ຂ່າວຫຼ້າສຸດ

ຫໍພະແກ້ວ-ສີສະເກດ-ພະທາດຫຼວງ ໄດ້ຮັບລາງວັນພັດທະນາການທ່ອງທ່ຽວດີເດັ່ນ

708 07 ພ.ພ. 2019 ຂ່າວໜ້າ​ໜຶ່ງ
ຫໍພະແກ້ວ-ສີສະເກດ-ພະທາດຫຼວງ ໄດ້ຮັບລາງວັນພັດທະນາການທ່ອງທ່ຽວດີເດັ່ນ

    ໃນ​ໂອ­ກາດ​ເປີດ​ປີ​ທ່ອງ​ທ່ຽວ​ລາວ 2018 ພັກ-ລັດ­ຖະ­ບານ ອຳ­ນາດ​ການ​ປົກ­ຄອງ​ທ້ອງ­ຖິ່ນ ແລະ ຫົວ­ໜ່ວຍ​ທຸ­ລະ​ກິດ​ຂະ­ແໜງ​ທ່ອງ​ທ່ຽວ ໄດ້​ຈັດ​ຫຼາຍ​ກິດ­ຈະ­ກຳ​ເພື່ອ​ດຶງ​ດູດ​ນັກ​ທ່ອງ​ທ່ຽວ​ພາຍ​ໃນ ແລະ ຕ່າງ­ປະ­ເທດ​ເຂົ້າ​ມາ​ທ່ຽວ​ຊົມ​ສະ­ຖານ­ທີ່​ທ່ອງ​ທ່ຽວ​ແຫ່ງ​ຕ່າງໆ ເຊິ່ງ​ຜ່ານ​ການ­ຈັດ­ຕັ້ງ​ແມ່ນ​ປະ­ສົບ​ຜົນ­ສຳ­ເລັດ​ຫຼາຍ​ດ້ານ ໂດຍ​ສະ­ເພາະ ນັກ​ທ່ອງ​ທ່ຽວ​ໄດ້​ເພີ່ມ​ຂຶ້ນ​ທຽບ­ໃສ່​ປີ 2017 ທັ້ງ​ນີ້ ກໍ​ຍ້ອນ​ການ​ປະ­ກອບ­ສ່ວນ​ຈາກ​ຫຼາຍ​ພາກ­ສ່ວນ ຈາກ​ການ​ສະ­ຫຼຸບ​ປິດ​ປີ​ທ່ອງ​ທ່ຽວ ມີ​ຫຼາຍ​ພາກ­ສ່ວນ​ໄດ້​ຮັບ​ລາ­ງວັນ​ປີ​ທ່ອງ​ທ່ຽວ​ລາວ 2018 ໃນ​ນີ້ ພິ​ພິ​ທະ​ພັນ​ຫໍ­ພະ­ແກ້ວ ສີ­ສະ​ເກດ ແລະ ພະ​ທາດ­ຫຼວງ​ວຽງ​ຈັນ ກໍ​ໄດ້​ຮັບ​ລາ­ງວັນ​ດັ່ງ­ກ່າວ.

