕ່ຳ­ຫູກ ກໍ​ຄື ຂະ­ຫຍາຍ​ການ​ສ້າງ​ລາຍ​ຮັບ​ໃຫ້​ແມ່­ຍິງ ມີ​ເສດ­ຖະ­ກິດ​ທີ່​ກຸ້ມ​ຕົນ​ເອງ ແລະ ຄອບ­ຄົວ​ໄດ້.

ຂ່າວທີ່ກ່ຽວຂ້ອງ