ສຳ​ມະ​ນາ​ເຕັກນິກ​ກ່ຽວ​ກັບ​ພະລັງງານ​ໄຟຟ້າ ລາວ-ເກົາຫຼີ

816 06 ພ.ພ. 2019 ຂ່າວໜ້າ​ໜຶ່ງ
ສຳ​ມະ​ນາ​ເຕັກນິກ​ກ່ຽວ​ກັບ​ພະລັງງານ​ໄຟຟ້າ ລາວ-ເກົາຫຼີ

    ອົງການ Kotra Lao ຈັດ​ສຳ​ມະ​ນາ​ເຕັກນິກ​ກ່ຽວ​ກັບ​ພະລັງງານ​ໄຟຟ້າ​ລາວ-ເກົາຫຼີ 2019 ຂຶ້ນ​ວັນ​ທີ 2 ພຶດສະພາ 2019 ໂດຍ​ເປັນ​ປະທານ​ຂອງ​ທ່ານ ດາວ​ວົງ ພອນ​ແກ້ວ ຫົວໜ້າ​ຫ້ອງການ​ກະຊວງ​ພະລັງງານ ແລະ ບໍ່​ແຮ່ ທ່ານ Choi Myeong Ho ຮອງ​ປະທານ​ລັດ​ວິ​ສາ​ຫະ​ກິດ​ພະລັງງານ​ໄຟຟ້າ​ເກົາຫຼີ (KEPCO) ແລະ ທ່ານ Shin sung soon ເອກ​ອັກ​ຄະ​ລັດ​ຖະ​ທູດ ສ ເກົາຫຼີ ປະຈຳ ​ສປປ ລາວ ມີ​ພາກສ່ວນ​ກ່ຽວຂ້ອງ​ສອງ​ຝ່າຍ​ເຂົ້າ​ຮ່ວມ.

    ທ່ານ ດາວ​ວົງ ພອນ​ແກ້ວ ກ່າວ​ວ່າ: ກະຊວງ​ພະລັງງານ ແລະ ບໍ່​ແຮ່ ເຫັນ​ໄດ້​ຄວາມ​ສຳຄັນ​ຂອງ​ເຕັກ​ໂນ​ໂລ​ຊີ​ທັນ​ສະໄໝ​ທີ່​ຈະ​ມາ​ຊ່ວຍ​ໃນ​ການ​ຜະລິດ ແລະ ຈຳໜ່າຍ​ພະລັງງານ​ໄຟຟ້າ ເພື່ອ​ພັດທະນາ​ລະ ບົບ​ໄຟຟ້າ​ຂອງ​ປະເທດ ໃຫ້​ຮັບປະກັນ​ການ​ສະໜອງ​ໄຟຟ້າ​ພາຍ​ໃນ ແລະ ສົ່ງ​ອອກ​ຕ່າງປະເທດ​ຢ່າງ​ມີ​ປະ ສິດທິ​ຜົນ ສະຖຽນ​ລະ​ພາບ ແລະ ໃນ​ລາຄາ​ທີ່​ເໝາະ​ສົມ ເປັນ​ທີ່​ຍອມຮັບ​ໃຫ້​ຜູ້​ຊົມໃຊ້ ພ້ອມ​ທັງ​ມີ​ຄວາມ​ຍິນ​ດີ​ຕໍ່​ການ​ຮ່ວມ​ມື​ກັນ​ລະຫວ່າງ ​ສປປ ລາວ ແລະ ສ ເກົາຫຼີ ໃນ​ວຽກ​ງານ​ພະລັງງານ​ໄຟຟ້າ ໂດຍ​ສະເພາະ​ການ​ຮ່ວມ​ມື​ລະຫວ່າງ​ລັດ​ວິ​ສາ​ຫະ​ກິດ​ໄຟຟ້າ​ລາວ ແລະ KEPCO ທີ່​ໄດ້​ມີ​ໂຄງການ​ຮ່ວມ​ກັນ ເພື່ອ​ສ້າງ​ຄວາມ​ເປັນ​ໄປ​ໄດ້​ໃນ​ການ​ກໍ່ສ້າງ ແລະ ປັບປຸງ​ສະຖານີ​ໄຟຟ້າ​ທີ່​ມີ​ໃນ​ປັດຈຸບັນ​ໃຫ້​ເປັນ​ສະຖານີ GIS ເຊິ່ງ​ໃນ​ໂຄງການ​ດັ່ງກ່າວ KEPCO ໄດ້​ຕັ້ງ​ສະຖານີ​ຈຳລອງ GIS ຢູ່​ລັດ​ວິ​ສາ​ຫະ​ກິດ​ໄຟຟ້າ​ລາວ ໄດ້​ເຝິກ​ອົບ ຮົມ​ໃຫ້​ພະນັກງານ​ລັດ​ວິ​ສາ​ຫະ​ກິດ​ໄຟຟ້າ​ລາວ ການ​ສຳ​ມະ​ນາ​ຄັ້ງ​ນີ້ ຄາດ​ວ່າ​ຈະ​ໄດ້​ຮັບ​ຜົນ​ປະໂຫຍດ​ຈາກ​ປະສົບ​ການ​ລະດັບ​ສາກົນ​ຂອງ​ບໍລິສັດ​ໃນ​ການ​ນຳ​ໃຊ້​ເຕັກ​ໂນ​ໂລ​ຊີ​ທີ່​ທັນ​ສະໄໝ ເປັນຕົ້ນ ເຕັກ​ໂນ​ໂລ​ຊີ​ຂະແໜງ ພະລັງງານ​ໄຟຟ້າ​ຂອງ KEPCO ເພື່ອ​ເພີ່ມ​ປະ​ສິດທິ​ຜົນ​ໃຫ້​ວຽກ​ງານ ແລະ ພັດທະນາ​ທຸລະ​ກິດ.

    ທ່ານ Shin sung soon ກ່າວ​ວ່າ: ສຳ​ມະ​ນາ​ຄັ້ງ​ນີ້ ເພື່ອ​ເສີມ​ຂະຫຍາຍ​ການ​ຮ່ວມ​ມື​ໃນ​ຂົງເຂດ​ອຸດສາຫະກຳ​ໄຟຟ້າ​ລະຫວ່າງ ​ສປປ ລາວ ກັບ ສ ເກົາຫຼີ ແນໃສ່​ເສີມ​ສ້າງ​ສາຍ​ພົວພັນ​ຮ່ວມ​ມື​ມິດຕະພາບ​ແບບ​ຕ່າງ​ຝ່າຍ​ຕ່າງ​ໄດ້​ຮັບ​ຜົນ​ປະໂຫຍດ ໃຫ້​ມີ​ການ​ຂະຫຍາຍຕົວ​ຢ່າງ​ຕໍ່​ເນື່ອງ ນັບ​ແຕ່ ​ສປປ ລາວ ແລະ ສ ເກົາຫຼີ ໄດ້​ສ້າງຕັ້ງ​ສາຍ​ພົວພັນ​ການ​ທູດ​ນຳ​ກັນ​ມາ​ແຕ່​ປີ 1995 ສາຍ​ພົວພັນ​ສອງ​ປະເທດ​ໄດ້​ມີ​ການ​ພັດທະນາ​ຕໍ່​ເນື່ອງ​ໃນ​ຫຼາຍ​ຂົງເຂດ​ຕ່າງໆ​ເຊັ່ນ: ການເມືອງ ເສດຖະກິດ-ສັງຄົມ ແລະ ວັດທະນະທຳ.

ຂ່າວທີ່ກ່ຽວຂ້ອງ