    ທ່ານ ພູ​ວຽງ ໂພ­ທິ​ສານ ຫົວ­ໜ້າ​ອຳ­ນວຍ​ການ​ພິ​ພິ​ທະ​ພັນ​ສະ­ຖານ​ບູ­ຮານ​ນະ­ຄອນ­ຫຼວງ​ວຽງ​ຈັນ (ນວ) ເຊິ່ງ​ລວມ​ມີ​ພິ​ພິ​ທະ​ພັນ​ຫໍ­ພະ­ແກ້ວ ສີ­ສະ​ເກດ ພະ​ທາດ­ຫຼວງ ແລະ ຫໍ​ຫຼັກ​ເມືອງ ໃຫ້​ສຳ­ພາດ​ວັນ​ທີ 2 ພຶດ­ສະ­ພາ 2019 ວ່າ: ປີ 2018 ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ (ຖວ​ທ) ຮ່ວມ​ກັບ​ພະ​ແນກ ຖວ​ທ ນວ ແລະ ບັນ­ດາ​ເມືອງ ຈັດ​ກິດ­ຈະ­ກຳ​ຂຶ້ນ ເພື່ອ​ສ້າງ​ຄວາມ​ດຶງ​ດູດ​ນັກ​ທ່ອງ​ທ່ຽວ​ພາຍ​ໃນ ແລະ ຕ່າງ­ປະ­ເທດ​ເຂົ້າ​ມາ​ທ່ຽວ​ຊົມ ນວ ໃນ​ນີ້ ສະ­ຖານ­ທີ່​ທ່ອງ​ທ່ຽວ​ວັດ­ທະ­ນະ­ທຳ 3 ແຫ່ງ​ທີ່​ມີ​ຊື່​ສຽງ​ຄື ຫໍ­ພະ­ແກ້ວ ສີ­ສະ​ເກດ ແລະ ພະ​ທາດ­ຫຼວງ ໄດ້​ມີ​ນັກ​ທ່ອງ​ທ່ຽວ​ເຂົ້າ​ຊົມ​ຈຳ­ນວນ​ຫຼວງ­ຫຼາຍ ໂດຍ​ສະ­ເພາະ​ນັກ​ທ່ອງ​ທ່ຽວ​ເກົາ­ຫຼີ ແລະ ຈີນ ຍ້ອນ​ເຂົາ­ເຈົ້າ​ສົນ­ໃຈ​ສະ­ຖານ­ທີ່​ທ່ອງ​ທ່ຽວ​ດ້ານ​ວັດ­ທະ­ນະ­ທຳ ສະ­ຖານ​ບູ­ຮານ ແລະ ວັດ­ຖຸ​ເກົ່າ​ແກ່ ແລະ ປີ 2018 ສະ­ຖານ­ທີ່​ທ່ອງ​ທ່ຽວ 3 ແຫ່ງ​ນີ້ ກໍ​ໄດ້​ມີ​ການ​ຈັດ​ກິດ­ຈະ­ກຳ ເປັນ­ຕົ້ນ ໂຄງ­ການ​ປະ­ຕິ­ສັງ­ຂອນ​ພະ​ທາດ­ຫຼວງ ຄັ້ງ​ທີ 4 ຕິດ​ພັນ​ກັບ​ກິດ­ຈະ­ກຳ​ການ­ທ່ອງ­ທ່ຽວ ສິ່ງ​ທີ່​ດຶງ​ດູດ​ມີ​ກິດ­ຈະ­ກຳ​ໃໝ່​ເກີດ​ຂຶ້ນ ຄື ກິດ­ຈະ­ກຳ​ວາງ­ສະ­ແດງ​ຮູບ​ພາບ​ປະ­ຫວັດ​ຄວາມ​ເປັນ​ມາ​ຂອງ​ພະ​ທາດ­ຫຼວງ ແຕ່​ລະ​ຍຸກ​ແຕ່​ລະ­ສະ​ໄໝ ບຸນ​ພະ​ທາດ­ຫຼວງ ເຮັດ​ໃຫ້​ນັກ​ທ່ອງ​ທ່ຽວ​ທີ່​ເຂົ້າ​ທ່ຽວ​ຊົມ​ມີ​ຄວາມ​ພໍ­ໃຈ​ຕ່າງ​ກັບ​ປີ­ຜ່ານ­ມາ ທີ່​ນັກ​ທ່ອງ​ທ່ຽວ​ມັກ​ເວົ້າ​ວ່າ ເຂົ້າ​ທ່ຽວ​ຊົມ​ພະ​ທາດ­ຫຼວງ​ແລ້ວ ກໍ​ເຫັນ​ແຕ່​ພະ​ທາດ­ຫຼວງ​ຈະ​ບໍ່​ໄດ້​ຂໍ້​ມູນ​ປະ­ຫວັດ ນອກ​ນີ້ ຍັງ​ໄດ້​ນຳ​ເອົາ​ວັດ­ຖຸ​ພັນ ກໍ​ຄື​ພະ​ພຸດ​ທະ​ຮູບ​ເກົ່າ​ແກ່​ຈາກ​ສີ­ສະ​ເກດ ແລະ ຫໍ­ພະ­ແກ້ວ ສ່ວນ​ໜຶ່ງ​ມາ​ວາງ­ສະ­ແດງ​ຢູ່​ພະ​ທາດ­ຫຼວງ ເພື່ອ​ໃຫ້​ນັກ​ທ່ອງ​ທ່ຽວ​ເຫັນ​ການ​ປ່ຽນ­ແປງ ພ້ອມ​ນີ້ ຍັງ​ມີ​ກິດ­ຈະ­ກຳ​ໄຫວ້​ພະ ວຽນ­ທຽນ​ໃນ​ທຸກ​ວັນ​ສິນ​ທີ່​ເປັນ​ກິດ­ຈະ­ກຳ​ເສີມ ເຊິ່ງ​ແຕ່​ລະ​ສິນ​ຈະ​ມີ​ມວນ​ຊົນ​ເຂົ້າ​ຮ່ວມ 150-700 ຄົນ ການ​ວຽນ­ທຽນ​ຈະ​ງາມ​ກວ່າ​ບຸນ­ທາດ­ຫຼວງ ເນື່ອງ​ຈາກ​ຜູ້​ເຂົ້າ​ຮ່ວມ​ຈະ​ນຸ່ງ​ເຄື່ອງ​ຂາວ​ທັງ​ໝົດ.

