ສວນວັດທະນະທຳຊຽງຄວນ ຈັດກິດກໍາສະຫຼອງວັນກຳມະກອນສາກົນ

1.502 03 ພ.ພ. 2019 ຂ່າວໜ້າ​ໜຶ່ງ
ສວນວັດທະນະທຳຊຽງຄວນ ຈັດກິດກໍາສະຫຼອງວັນກຳມະກອນສາກົນ

    ເພື່ອສ້າງຂະບວນການສະເຫຼີມສະຫຼອງວັນກຳມະກອນສາກົນ (1 ພຶດສະພາ) ຄົບຮອບ 113 ປີ ທັງເປັນການສົ່ງເສີມປີທ່ອງທ່ຽວ ລາວ-ຈີນ 2019 ໃຫ້ມີບັນຍາກາດຟົດຟື້ນມ່ວນຊື່ນ ແລະ ເພື່ອຫາລາຍໄດ້ສົມທົບທຶນກໍ່ ສ້າງກຳແພງໂຮງຮຽນປະຖົມສົມບູນບ້ານຊຽງຄວນ ບໍລິສັດສວນວັດທະນະທໍາຊຽງຄວນຈໍາກັດຜູ້ດຽວ ສົມທົບກັບອົງການປົກຄອງເມືອງຫາດຊາຍຟອງ ແລະ ບ້ານຊຽງຄວນ ຈັດກິດຈະກໍາສະຫຼອງວັນດັ່ງກ່າວ ຂຶ້ນວັນທີ 1 ພຶດ ສະພາ 2019 ຢູ່ສວນວັດທະນະທໍາຊຽງຄວນ ເມືອງຫາດຊາຍຟອງ ນະຄອນຫຼວງວຽງຈັນ ໂດຍມີທ່ານ ແກ່ນ ວໍ ລະສານ ຮອງເຈົ້າເມືອງຫາດຊາຍຟອງ ພ້ອມດ້ວຍຄະນະນໍາເມືອງ ບ້ານຊຽງຄວນ ແຂກຖືກເຊີນ ແລະ ນັກທ່ອງທ່ຽວເຂົ້າຮ່ວມ.

    ທ່ານນາງ ສ້ອຍສຸດາ ອິນເມືອງໄຊ ປະທານສວນວັດທະນະທຳຊຽງຄວນ ກ່າວວ່າ: ພາຍຫຼັງບໍລິສັດທ່ອງທ່ຽວ ແລະ ການລົງທຶນສາກົນລາວຈຳກັດ ໄດ້ສຳປະທານສວນວັດທະນະທຳຊຽງຄວນ ເນື້ອທີ່ 21.000 ຕາແມັດ ແລະ ໄດ້ມີການພັດທະນາປັງປຸງຫຼາຍຢ່າງ ເພື່ອສ້າງຄວາມຄວາມແປກໃໝ່ໃຫ້ຜູ້ທີ່ເຄີຍເຫັນແລ້ວ ຢາກມາເບິ່ງອີກເປັນຕົ້ນໄດ້ສ້າງປະຕູໂຂງ ແລະ ກຳແພງອ້ອມສວນທີ່ເປັນເອກະລັກດ້ານວັດທະນະທຳ ປະຕິສັງຂອນພະພຸດທະຮູບວັດຖຸບູຮານໃຫ້ມີຄວາມສວຍງາມຕາມສະພາບເດີມ ກໍ່ສ້າງເສັ້ນທາງພາຍໃນສວນຮ້ານອາຫານ ຮ້ານຂາຍເຄື່ອງທີ່ລະນຶກ ເວທີສະແດງ ແລະ ສິ່ງອຳນວຍຄວາມສະດວກອື່ນໆ ປັດຈຸບັນນັກທ່ອງທ່ຽວພາຍໃນ ແລະ ຕ່າງປະເທດໄດ້ເຂົ້າມາທ່ອງທ່ຽວຊົມ 800 ກວ່າຄົນຕໍ່ມື້ ໃນນີ້ສວນໃຫຍ່ແມ່ນນັກທ່ອງທ່ຽວມາຈາກປະເທດຫວຽດນາມ ຈີນ ເກົາຫຼີ ຝຣັ່ງ ແລະ ໄທ ນອກນີ້ພວກເຮົາກໍກຳລັງກໍ່ສ້າງຮ້ານອາຫານບໍລິເວນແຄມຂອງ ເພື່ອໃຫ້ນັກທ່ອງທ່ຽວໄດ້ຊົມບັນຍາກາດໄດ້ສະດວກສະບາຍຂຶ້ນ.

    ເນື່ອງໃນວັນກຳມະກອນສາກົນ ສວນວັດທະນະທຳຊຽງຄວນ ກໍໄດ້ຖືວັນຄວາມໝາຍສຳຄັນນີ້ ຈັດກິດຈະກຳສະແດງສິລະປະ ເຊິ່ງມີນັກຮ້ອງຊື່ດັງ ເປັນຕົ້ນ ຫງ່າ ແສງອຳພອນ ເຈົ້າຂອງເພງງາມແທ້ເມືອງລາວ ເກດລະສິນ ປຸກກີ້ ເງິນລ້ານ ແລະ ອື່ນໆ ມາສະແດງ ພ້ອມທັງກິດຈະກຳແຈກຂອງຂວັນລາງວັນຢ່າງມ່ວນຊື່ນ ຜ່ານການຈັດງານສາມາດລະດົມທຶນໄດ້ 30 ລ້ານກີບ ໂດຍລາຍໄດ້ທັງໝົດໄດ້ໃຫ້ບ້ານຊຽງຄວນ ເພື່ອນໍາໄປກໍ່ສ້າງກຳແພງໂຮງຮຽນປະຖົມສົມບູນບ້ານຊຽງຄວນ.

ຂ່າວທີ່ກ່ຽວຂ້ອງ