    ນອກ​ນີ້ ຍັງ​ໄດ້​ເອົາ­ໃຈ­ໃສ່​ອະ­ນາ­ໄມ ທຳ​ຄວາມ​ສະ­ອາດ ປັບ­ປຸງ​ສວນ​ຫຍ້າ​ຫົດ​ນ້ຳ ເພື່ອ​ເຮັດ​ໃຫ້​ແຫຼ່ງ​ທ່ອງ​ທ່ຽວ​ກາຍ­ເປັນ​ສີ­ຂຽວ ດ້ານ​ການ​ບໍ­ລິ­ການ ກໍ​ໄດ້​ປັບ­ປຸງ​ເວ­ລາ​ເຂົ້າ​ຊົມ​ໂດຍ​ຈະ​ເປີດ​ເວ­ລາ 8-17:00 ໂມງ ຈະ​ບໍ່​ພັກ​ຕອນ​ທ່ຽງ​ຄື​ກັບ​ຜ່ານ​ມາ ເພື່ອ​ໃຫ້​ນັກ​ທ່ອງ​ທ່ອງ​ສາ­ມາດ​ເຂົ້າ​ທ່ຽວ​ຊົມ​ໄດ້​ຕະ­ຫຼອດ​ເວ­ລາ ການ​ບໍ­ລິ­ການ​ກໍ​ມີ​ຄວາມ​ວ່ອງ­ໄວ​ຂຶ້ນ ຮັກ­ສາ​ຄວາມ​ເປັນ​ລະ­ບຽບ​ຮຽບ​ຮ້ອຍ ຈຶ່ງ​ເຮັດ​ໃຫ້​ສະ­ຖານ­ທີ່​ທ່ອງ​ທ່ຽວ​ພິ​ພິ​ທະ​ພັນ​ຫໍ­ພະ­ແກ້ວ ສີ­ສະ​ເກດ ແລະ ພະ​ທາດ­ຫຼວງ ໄດ້​ຮັບ​ລາ­ງວັນ​ການ​ພັດ­ທະ­ນາ​ການ­ທ່ອງ­ທ່ຽວ​ດີ­ເດັ່ນ ແລະ ຍືນ​ຍົງ​ຂອງ ສປປ ລາວ ຈາກ​ປີ​ທ່ອງ​ທ່ຽວ​ລາວ 2018 ພິ​ພິ​ທະ​ພັນ​ພະ​ທາດ­ຫຼວງ ຍັງ​ໄດ້​ຮັບ​ລາ­ງວັນ​ຫ້ອງ​ນ້ຳ​ສະ­ອາດ ເຊິ່ງ​ໄປ​ຮັບ​ຢູ່ ສສ ຫວຽດ­ນາມ ຕົ້ນ​ປີ 2019.

ຂ່າວທີ່ກ່ຽວຂ້ອງ